|
|
 |
| (GMT+08:00)
2008-04-03 15:10:22
|
 |
|
ອົງການທີ່ບໍ່ແມ່ນລັດຖະບານພວມໃຊ້ການກະທຳເພື່ອຮັບມືກັບການປ່ຽນແປງຂອງດິນຟ້າອາກາດ
cri
ກອງປະຊຸມປຶກສາຫາລືຂອງສະຫະປະຊາຊາດກ່ຽວກັບການປ່ຽນແປງຂອງ ດິນຟ້າອາກາດທີ່ຈະຈັດເປັນເວລາ5ມື້ພວມດຳເນີນຢູ່ບາງກອກ ນະຄອນຫຼວງຂອງໄທ, ຜູ້ແທນປະມານ1200ຄົນຂອງ163ປະເທດໄດ້ເຂົ້າຮ່ວມການປະຊຸມ. ຫົວຂໍ້ ຂອງກອງປະຊຸມແມ່ນຫາລືວ່າຈະເຮັດແນວໃດເພື່ອປະຕິບັດ"ແຜນການບາລີ"ທີ່ກອງປະຊຸມການປ່ຽນແປງຂອງດິນຟ້າອາກາດໄດ້ຜ່ານຮັບຮອງຢູ່ເກາະບາລີໃນປີກາຍນີ້. ເມື່ອທຽບກັບຜູ້ແທນຝ່າຍທາງການທີ່ດຳເນີນງານຕາມລະບຽບນັ້ນແລ້ວ, ອົງການທີ່ບໍ່ແມ່ນລັດຖະບານທີ່ລິເລີ່ມສົ່ງເສີມໃຫ້ໃຊ້ການຮ່ວມມືສາກົນຮັບມືກັບການປ່ຽນແປງຂອງດິນຟ້າອາກາດນັ້ນຫ້າວຫັນເປັນພິເສດໃນກອງປະຊຸມຄັ້ງນີ້.
ວັນທີ2ເມສານີ້, ກອງປະຊຸມປຶກສາຫາລືຂອງສະຫະປະຊາຊາດກ່ຽວກັບການປ່ຽນແປງຂອງດິນຟ້າອາກາດໄດ້ເຂົ້າສູ່ມື້ທີ3, ໃນກອງປະຊຸມ, ອົງການທີ່ບໍ່ແມ່ນລັດຖະບານຈຳນວນບໍ່ໜ້ອຍໄດ້ພາກັນກ່າວວ່າ, ຈະໃຊ້ກຳລັງກົດໜີບຕໍ່ລັດຖະບານປະເທດຕ່າງໆ, ເພື່ອຢາກຊຸກຍູ້ໃຫ້ການປຶກສາຫາລືກ່ຽວກັບດິນຟ້າອາກາດທີ່ດຳເນີນໄປຢ່າງລຳບາກໄດ້ການຄືບໜ້າ.
ຕາມຂ່າວແຈ້ງວ່າ, ຜູ້ເຂົ້າຮ່ວມການປຶກສາຫາລືເທື່ອນີ້ມີຜູ້ແທນ229ຄົນຂອງ65ອົງການທີ່ບໍ່ແມ່ນລັດຖະບານເຊິ່ງລວມທັງເຄືອຂ່າຍປະຕິບັດງານດິນຟ້າອາກາດສາກົນຫຼືCAN. ພວກທ່ານລ້ວນແຕ່ເຂົ້າຮ່ວມກອງປະຊຸມໃນນາມຜູ້ສັງເກດການ. ຜູ້ແທນອົງການທີ່ບໍ່ແມ່ນລັດຖະບານເຫຼົ່ານີ້ຕິດຕໍ່ພົວພັນກັນຢ່າງໃກ້ຊິດ, ກ່າວຄຳປາໄສຢ່າງຕັ້ງໜ້າໃນກອງປະຊຸມ, ໃນເວລາພັກປະຊຸມ, ພວກທ່ານກໍ່ເຜີຍແຜ່ເອກະສານໂຄສະນາຊະນິດຕ່າງໆຢູ່ໃນແລະນອກສະຖານທີ່ປະຊຸມ, ເພື່ອຊຸກຍູ້ການປຶກສາຫາລືໃຫ້ໄດ້ຮັບໝາກຜົນໂດຍໄວ.
ໃນເວລາໃຫ້ສຳພາດຕໍ່ນັກຂ່າວ, ນາງແຄັດເທີຣິນ ກຸດມານ ຜູ້ຕາງໜ້າກອງທຶນສັດປ່າໂລກເພື່ອທຳມະຊາດ ອົງການອະນຸລັກສິ່ງແວດລ້ອມທີ່ບໍ່ແມ່ນລັດຖະບານທີ່ມີຊື່ສຽງໃນໂລກໄດ້ຕິຕຽນຢ່າງຮຸນແຮງຕໍ່ບາງປະເທດທີ່ພັດທະນາແລ້ວໄດ້ມີທ່າທີຖອຍຫຼັງໃນບັນຫາຮັບມືກັບບັນຫາການປ່ຽນແປງຂອງດິນຟ້າອາກາດ. ນາງເຫັນວ່າ, ເພື່ອກ້າວເຖິງຂັ້ນເຊັນສັນຍາສະບັບໃໝ່ກ່ຽວກັບຮັບມືກັບການປ່ຽນແປງຂອງດິນຟ້າອາກາດ, ປະເທດທີ່ພັດທະນາແລ້ວຄວນເອົາໃຈໃສ່ນຳຜົນປະໂຫຍດ ຂອງທົ່ວໂລກ.
ນາງກຸດມານກ່າວວ່າ, ໃນການປຶກສາຫາລືເທື່ອນີ້, ບາງປະເທດທີ່ພັດທະນາແລ້ວ ເຊັ່ນຍີ່ປຸ່ນ ນູແວນເຊລັງເປັນຕົ້ນໄດ້ສ້າງບັນຫາໃໝ່ຂຶ້ນຫຼືສົນໃຈນຳບັນຫາປີກຍ່ອຍຫຼາຍເກີນໄປ, ທ່າທີແນວນີ້ຈະບໍ່ມີຜົນດີຕໍ່ໂລກທີ່ພ້ອມກັນຮັບມືກັບການປ່ຽນແປງຂອງດິນຟ້າອາກາດ. ປະເທດທີ່ພັດທະນາແລ້ວຄວນເອົາໃຈໃສ່ເຮັດແນວໃດຫຼຸດການລະບາຍອາຍພິດເຮືອນແກ້ວໃຫ້ໜ້ອຍລົງຢ່າງແທ້ຈິງ, ພ້ອມກັນນັ້ນກໍໃຫ້ການຊ່ອຍເຫຼືອຕົວຈິງດ້ານເຕັກນິກແລະເງິນທຶນແກ່ປະເທດພວມພັດທະນາ.
|
|
|
