|
|
 |
| (GMT+08:00)
2008-04-18 18:12:10
|
 |
|
ຣັດເຊຍເລັ່ງລັດບາດກ້າວກັບຄືນມາມີບົດບາດໃນຕາເວັນອອກກາງ
cri
Author: d
ວັນທີ17ເມສານີ້ ທ່ານວຼາດີເມຍ ປູຕີນ ປະທານາທິບໍດີຣັດເຊຍໄດ້ສິ້ນສຸດການຢ້ຽມຢາມລີບີເປັນເວລາ2ວັນ.ນີ້ແມ່ນປະມຸກລັດຣັດເຊຍຢ້ຽມຢາມລີບີເປັນເທື່ອທຳອິດ,ເປັນຂີດໝາຍສະແດງໃຫ້ເຫັນວ່າ ຣັດເຊຍຈະເລັ່ງລັດບາດກ້າວກັບຄືນມາມີບົດບາດທາງການເມືອງແລະເສດຖະກິດການຄ້າໃນຕາເວັນອອກກາງ.
ອັນທຳອິດທີ່ສະແດງອອກຄື,ສະພາບການເມືອງຂອງປະເທດໃຫຍ່ຢູ່ເຂດຕາເວັນອອກກາງກຳລັງຄ່ອຍໆປ່ຽນແປງ.ປະຈຸບັນ ອາເມລິກາໄດ້ຕົກຢູ່ໃນສະພາບຫຍຸ້ງຍາກຢ່າງໜັກໜ່ວງຍ້ອນກໍ່ສົງຄາມອີຣັກ,ບົດບາດຂອງອາເມລິກາທີ່ຢາກເປັນຜູ່ຊີ້ນຳຕາເວັນອອກກາງນັ້ນຖືກບັ່ນທອນລົງເທື່ອລະກ້າວ.ນັບແຕ່ປີກາຍນີ້ເປັນຕົ້ນມາ,ຣັດເຊຍໄດ້ທຳຄວາມພະຍາຍາມທາງການທູດຢູ່ເຂດຕາເວັນອອກກາງຢ່າງຟົດຟື້ນທີ່ສຸດ.
ອັນທີສອງ,ທ່ານປູຕີນຢ້ຽມຢາມລີບີຈະເພີ່ມທະວີການຮ່ວມມືຍຸດທະສາດລະຫວ່າງຣັດເຊຍກັບລີບີໃນເຂດຕາເວັນອອກກາງ.ວັນທີ16ເມສານີ້,ລີບີກັບຣັດເຊຍໄດ້ເຊັນຖະແຫຼງການຮ່ວມເພື່ອເພີ່ມທະວີແລະຂະຫຍາຍການພົວພັນຮ່ວມມືມິດຕະພາບລະຫວ່າງສອງປະເທດ.ຖະແຫຼງການຂຽນວ່າສອງຝ່າຍຈະອອກແຮງເຮັດໃຫ້ຕາເວັນອອກກາງກາຍເປັນເຂດທີ່ບໍ່ມີອາວຸດລ້າງຜານຂະໜາດໃຫຍ່,ຫຼຸດການເຄື່ອນໄຫວທາງທະຫານຢູ່ເຂດທະເລເມດີເຕຣາເນ,ເຮັດໃຫ້ເຂດດັ່ງກ່າວກາຍເປັນເຂດທີ່ມີສັນຕິພາບ ສະຖຽນລະພາບແລະຮ່ວມມືກັນ.
ແລະອີກເລື່ອງໜຶ່ງແມ່ນ,ມໍ່ໆມານີ້ ຣັດເຊຍໄດ້ເພີ່ມທະວີການຮ່ວມມືກັບປະເທດຕ່າງໆໃນເຂດຕາເວັນອອກກາງຢ່າງບໍ່ຢຸດຢັ້ງເພື່ອນຳໃຊ້ພະລັງງານນິວເຄຼຍໃນທາງສັນຕິ.ໃນໄລຍະທ່ານປູຕີນຢ້ຽມຢາມລີບີ,ຣັດເຊຍກັບລີບີໄດ້ກ່າວໃນຖະແຫຼງການຮ່ວມກ່ຽວກັບການຮ່ວມມືກັນໃນຫຼາຍຂົງເຂດ,ເຫັນດີຈະເຊັນສັນຍາຂອບການຮ່ວມມືນຳໃຊ້ພະລັງງານນິວເຄຼຍໃນທາງສັນຕິແລະແຜນການປະຕິບັດສັນຍາສະບັບນີ້ໃນຫວ່າງມໍ່ໆນີ້.ກ່ອນໜ້ານີ້,ໃນເວລາທ່ານມູບາຣັກ ປະທານາທິບໍດີເອຢິບຢ້ຽມຢາມຣັດເຊຍໃນເດືອນມີນານັ້ນ,ສອງປະເທດໄດ້ເຊັນສັນຍານຳໃຊ້ພະລັງງານນິວເຄຼຍໃນທາງສັນຕິລະຫວ່າງລັດຖະບານສອງປະເທດ; ຫວ່າງມໍ່ໆນີ້ ຊີຣີກໍ່ປະກາດວ່າ,ຍິນດີຮ່ວມມືກັບຣັດເຊຍໃນການນຳໃຊ້ພະລັງງານນິວເຄຼຍໃນທາງສັນຕິ.ບັນດາປະເທດອາລັບໃນເຂດຕາເວັນອອກກາງກໍ່ຮຽກຮ້ອງຕະຫຼອດມາໃຫ້ນຳໃຊ້ພະລັງງານນິວເຄຼຍໃນທາງສັນຕິ,ການຮ່ວມມືໃນດ້ານນີ້ຈະມີຊ່ອງທາງພັດທະນາອັນໃຫຍ່ຫຼວງແລະໄດ້ຮັບຜົນປະໂຫຍດຢ່າງຫຼວງຫຼາຍ.
ວັນທີ17ເມສາ,ທ່ານມາມຸດ ອາບັສ ປະທານອົງການອຳນາດແຫ່ງຊາດປາເລັສຕີນທີ່ພວມຢ້ຽມຢາມຣັດເຊຍປະກາດວ່າ,ກອງປະຊຸມສາກົນກ່ຽວກັບບັນຫາຕາເວັນອອກກາງຮອບໃໝ່ຈະຈັດຂຶ້ນຢູ່ມົສກູ ນະຄອນຫຼວງຂອງຣັດເຊຍໃນເດືອນມິຖຸນາປີນີ້,ທ່ານອາບັສຈະເຈລະຈາກັບປະທານາທິບໍດີປູຕີນກ່ຽວກັບເລື່ອງນີ້ໃນວັນທີ18ເມສານີ້.ຫາງສຽງທົ່ວໄປເຫັນວ່າ,ຣັດເຊຍພວມທຳຄວາມພະຍາຍາມທາງການທູດ,ເພື່ອກັບຄືນສູ່ໃຈກາງຂອງເວທີການເມືອງໃນຕາເວັນອອກກາງເທື່ອລະກ້າວ.
|
|
|
