|
|
(GMT+08:00)
2008-04-07 15:47:54
|
|
AMDເນັ້ນໜັກການເພີ່ມທະວີການຮ່ວມມື
cri
Author: cai
ວັນທີ 6 ເມສານີ້,ເວທີປຶກສາຫາລືລະດັບລັດຖະມົນຕີອາຊີ-ຕາເວັນອອກກາງຫຼື AMD ຄັ້ງທີ 2 ທີ່ຈັດຂຶ້ນຢູ່ຊາມເອວເຊັກ ເມືອງທ່ອງທ່ຽວທະເລແດງຂອງເອຢິບເປັນເວລາ 2 ວັນໄດ້ອັດລົງແລ້ວ.ຜູ້ຕາງໜ້າທີ່ມາຈາກປະມານ 50 ປະເທດຂອງອາຊີແລະຕາເວັນອອກກາງພ້ອມດ້ວຍຜູ້ຕາງໜ້າຂອງອົງການຈັດຕັ້ງສາກົນຈຳນວນໜຶ່ງໄດ້ປຶກສາຫາລືກັນຢ່າງເລິກເຊິ່ງກ່ຽວກັບບັນຫາເຮັດແນວໃດເພີ່ມທະວີການຮ່ວມມືລະຫວ່າງສອງພາກພື້ນຕື່ມອີກ.ປະເທດຕ່າງໆທີ່ເຂົ້າຮ່ວມກອງປະຊຸມໃຫ້ຄຳໝັ້ນສັນຍາວ່າຈະເພີ່ມທະວີການຮ່ວມມືຕື່ມອີກໃນຂົງເຂດການເມືອງ ເສດຖະກິດແລະວັດທະນະທຳເປັນຕົ້ນ.
ຖະແຫຼງການທີ່ກອງປະຊຸມໄດ້ຮັບຮອງຊີ້ອອກວ່າ,ພາຍໃຕ້ເງື່ອນໄຂປະຫວັດສາດອັນໃໝ່,ການບັນລຸສັນຕິພາບແລະການພັດທະນາຢ່າງຖາວອນແມ່ນໜ້າທີ່ຮ່ວມຂອງອາຊີແລະຕາເວັນອອກກາງ.ຜູ້ແທນທີ່ເຂົ້າຮ່ວມກອງປະຊຸມເຫັນວ່າ,ຖ້າຢາກສຳເລັດໜ້າທີ່ດັ່ງກ່າວ,ຕ້ອງລົງມືຈາກຫຼາຍດ້ານຄື:
ກ່ອນອື່ນ,ຕ້ອງມີສະຖຽນລະພາບແລະຄວາມປອດໄພ.ສະຖຽນລະພາບແມ່ນເງື່ອນໄຂເບື້ອງຕົ້ນຂອງການພັດທະນາຂອງປະເທດແລະເຂດແຄວ້ນຕ່າງໆ.ອາຊີແລະຕາເວັນອອກກາງແມ່ນພາກພື້ນທີ່ມີບັນຫາຈຸດຮ້ອນອ່າວຫຼາຍ,ການປະທະກັນລະຫວ່າງປາເລັສຕີນກັບອິສຣາແອນ ບັນຫາອີຣັກ ບັນຫານີວເຄຼຍແຫຼມເກົາຫຼີເປັນຕົ້ນໄດ້ກ່ຽວພັນເຖິງສະຖຽນລະພາບແລະຄວາມປອດໄພຂອງພາກພື້ນ.ໃນຊຸມປີມໍ່ໆມານີ້,ບັນຫາຄວາມປອດໄພທີ່ບໍ່ແມ່ນດັ້ງເດີມຄືລັດທິກໍ່ການຮ້າຍ ອາດຊະຍາກຳຂ້າມຊາດກໍ່ນັບມື້ນັບພົ້ນເດັ່ນຂຶ້ນໃນສອງພາກພື້ນດັ່ງກ່າວ.ຈະບັນລຸສະຖຽນລະພາບແລະຄວາມປອດໄພແນວໃດ?ກໍຄືທ່ານວາງອີ້ ຫົວໜ້າຄະນະຜູ້ແທນຈີນ ລັດຖະມົນຕີຊ່ວຍວ່າການກະຊວງການຕ່າງປະເທດຈີນເວົ້າໃນກອງປະຊຸມນັ້ນລະ,ຄື ຕ້ອງໃຫ້ປະເທດຕ່າງໆໃນພາກພື້ນຍຶດໝັ້ນການແກ້ໄຂບັນຫາຂັດແຍ່ງກັນດ້ວຍສັນຕິວິທີ,ຜ່ານຈາກການປຶກສາຫາລືຫຼຸດຜ່ອນຄວາມຂັດແຍ່ງກັນ,ລິເລີ່ມການໄວ້ເນື້ອເຊື່ອໃຈກັນ ຕ່າງຝ່າຍຕ່າງມີຜົນປະໂຫຍດ ສະເໝີພາບແລະປະສານງານ,ບັນລຸຄວາມປອດໄພໃນການຮ່ວມມືແລະຄວາມປອດໄພຮ່ວມ.
ອັນທີສອງ,ດຳເນີນການຮ່ວມມືຕ່າງຝ່າຍຕ່າງມີຜົນປະໂຫຍດໃນຂົງເຂດເສດຖະກິດ.ອາຊີແລະຕາເວັນອອກກາງສ່ວນຫຼາຍແມ່ນປະເທດພວມພັດທະນາ,ລ້ວນແຕ່ປະເຊີນໜ້າກັບຫົວຂໍ້ຮ່ວມຄືການພັດທະນາເສດຖະກິດ.ສອງພາກພື້ນດັ່ງກ່າວສາມາດຊ່ວຍເຫຼືອກັນໃນດ້ານຊັບພະຍາກອນ ຕະຫຼາດແລະໂຄງປະກອບຜະລິດຕະກຳເປັນຕົ້ນ,ໂດຍສະເພາະແມ່ນໃນດ້ານການຄ້າ ການລົງທຶນ ການເງິນ ພະລັງງານແລະການທ່ອງທ່ຽວ,ມີກຳລັງແຮງບົ່ມຊ້ອນຫຼາຍໃນການຮ່ວມມື,ປະເທດຕ່າງໆຄວນຖືນີ້ເປັນຈຸດໜັກ,ຊຸກຍູ້ການຮ່ວມມືດ້ານເສດຖະກິດຢ່າງຮອບດ້ານ.ປະຈຸບັນ,ປະລິມານສຳຮອງເງິນຕາຕ່າງປະເທດຂອງອາຊີແລະຕາເວັນອອກກາງໄດ້ມີເຖິງ 4000 ຕື້ໂດລາ,ໄດ້ສ້າງພື້ນຖານໃຫ້ແກ່ສອງຝ່າຍໃນການລົງທຶນແກ່ກັນ.
ຜູ້ແທນທີ່ເຂົ້າຮ່ວມກອງປະຊຸມຍັງກ່າວເນັ້ນວ່າ,ນັກວິຊາການທີ່ມີຄວາມຮູ້ຄວາມສາມາດແມ່ນປັດໄຈສຳຄັນຂອງອາຊີແລະຕາເວັນອອກກາງໃນການເຮັດໃຫ້ເສດຖະກິດພັດທະນາແບບຍືນຍົງ,ຄວນເພີ່ມທະວີການຮ່ວມມືລະຫວ່າງສອງຝ່າຍໃນຂົງເຂດອົບຮົມນັກວິຊາການ.ປະຈຸບັນ,ພາຍໃຕ້ຂອບເວທີປຶກສາຫາລືອາຊີ-ຕາເວັນອອກກາງ,ໄດ້ສ້າງສູນອົບຮົມວິຊາຊີບໃນພາກພື້ນຢູ່ຊອກດານີ,ແລະໄດ້ສ້າງສູນອົບຮົມນັກວິຊາການດ້ານການຄຸ້ມຄອງສາທາລະນະໃນພາກພື້ນຢູ່ກາຕາ.
ອັນທີສາມ,ສົ່ງເສີມໃຫ້ອະລິຍະທຳແລະສາສະໜາທີ່ຕ່າງກັນສົນທະນາກັນ.ຜູ້ເຂົ້າຮ່ວມກອງປະຊຸມເຫັນວ່າ,ຈຸດນີ້ມັກຈະຖືກຖືເບົາ,ຄວາມຂັດແຍ່ງແລະປະທະກັນຫຼາຍຂໍ້ກໍ່ແມ່ນເກີດຂຶ້ນຍ້ອນຂາດການຕິດຕໍ່ແລກປ່ຽນກັນແລະຄວາມເຂົ້າໃຈກັນ.ປະເທດຕ່າງໆຂອງອາຊີແລະຕາເວັນອອກກາງຄວນລົງເລິກເອົາໃຈໃສ່ນຳທ່າແຮງຂອງຕົນໃນດ້ານວັດທະນະທຳ,ເພີ່ມທະວີການສົນທະນາກັນລະຫວ່າງອະລິຍະທຳແລະສາສະໜາທີ່ຕ່າງກັນ,ຊຸກຍູ້ໃຫ້ວັດທະນະທຳແລະສັງຄົມທີ່ຕ່າງກັນເຊື່ອມໂຍງເຂົ້າກັນແລະຍົກສູງຂຶ້ນພ້ອມກັນ.
ຫາງສຽງເຫັນວ່າ,ອາຊີແລະຕາເວັນອອກກາງໃນນາມເປັນສອງພາກພື້ນທີ່ສຳຄັນຂອງໂລກ,ໄດ້ເສີມຂະຫຍາຍບົດບາດທີ່ເຂົ້າແທນບໍ່ໄດ້ໃນເວທີສາກົນ.ສອງພາກພື້ນດັ່ງກ່າວຜ່ານຈາກການດຳເນີນການສົນທະນາ,ຈະມີຜົນດີຕໍ່ການບັນລຸສັນຕິພາບແລະການພັດທະນາຂອງພາກພື້ນ,ນີ້ກໍຍ່ອມຈະຊຸກຍູ້ສັນຕິພາບແລະການພັດທະນາຢ່າງຕໍ່ເນື່ອງຂອງທົ່ວໂລກ.
|
|
|