|
|
 |
| (GMT+08:00)
2008-05-13 18:42:05
|
 |
|
ພາກສ່ວນຕ່າງໆຂອງຈີນຕັ້ງໜ້າຊ່ອຍເຫຼືອມຽນມາກູ້ໄພລົມພາຍຸ
cri
ຫວ່າງມໍ່ໆນີ້, ບາງເຂດຂອງມຽນມາໄດ້ປະສົບໄພລົມພາຍຸແຖບຮ້ອນຮ້າຍແຮງ, ເຮັດໃຫ້ຄົນເສຍຊີວິດແລະບາດເຈັບແລະມີການເສຍຫາຍດ້ານຊັບສິນຢ່າງຫຼວງຫຼາຍ. ພາຍຫຼັງເກີດໄພແລ້ວ, ພາກສ່ວນຕ່າງໆຂອງຈີນໄດ້ຕັ້ງໜ້າໃຫ້ການຊ່ອຍເຫຼືອໃຫ້ແກ່ມຽນມາ, ເພື່ອເຮັດວຽກກູ້ໄພແລະສ້າງສາຄືນໃໝ່.
ວັນທີ 2 ພຶດສະພານີ້, ມຽນມາໄດ້ປະສົບໄພລົມພາຍຸແຖບຮ້ອນ "ນາກິສ", ລົມພາຍຸໄດ້ນຳເອົາຄວາມເສຍຫາຍຢ່າງຫຼວງຫຼາຍມາໃຫ້ເຂດປະສົບໄພ. ວັນທີ 12 ພຶດສະພານີ້, ສື່ມວນຊົນທາງການມຽນມາລາຍງານຂ່າວສະພາບປະສົບໄພຫຼ້າສຸດ, ສະແດງໃຫ້ເຫັນວ່າ, ປະຈຸບັນ, ຈຳນວນຄົນເສຍຊີວິດຍ້ອນລົມພາຍຸແຖບຮ້ອນໄດ້ເພີ່ມຂຶ້ນຮອດ 31938 ຄົນ, ຄົນຫາຍສາບສູນເກືອບ 3 ໝື່ນຄົນ. ໃນຖານະເປັນປະເທດບ້ານໃກ້ເຮືອນຄຽງທີ່ດີຂອງມຽນມາ, ປະຊາຊົນແລະລັດຖະບານຈີນສຸດທີ່ເປັນຫ່ວງເອົາໃຈໃສ່ນຳສະພາບປະສົບໄພຂອງມຽນມາ. ເພື່ອຊ່ອຍເຫຼືອລັດຖະບານແລະປະຊາຊົນມຽນມາຮັບມືກັບໄພພິບັດ, ເມື່ອໄດ້ສະໜອງການຊ່ອຍເຫຼືອສຸກເສີນມູນຄ່າ 1 ລ້ານໂດລາແລ້ວ, ລັດຖະບານຈີນໄດ້ໃຫ້ເງິນຊ່ອຍເຫຼືອອີກ 30 ລ້ານກວ່າຢວນ. ທ່ານຊິນກາງ ໂຄສົກກະຊວງການຕ່າງປະເທດຈີນກ່າວວ່າ, ຈີນຈະສືບຕໍ່ຊ່ອຍເຫຼືອລັດຖະບານແລະປະຊາຊົນມຽນມາກູ້ໄພແລະດຳເນີນວຽກງານສ້າງສາຄືນໃໝ່ຫຼັງປະສົບໄພ. ທ່ານກ່າວວ່າ:
"ຈີນກັບມຽນມາແມ່ນປະເທດບ້ານໃກ້ເຮືອນຄຽງທີ່ດີ, ພວກເຮົາຈະສືບຕໍ່ໃຫ້ການຊ່ອຍເຫຼືອແກ່ມຽນມາ, ເຊື່ອວ່າ, ລັດຖະບານແລະປະຊາຊົນມຽນມາຈະສາມາດຟື້ນຟູຄວາມເສຍຫາຍຈາກໄພລົມພາຍຸໂດຍໄວ, ຟື້ນຟູການຜະລິດແລະຊີວິດການເປັນຢູ່ໃຫ້ປົກກະຕິໂດຍໄວ."
ຂ່າວແຈ້ງວ່າ ເຄື່ອງຊ່ວຍເຫຼືອສຸກເສີນສາມງວດທີ່ລັດຖະບານຈີນສະໜອງໃຫ້ມຽນມານັ້ນໄດ້ຂົນສົ່ງໂດຍທາງອາກາດໄປຮອດນະຄອນຢາງກຸງໄວທີ່ສຸດ.ເຄື່ອງຊ່ວຍເຫຼືອເຫຼົ່ານີ້ລວມທັງຕູບຜ້າເຕັ້ນ ອາຫານ ຢາປົວພະຍາດເຄື່ອງກັ່ນນ້ຳສະອາດເປັນຕົ້ນ.ນອກນີ້,ກອງຊ່ວຍເຫຼືອສຸກເສີນແລະໜ່ວຍແພດຂອງຈີນໄດ້ກຽມພ້ອມແລ້ວຈະໄປມຽນມາເພື່ອດຳເນີນການກູ້ໄພໃນທຸກເວລາ.
ພາຍຫຼັງມຽນມາປະສົບລົມພາຍຸແຖບຮ້ອນແລ້ວ,ສະພາກາແດງຈີນໄດ້ຕັ້ງໜ້າດຳເນີນການຊ່ວຍເຫຼືອ.ທ່ານວາງສ້ຽວຮວາ ຫົວໜ້າພະແນກພົວພັນຂອງສະພາກາແດງຈີນແຈ້ງໃຫ້ຊາບວ່າ,ວັນທີ6ພຶດສະພານີ້,ສະພາກາແດງຈີນໄດ້ໃຫ້ເງິນຊ່ວຍເຫຼືອ 3 ໝື່ນໂດລາໃຫ້ເຂດປະສົບໄພຂອງມຽນມາ,ເຄື່ອງຊ່ວຍເຫຼືອງວດທຳອິດເຊັ່ນມຸ້ງ ຜ້າຫົ່ມຂົນສັດໄດ້ຂົນສົ່ງໄປຮອດເຂດປະສົບໄພຂອງມຽນມາ.
"ພາຍຫຼັງມຽນມາປະສົບໄພແລ້ວ ສະພາກາແດງຈີນໄດ້ມີການເຄື່ອນໄຫວໃນທັນທີ,ຕົກລົງບໍລິຈາກເງິນ 3 ໝື່ນໂດລາໃຫ້ສະພາກາແດງມຽນມາເພື່ອດຳເນີນການກູ້ໄພສຸກເສີນ,ໄດ້ຜ່ານສະຖານທູດຈີນປະຈຳມຽນມາສົ່ງໃຫ້ແລ້ວ, ຈາກນັ້ນ ພວກເຮົາກໍໄດ້ຕົກລົງສະໜອງເຄື່ອງຊ່ອຍເຫຼືອສຸກເສີກ,ເຊັ່ນຖົງນອນ,ມຸ້ງແລະເສື້ອຜ້າເປັນຕົ້ນ,ສ່ວນໃຫຍ່ໄດ້ຂົນສົ່ງໄປແລ້ວ."
ຂ່າວແຈ້ງວ່າ,ໜ່ວຍງານກູ້ໄພທີ່ນຳໂດຍທ່ານວາງໄຫຈິ່ງເລຂາທິການສະພາກາແດງຈີນໄດ້ໄປຮອດມຽນມາພ້ອມກັບເຄື່ອງຊ່ວຍເຫຼືອງວດທີສອງ,ແລະພວມໄປສຳຫຼວດສະພາບປະສົບໄພຢູ່ເຂດປະສົບໄພ.ທ່ານຈະຫາລືກັບສະພາກາແດງມຽນມາເພື່ອວາງແຜນການຊ່ວຍເຫຼືອໃນຂັ້ນຕໍ່ໄປ.
ປະຊາຊົນໃນແຫ່ງຕ່າງໆຂອງຈີນກໍ່ຕັ້ງໜ້າບໍລິຈາກເງິນໃຫ້ເຂດປະສົບໄພມຽນມາ.ທ່ານລິວເວີນຄຸຍ ຮອງເລຂາທິການມູນນິທິຫຼຸດຜ່ອນຄວາມທຸກຍາກຂອງຈີນກ່າວວ່າ,ພາຍ ຫຼັງມຽນມາປະສົບໄພທຳມະຊາດແລ້ວ,ມູນນິທິຫຼຸດຜ່ອນຄວາມທຸກຍາກຂອງຈີນໄດ້ລິເລີ່ມ ກິດຈະກຳກອບກູ້ຊ່ວຍເຫຼືອທີ່ມີຊື່ວ່າ "ຢູ່ນຳກັນກັບເຈົ້າ",ແລະໄດ້ຮັບການຕອບຮັບຢ່າງກວ້າງຂວາງຈາກວົງການຕ່າງໆຂອງຈີນ,ທ່ານກ່າວວ່າ:"ພວກເຮົາຫວັງວ່າຜ່ານການບໍລິ ຈາກເງິນແລະເຄື່ອງຊ່ວຍເຫຼືອຂອງວົງການຕ່າງໆຂອງຈີນ,ຈະສາມາດໃຊ້ເຂົ້າໃນການກູ້ໄພສຸກເສີນເພື່ອຊ່ວຍຊີວິດການເປັນຢູ່ຂອງຜູ້ປະສົບໄພ,ປະຈຸບັນນີ້ວົງການຕ່າງໆມີການຕອບຮັບຢ່າງຕັ້ງໜ້າທີ່ສຸດ.ນັບມາຮອດປະຈຸບັນນີ້ເຄື່ອງຊ່ວຍເຫຼືອທີ່ບໍລິຈາກມີອາຫານເດັກ5ແສນໂດລາ ຢາປົວພະຍາດ1ລ້ານຢວນແລະເຄື່ອງກັ່ນນ້ຳສະອາດ40ໜ່ວຍເປັນ ຕົ້ນ,ອຸປະກອນເຫຼົ່ານີ້ແຕ່ລະມື້ສາມາດຊ່ວຍຜູ້ປະສົບໄພຫຼາຍແສນຄົນໃຫ້ມີນ້ຳສະອາດກິນ.
ປະຈຸບັນນີ້,ວົງການຕ່າງໆຂອງຈີນພວມເລັ່ງລັດຫ້າງຫາເງິນທຶນແລະເຄື່ອງຊ່ວຍເຫຼືອ, ພະຍາຍາມສົ່ງໄປຮອດມຽນມາໂດຍໄວເທົ່າທີ່ຈະໄວໄດ້,ເພື່ອຊ່ວຍເຫຼືອກູ້ໄພແລະສ້າງ ສາຄືນໃໝ່.
|
|
|
