|
ຕາມຂ່າວCRI:ຫວ່າງມໍ່ໆນີ້,ໃນເວລາກ່າວປາຖະກະຖາຢູ່ລອນດອນ,ທ່ານປິເຕີ ແມນເດີຊັນ ກຳມະການການຄ້າຂອງຄະນະກຳມະການສະຫະພາບເອີລົບກ່າວວ່າ,ທ່ານບໍ່ສະໜັບ ສະໜູນການກະທຳທີ່ຂວ້ຳບາດງານກີລາໂອລິມປິກປັກກິ່ງ,ເພາະວ່ານີ້ຈະທຳລາຍຜົນປະໂຫຍດຂອງຄົນເອີລົບແລະຄົນຈີນທຳມະດາສາມັນ.ໃນການຮັບມືກັບບັນຫາຕິເບດ,ຝ່າຍ ຕາເວັນຕົກຄວນຮ່ວມມືກັບຈີນແຕ່ບໍ່ແມ່ນຕ້ານຢັນກັນ.
ໃນຖານະເປັນຜູ້ຮັບຜິດຊອບນະໂຍບາຍການຄ້າກັບພາຍນອກຂອງສະຫະພາບເອີລົບ, ທ່ານແມນເດີຊັນເຄີຍໃຊ້ແຮງກົດດັນຕໍ່ຈີນເລື່ອຍໆໃນບັນຫາເສດຖະກິດການຄ້າພ້ອມດ້ວຍອັດຕາແລກປ່ຽນເງິນຢວນຈີນ,ສື່ມວນຊົນຈີນໃຫ້ຊື່ວ່າເປັນຄູ່ເຈລະຈາທີ່ແຂງກະດ້າງຂອງຈີນ.
ຄວາມຍຸດຕິທຳມາຈາກຄວາມຮູ້ຈັກ,ສາເຫດທີ່ທ່ານແມນເດີຊັນມີຄວາມເຫັນທີ່ຍຸດຕິທຳຕໍ່ຈີນໃນບັນຫາຕິເບດ,ແມ່ນຍ້ອນວ່າທ່ານເຄີຍສຳຜັດກັບຄົນຈີນຫຼາຍເທື່ອ,ແລະຮູ້ຈັກຈີນດີ.
ບໍ່ພຽງແຕ່ແມ່ນທ່ານແມນເດີຊັນ,ຄົນຈຳນວນຫຼວງຫຼາຍຂອງໂລກກໍໄດ້ໃຫ້ການຕີລາຄາຢ່າງຍຸດຕິທຳຕໍ່ຈີນກໍຄືບັນຫາຕິເບດຂອງຈີນຍ້ອນການຮູ້ຈັກຈີນແລະຕິເບດຂອງຈີນ.
"ສິດທິມະນຸດຢູ່ເຂດຕິເບດແລະເຂດທີ່ຊາວຕິເບດຕັ້ງພູມລຳເນົາຢູ່ຂອງແຂວງເຊສວນ ແຂວງກັ່ນຊູ້ ແຂວງຢຸນນານແລະແຂວງຊິ່ງໄຫລ້ວນແຕ່ໄດ້ຮັບການພັດທະນາຢ່າງວ່ອງໄວ,ສະພາບຄວາມຈິງຂອງການພັດທະນາຢູ່ທ້ອງຖິ່ນເຫຼົ່ານີ້ຕ່າງກັນໝົດກັບຄຳປ່າວຂ່າວ ຂອງດາໄລລາມະແລະກຸ່ມຕິເບດເອກະລາດ."
ນີ້ແມ່ນຄຳປາໄສຂອງທ່ານຊີຣູ ຣາມ ຫົວໜ້າບັນນາທິການໜັງສືພິມ "ຮິນດີ" ກ່າວໃນກອງປະຊຸມເວທີປາໄສສິດທິມະນຸດປັກກິ່ງຄັ້ງທຳອິດທີ່ຈັດຂຶ້ນໃນວັນທີ 21 ເມສານີ້. ໃນ 7 ປີທີ່ຜ່ານມາ, ເພິ່ນເຄີຍໄປເຂດຕິເບດ 2 ເທື່ອ, ສະນັ້ນຈຶ່ງຮູ້ສະພາບຕົວຈິງຂອງເຂດຕິເບດດີ.
"ທຳອິດ, ຂ້າພະເຈົ້າຮູ້ຈີນຢູ່ເບຼຊິນ, ຢູ່ເບຼຊິນ, ມີຫຼາຍຄົນກໍ່ມີຄວາມເຫັນລຳອຽງແລະບໍ່ເຂົ້າໃຈຈີນປານໃດ. ເມື່ອມາຈີນແລ້ວ, ພວກເຮົາຈຶ່ງປະກົດເຫັນວ່າ, ສິ່ງບໍ່ດີທີ່ເຂົາເຈົ້າເວົ້າໃຫ້ພວກເຮົາຟັງນັ້ນບໍ່ມີເລີຍ. ພວກເຮົາໄດ້ສຳພາດປະຊາຊົນຈີນຫຼາຍຄົນ, ເຖິງວ່າແມ່ນຄົນທຸກຍາກ, ເຂົາເຈົ້າກໍ່ເຫັນວ່າ, ຊີວິດການເປັນຢູ່ໃນປະຈຸບັນດີກວ່າແຕ່ກ່ອນຫຼາຍແລ້ວ, ແລະເພີງພໍໃຈຫຼາຍນຳຊີວິດດຽວນີ້."
ນີ້ແມ່ນຈີນໃນສາຍຕາຂອງນາງອານນາ ໂພລາໂຄສົກຂອງໂທລະພາບໂກຼໂບເບຼຊິນ. ເດືອນກັນຍາປີກາຍນີ້, ນາງໄດ້ຖ່າຍວິດີໂອຢູ່ຈີນເປັນເວລາເກືອບ 1 ເດືອນ, ນີ້ເຮັດໃຫ້ນາງເຂົ້າໃຈຈີນຄືນໃໝ່.
ແຕ່ຄວາມເຫັນອະຄະຕິສ່ວນຫຼາຍແມ່ນຍ້ອນຄວາມບໍ່ຮູ້, ນັກຫຼິ້ນການເມືອງແລະສື່ມວນຊົນຈຳນວນໜຶ່ງຂອງປະເທດຕາເວັນຕົກສວຍໃຊ້ບັນຫາຕິເບດໂຈມຕີຈີນນັ້ນໄດ້ສ່ອງແສງໃຫ້ເຫັນວ່າເຂົາເຈົ້າບໍ່ຮູ້ສະພາບຕົວຈິງແຫ່ງຊາດຂອງຈີນແລະບໍ່ຮູ້ປະຫວັດສາດແລະສະພາບປັດຈຸບັນຂອງຕິເບດ.ສື່ມວນຊົນຕາເວັນຕົກຈຳນວນໜຶ່ງລາຍງານຂ່າວແບບບິດເບືອນຈີນໂດຍບໍ່ມີຄວາມຮັບຜິດຊອບ,ຍິ່ງພາໃຫ້ມວນຊົນເຂົ້າໃຈຜິດຫຼາຍຂຶ້ນ.
"ໄປຈີນແມ້!ໄປເບິ່ງຈີນທີ່ແທ້ຈິງແລະຄົບຖ້ວນ,ໄປເບິ່ງຈີນທີ່ຫຼາຍສື່ມວນຊົນຕາເວັນຕົກຈະບໍ່ລາຍງານຂ່າວຕໍ່ພວກທ່ານ."
ຄຳເວົ້າດັ່ງກ່າວແມ່ນ ລີຫວນ ນັກສຶກສາຈີນທີ່ຮຽນຢູ່ຝະຣັ່ງສົ່ງສຽງເຊື້ອເຊີນຢ່າງອົບອຸ່ນຕໍ່ຄົນຝະຣັ່ງໃນການໂຮມຊຸມນຸມຂອງນັກສຶກສາຈີນຢູ່ປາຣີ,ແລະກໍ່ເປັນສຽງໃນໃຈຂອງຄົນຈີນໝົດທຸກຄົນ.ຖ້າທ່ານຍັງບໍ່ຮູ້ຈີນຫຼາຍປານໃດໃນແຕ່ກ່ອນ,ບໍ່ເປັນຫຍັງ,ແຕ່ນີ້ເປັນຕົ້ນໄປ,ເລີ່ມແຕ່ວັນທີ８ສິງຫາຄືມື້ໄຂງານກິລາໂອລິມປິກປັກກິ່ງເປັນຕົ້ນໄປ,ທ່ານຟັງດ້ວຍຫູ ແລະເບິ່ງດ້ວຍຕາຕົນເອງ,ທ່ານຈະໄດ້ພົບເຫັນຈີນທີ່ແທ້ຈິງ.
|
