ວັນທີ 8 ພຶດສະພານີ້,ທ່ານດີມີຕຣີ ເມັດເວເດັຟ ປະທານາທິບໍດີຣັດເຊຍໄດ້ເຊັນດຳລັດ,ແຕ່ງຕັ້ງທ່ານວະລາດີເມຍ ປູຕີນເປັນນາຍົກລັດຖະມົນຕີລັດຖະບານຊຸດໃໝ່.ນັບມາຮອດປະຈຸບັນ,ອຳນາດການປົກຄອງຂອງຣັດເຊຍໄດ້ສືບກັນຢ່າງໝັ້ນໜຽວ,ສະພາບການໃໝ່ຂອງເວທີການເມືອງຣັດເຊຍເຊິ່ງແມ່ນທ່ານເມັດເວເດັຟກັບທ່ານປູຕີນຮ່ວມກັນກຳອຳນາດນັ້ນໄດ້ມາຮອດແລ້ວ.ແຕ່ນັກວິເຄາະບາງຄົນເຫັນວ່າ,ຖ້າຢາກບັນລຸເປົ້າໝາຍທີ່ຍິ່ງໃຫຍ່ຄື"ຍຸດທະສາດການພັດທະນາແຫ່ງຊາດກ່ອນປີ 2020"ພາຍໃນ 12 ປີຂ້າງໜ້ານີ້ທີ່ທ່ານປູຕີນສະເໜີອອກມາ,ບໍ່ແມ່ນເລື່ອງງ່າຍ,ລັດຖະບານຊຸດໃໝ່ຂອງຣັດເຊຍທີ່ນຳໂດຍທ່ານປູຕີນຈະປະເຊີນກັບບັນຫາແລະສິ່ງທ້າທາຍຫຼາຍອັນ.
ກ່ອນອື່ນ,ແມ່ນເຮັດແນວໃດຈະຮັບມືກັບບັນຫາໄພເງິນເຟີ້ທີ່ມີໃນປະຈຸບັນນີ້.ຕາມການຄາດຄະເນຫຼ້າສຸດຂອງພາກສ່ວນທີ່ກ່ຽວຂ້ອງຂອງຣັດເຊຍ,ປີ 2008,ອັດຕາໄພເງິນເຟີ້ຂອງຣັດເຊຍຈະສູງຮອດ 10%.ຜົນການຢັ່ງປະຊາມະຕິສະແດງໃຫ້ເຫັນວ່າ,ປະຊາຊົນ 62% ເຫັນວ່າ,ລັດຖະບານຄວນສະກັດກັ້ນໄພເງິນເຟີ້,ຫຼຸດລາຄາສິນຄ້າ.ສະນັ້ນ,ຈະຮັກສາການເຕີບໂຕເສດຖະກິດຢ່າງວ່ອງໄວແລະອັດຕາເງິນເຟີ້ສູງທີ່ດຸ່ນດ່ຽງກັນເພື່ອເຮັດໃຫ້ຣັດເຊຍຈະເລີນຄືນໃໝ່ໂດຍໄວ,ຫຼືວ່າຈະຄວບຄຸມບໍ່ໃຫ້ເສດຖະກິດເຕີບໂຕໄວເກີນໄປແລະໃຊ້ມາດຕະການທີ່ສົມຄູ່ກັນເພື່ອສະກັດກັ້ນໄພເງິນເຟີ້,ນີ້ແມ່ນບັນຫາທີ່ຂ້ຽວຂາດກວ່າໝູ່ທີ່ລັດຖະບານປູຕີນຕ້ອງຮັບມືໃນປະຈຸບັນນີ້.
ອີກບັນຫາໜຶ່ງແມ່ນ, ບັນຫາການປະຕິຮູບຊີວິການເປັນຢູ່ປະຊາຊົນໃນສັງຄົມ. ມີຜູ້ຊ່ຽວຊານເຫັນວ່າ, ເຖິງແມ່ນວ່າທ່ານປູຕີນມີຄວາມສາມາດສັງເກດແລະຕັດສິນໃນດ້ານການພັດທະນາເສດຖະກິດກໍຕາມ, ແຕ່ເບິ່ງຈາກດ້ານວິຊາການແລະປະສົບການການເມືອງຂອງທ່ານ, ການປະຕິຮູບຊີວິດການເປັນຢູ່ຂອງປະຊາຊົນແມ່ນຂໍ້ອ່ອນຂອງທ່ານ. ໃນໄລຍະ 8 ປີທີ່ທ່ານປູຕີນເປັນປະທານາທິບໍດີ, ເຄີຍດຳເນີນການທົດລອງດ້ານການປະຕິຮູບຊີວິດການເປັນຢູ່ຂອງປະຊາຊົນຫຼາຍເທື່ອ, ແຕ່ພາຍຫຼັງປະສົບກັບອຸບປະສັກເມື່ອປີ 2005ແລ້ວ, ຂະບວນການປະຕິຮູບຊີວິດການເປັນຢູ່ຂອງປະຊາຊົນເພື່ອແກ້ໄຂບັນຫາການປະກັນສັງຄົມເປັນຕົ້ນຕໍນັ້ນໄດ້ຊ້າລົງຢ່າງເດັ່ນຊັດ. ສະນັ້ນ, ບັນຫາການປະຕິຮູບຊີວິດການເປັນຢູ່ຂອງປະຊາຊົນຈະແມ່ນບັນຫາຫຍຸ້ງຍາກໜຶ່ງທີ່ລັດຖະບານປູຕີນຕ້ອງປະເຊີນ.
ນອກນັ້ນ, ບັນຫາການປ່ຽນແປງໂຄງປະກອບເສດຖະກິດ. ເຖິງແມ່ນວ່າຣັດເຊຍໄດ້ວາງເປົ້າໝາຍຍຸດທະສາດທີ່ພັດທະນາເສດຖະກິດແບບປະດິດສ້າງໃໝ່ຢ່າງຮອບດ້ານ, ແຕ່ຜູ້ຊ່ຽວຊານເຫັນວ່າ, ປັດຈຸບັນ, ເສດຖະກິດຣັດເຊຍຍັງພັດທະນາຕາມຕົວແບບພະລັງງານແລະວັດຖຸຕິບ, ເສດຖະກິດຂອງຣັດເຊຍຈະສາ ມາດກ້າວຂຶ້ນສູ່ເສັ້ນທາງປະດິດສ້າງໃໝ່ຫຼືບໍ່ພາຍຫຼັງປີ 2010 ຍັງຕ້ອງສັງເກດຕໍ່ໄປ. ນອກນີ້ບັນຫາຕ້ານການສໍ້ລາດບັງຫຼວງແລະຍົກສູງປະສິດທິພາບການເຮັດວຽກຂອງລັດຖະບານກໍແມ່ນບັນຫາຫຍຸ້ງຍາກທີ່ລັດຖະບານປູຕີນຕ້ອງປະເຊີນ.
ເວົ້າໂດຍລວມແລ້ວ, ລັດຖະບານຣັດເຊຍຊຸດໃໝ່ຍັງມີໜ້າທີ່ອັນໜັກໜາຫຼາຍ.
|