ອາສາສະໝັກກວາງໂຈວຕ້ອນຮັບເອຊຽນເກມດ້ວຍຮອຍຍິ້ມ
(GMT+08:00) 2010-11-11 16:58:11 cri
ງານມະຫະກຳກິລາອາຊີຫຼືເອຊຽນເກມຄັ້ງທີ 16 ຈະຈັດຂຶ້ນຢູ່ນະຄອນກວາງໂຈວ ພາກໃຕ້ຂອງຈີນໃນໄວໆນີ້. ເວົ້າສຳລັບຕົວເມືອງແລ້ວ, ບໍ່ວ່າທິວທັດຈະສວຍງາມປານໃດກໍ່ບໍ່ທໍ່ຮອຍຍິ້ມທີ່ສົດໃສ. ກວາງໂຈວໃນເດືອນພະຈິກຈະມີອາສາສະໝັກຫຼາຍແສນຄົນຈະບອກໃຫ້ໂລກຮູ້ດ້ວຍຮອຍຍີ້ມທີ່ຈິງໃຈວ່າ, ກວາງໂຈວຈະສວຍງາມຂະໜາດໃດ
ເພງອາສາສະໝັກຂອງເອຊຽນເກມກວາງໂຈວມີເນື້ອເພງວ່າ: ມານຳກັນເຖີດເພື່ອຄວາມດີເດັ່ນ, ຢ່າພາດເວທີແຫ່ງຄວາມຝັນ. ມາຮ້ອງເພງຮ່ວມກັນ, ເພື່ອໃຫ້ໄວໜຸ່ມມີຄວາມສົດໃສ." ຕາມຕົວເລກ, ຈຳນວນຄົນທີ່ສະໝັກເປັນອາສາສະໝັກຂອງເອຊຽນເກມແລະເອຊຽນເກມຄົນພິການມີເຖິງ 1 ລ້ານ 5 ແສນກວ່າຄົນ, ແຕ່ວ່າຄັດເລືອກເອົາຕົວຈິງພຽງແຕ່ 1/3 ຂອງຈຳນວນນີ້ເທົ່ານັ້ນ.
ເວົ້າສະເພາະແຕ່ປະຊາຊົນກວາງໂຈວແລ້ວ, ຄຳເວົ້າທີ່ວ່າ"ອາສາສະໝັກ"ແມ່ນບໍ່ແປກເລີຍ. ໃນງານກິລາຄົນພິການທົ່ວປະເທດຈີນຄັ້ງທີ 3 ທີ່ຈັດຢູ່ກວາງໂຈວໃນປີ 1992 ກໍ່ມີຄົນທີ່ເຮັດວຽກບໍ່ຫວັງສິ່ງຕອບແທນ, ຄົນກຸ່ມນີ້ໄດ້ກາຍເປັນອາສາສະໝັກໃນປະຈຸບັນ. ໂດຍທຽບກັບ 18 ປີກ່ອນ, ການແບ່ງງານຂອງອາສາສະໝັກໃນປະຈຸບັນຈະລະອຽດກວ່າ, ນອກຈາກອາສາສະໝັກທີ່ບໍລິການໃຫ້ນັກກິລາໃນສະໜາມກິລາຕ່າງໆແລ້ວ, ຍັງມີອາສາສະໝັກທີ່ມີໜ້າທີ່ຕ່າງກັນຢູ່ແຫ່ງຕ່າງໆຄືສູນຂ່າວແລະບ້ານນັກກິລາ.
ນາງມາລານຈີຈາກຄະນະພາສາສາດປີທີ 4 ຂອງມະຫາວິທະຍາໄລຈົ່ງຊານກວາງໂຈວກໍ່ແມ່ນອາສາສະໝັກຜູ້ໜຶ່ງທີ່ຮັບຕ້ອນແຂກຕ່າງປະເທດຂອງເອຊຽນເກມຄັ້ງນີ້, ນາງຈະຮັບຜິດຊອບແປພາສາ:
"ນ້ອງຈະຍົກສູງລະດັບພາສາອັງກິດຂອງນ້ອງ, ເວົ້າພາສາອັງກິດໃຫ້ຫຼ່ຽນໄຫຼກວ່າເກົ່າ, ນອກນັ້ນ, ນ້ອງຍັງຈະຮຽນຮູ້ລະບຽບການດ້ານການຮັບແຂກຮັບຄົນ, ເພື່ອເຮັດໃຫ້ການບໍລິການຍິ່ງດີກວ່າເກົ່າແລະມີປະສິດທິພາບກວ່າເກົ່າ."
ການຍົກສູງລະດັບການບໍລິການບໍ່ພຽງແຕ່ແມ່ນຄວາມຮຽກຮ້ອງຕໍ່ຕົນເອງຂອງນາງມາລານຈືທໍ່ນັ້ນ, ແຕ່ຍັງແມ່ນຄວາມຄອງຄອຍຂອງອາສາສະໝັກກວາງໂຈວໝົດທຸກຄົນທີ່ມີຕໍ່ຕົນເອງ. ເພື່ອໃຫ້ອາສາສະໝັກຮູ້ແຈ້ງເນື້ອໃນການບໍລິການຂອງຕົນ, ເຂົ້າໃຈຄວາມແຕກແຍກກັນດ້ານວັດທະນະທຳຂອງປະເທດແລະເຂດແຄວ້ນຕ່າງໆ, ຄະນະຈັດຕັ້ງເອຊຽນເກມໄດ້ຈັດການຝຶກຊ້ອມສະເພາະຕໍ່ອາສາສະໝັກທັງຫຼາຍທີ່ບໍລິການໃນງານເອຊຽນເກມແລະເອຊຽນເກມຄົນພິການ, ແລະໄດ້ແຈກຢາຍຫຼັກສູດການສອນສະເພາະໃຫ້ເຂົາເຈົ້ານຳອີກ.
ເອຊຽນເກມບໍ່ພຽງແຕ່ໄດ້ດຶງດູດປະຊາຊົນກວາງໂຈວເຂົ້າຮ່ວມທໍ່ນັ້ນ, ຍັງມີຄົນຕ່າງປະເທດທີ່ມາຈາກປະເທດແລະເຂດແຄວ້ນຕ່າງໆໃນອາຊີ. ນາງຢັນຊັນອາແມ່ນຄົນສ.ເກົາຫລີ, ຫຼາຍເດືອນກ່ອນໄປຮຽນພາສາຈີນຢູ່ກວາງໂຈວ, ປະຈຸບັນນາງໄດ້ກາຍເປັນອາສາສະໝັກເອຊຽນເກມກວາງໂຈວແລ້ວ. ນາງເວົ້າວ່າ, ໃນເວລາຈັດເອຊຽນເກມປູຊານ2002ຢູ່ສ.ເກົາຫຼີນັ້ນ, ນາງຍັງນ້ອຍຢູ່, ສະນັ້ນຈຶ່ງຈື່ບໍ່ໄດ້ດີປານໃດ, ເອຊຽນເກມກວາງໂຈວຈຶ່ງແມ່ນຈຸດເລີ່ມຕົ້ນວຽກຮັບໃຊ້ເອຊຽນເກມຂອງນາງ.
"ນ້ອງຊື່ຢັນຊັນອາແມ່ນອາສາສະໝັກຈາກສ.ເກົາຫລີ, ຍ້ອນພໍ່ແມ່ມັກເອຊຽນເກມຫຼາຍ, ສະນັ້ນນ້ອງກໍ່ມັກຄືກັນ. ໃນຖານະທີ່ເປັນຄົນອາຊີ, ນ້ອງກໍ່ຢາກປະກອບສ່ວນເຂົ້າໃນເອຊຽນເກມ. ນ້ອງມາກວາງໂຈວພໍດີຖືກກັບເວລາຈັດເອຊຽນເກມ, ສະນັ້ນນ້ອງກໍ່ຢາກເຂົ້າຮ່ວມ."
ອາສາສະໝັກຕ່າງປະເທດເຫຼົ່ານີ້, ເຖິງວ່າເວົ້າພາສາຈີນບໍ່ເກັ່ງປານໃດ, ແລະກໍ່ບໍ່ຮູ້ສະພາບຄົມມະນາຄົມຂອງກວາງໂຈ່ວດີປານໃດ, ແຕ່ນາງເຊີນ, ຄົນກວາງໂຈ່ວເວົ້າວ່າ, ເຂົາເຈົ້າໄດ້ຄວາມຮູ້ສຶກທີ່ດີໆໃໝ່ໆ, ພິເສດຫຼາຍ.
"ມີຄົນຕ່າງປະເທດເຂົ້າຮ່ວມການບໍລິການເອຊຽນເກມ, ຂ້ອຍຮູ້ສຶກວ່າພູມໃຈຫຼາຍ."
ຫຼາຍຄົນຄຶດວ່າ, ອາສາສະໝັກສ່ວນຫຼາຍແມ່ນຊາວໜຸ່ມ. ແຕ່ແມ່ເຖົ້າຊ້ຽງຢຸ້ນຮວາ, ທີ່ອາຍຸ 81 ປີແລ້ວກັບຜົວຂອງເພິ່ນ, ບອກວ່າ, ຖ້າມີຄວາມຕັ້ງໃຈແມ່ເຖົ້າ, ອາຍຸຫຼາຍກໍ່ບໍ່ມີບັນຫາ.
"ເປັນຫຍັງຈຶ່ງເອີ້ນວ່າອາສາສະໝັກ, ຂໍແຕ່ແມ່ນສິ່ງທີ່ແມ່ເຖົ້າເຮັດໄດ້, ແມ່ເຖົ້າກໍ່ຈະເຮັດຢ່າງສຸດຂີດ."
ດຽວນີ້, ຢູ່ປ້າຍລົດເມທຸກແຫ່ງຂອງກວາງໂຈ່ວ, ຈະໄດ້ເຫັນເຄື່ອງໝາຍບໍລິການຂອງອາສາສະໝັກທີ່ເປັນຮູບນີ້ວໂປ້, ຢູ່ບ່ອນທີ່ມີຄົນໄປມາຫຼາຍ, ກໍ່ຈະເຫັນ "ສະຖານີຊີວິດໃໝ່" ເຊິ່ງເປັນບ່ອນບໍລິການຂອງອາສາສະໝັກ, ຄົນທັງຫຼາຍເອີ້ນວ່າ "ເຮືອນນ້ອຍຊີ່ກ່ວນ", ອາສາສະໝັກຈະອຳນວຍຄວາມສະດວກດ້ານຕ່າງໆໃຫ້ແຂກຄົນທັງຫຼາຍ, ເຊັ່ນ: ບອກທາງ, ແປພາສາແລະອື່ນໆ.
ຢູ່ກວາງໂຈ່ວ, ແຕ່ລະຄົນມີຄວາມມັກຕ່າງກັນຕໍ່ການເຮັດວຽກອາສາສະໝັກ. ບາງຄົນບອກທາງໃຫ້ຄົນຕ່າງປະເທດດ້ວຍພາສາຕ່າງປະເທດ, ບາງຄົນຮັກສາຄວາມສະຫງົບ, ຍັງມີບາງຄົນອາສາສະໝັກໄປບໍລິການຜູ້ອື່ນດ້ວຍຄວາມມັກຂອງຕົນ. ທ່ານຫຼີຊົ່ງຮຸ່ຍ, ຜູ້ແລ່ນເກີບລໍ້ເກັ່ງກ່າວວ່າ, ໂຄສະນາກິລາແລ່ນເກີບລໍ້ໃຫ້ດີ, ແມ່ນເປົ້າໝາຍຂອງການບໍລິການຂອງລາວ.
"ຂ້ອຍຫວັງຢາກໃຫ້ຫຼາຍໆຄົນຫຼິ້ນກິລານີ້ນຳກັນ. ເພາະວ່າ, ຄົນ ຫຼິ້ນກິລານີ້ນຳກັນຫຼາຍຂຶ້ນແລ້ວກໍມີສຸຂະພາບແຂງແຮງກວ່າເກົ່ານີ້ແມ່ນຄວາມຝັນຂອງຂ້ອຍ. ໃນເວລາຂ້ອຍຫຼິ້ນຜູ້ດຽວ, ຂ້ອຍກໍ່ມີຄວາມຫວັງຫຼາຍທີ່ສຸດວ່າ ຢາກໃຫ້ຄົນທັງຫຼາຍມາຫຼິ້ນຮ່ວມກັນ."
ຫວ່າງກ່ອນນີ້ບໍ່ດົນ, ໃນພິທີເລີ່ມຕົ້ນວັນກິດຈະກຳທົ່ວປວງຊົນຂອງນະຄອນກວາງໂຈ່ວ, ທ່ານຈ່າງກວາງນີງ, ເຈົ້າໜ້າທີ່ອົງການປົກຄອງນະຄອນກວາງໂຈ່ວກ່າວວ່າ, ອາສາສະໝັກຂອງນະຄອນກວາງໂຈ່ວມີບັນຍາກາດຟົດຟື້ນຫຼາຍ.
"ທົ່ວນະຄອນກວາງໂຈ່ວ, ມີບັນຍາກາດຟົດຟື້ນຫຼາຍທີ່ຢາກເປັນອາສາສະໝັກ, ຄຳນັບແບບອາສາສະໝັກ, ນັບເວລາຖອຍຫຼັງສູ່ເອຊຽນເກມ, ຮ້ອງເພງອາສາສະໝັກ. "ເຄື່ອນໄຫວຮ່ວມກັນ, ດີເດັ່ນກວ່າເກົ່າ" ຈະກາຍເປັນຄຳຂວັນອາສາສະໝັກທີ່ມ່ວນທີ່ສຸດແລະດັງທີ່ສຸດຢູ່ນະຄອນກວາງໂຈ່ວ."
ກວາງໂຈ່ວໃນປີ 2010, ອາສາສະໝັກຈະຕ້ອນຮັບແຂກດ້ວຍຮອຍຍີ້ມທີ່ງົດງາມທີ່ສຸດ.
(ຈົບ)