ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕາມຂ່າວ CRI: ວັນທີ 11 ມິຖຸນານີ້ໃນໂອກາດໃຫ້ສຳພາດຕໍ່ນັກຂ່າວ CRI ຢູ່ນະຄອນຫຼວງພະນົມເປັນປະເທດກຳປູເຈຍ, ທ່ານເອັກຊຳໂອ ປະທານສະມາຄົມມິດຕະພາບກຳປູເຈຍ-ຈີນໄດ້ຕີລາຄາສູງຕໍ່ໝາກຜົນຂອງກອງປະຊຸມສຸດຍອດຊິ່ງຕາວຂອງອົງການຮ່ວມມືຊຽງໄຮ. ທ່ານກ່າວວ່າໄດ້ເອົາໃຈໃສ່ຕິດຕາມຢ່າງສູງຕໍ່ “ບັນດາຝ່າຍໄດ້ຕົກລົງຮ່ວມກັນກ່ຽວກັບຄວາມເປັນເອກະພາບ 6 ດ້ານ” ທີ່ທ່ານສີຈິ້ນຜິງ ປະທານປະເທດຈີນແຈ້ງໃຫ້ຮູ້ໃນວັນທີ 10 ມິຖຸນານີ້, ທ່ານເຫັນວ່າ, “ຄວາມເປັນເອກະພາບ 6 ດ້ານ” ດັ່ງກ່າວມີຄວາມໝາຍສຳຄັນທີ່ສຸດ.
ໃນໂອກາດແຈ້ງຜົນສຳເລັດຂອງກອງປະຊຸມສຸດຍອດຊິ່ງຕາວຂອງອົງການຮ່ວມມືຊຽງໄຮໃນວັນທີ 10 ມິຖຸນານີ້, ທ່ານສີຈິ້ນຜິງ ກ່າວວ່າ, ພວກເຮົາມີຄວາມເຫັນເປັນເອກະພາບກັນວ່າ, ໂລກປັດຈຸບັນພວມຢູ່ໃນຍຸດສະໄໝທີ່ພັດທະນາໃຫຍ່, ມີການປ່ຽນແປງໃຫຍ່ແລະການປັບປຸງໃຫຍ່, ໜ່ວຍໂລກຫັນເປັນຫຼາຍຂົ້ວ, ເສດຖະກິດໂລກາພິວັດພັດທະນາກ້າວສູ່ລວງເລິກ, ປະເທດຕ່າງໆອາໄສກັນແໜ້ນແຟ້ນກວ່າເກົ່າ. ພວກເຮົາມີຈຸດຢືນຮ່ວມກັນວ່າ, ຄວາມໝັ້ນຄົງແມ່ນພື້ນຖານການພັດທະນາຂອງອົງການຮ່ວມມືຊຽງໄຮແບບຍືນຍົງ. ພວກເຮົາຮ່ວມກັນຊີ້ໃຫ້ເຫັນວ່າ, ເສດຖະກິດໂລກາພິວັດແລະເຊື່ອມໂຍງພາກພື້ນເຂົ້າກັນແມ່ນທ່າອ່ຽງຂອງສາກົນ. ພວກເຮົາຮ່ວມກັນກ່າວເນັ້ນວ່າ, ປະຫວັດສາດອັນຍາວນານແລະວັດທະນະທຳທີ່ສະຫງ່າງາມແມ່ນຊັບສົມບັດຮ່ວມກັນຂອງມວນມະນຸດ. ພວກເຮົາລ້ວນແຕ່ເຫັນວ່າ, ອົງການຮ່ວມມືຊຽງໄຮເປີດກວ້າງການໄປມາຫາສູ່ກັນແລະການຮ່ວມມືສາກົນສຳຄັນທີ່ສຸດ. ພວກເຮົາຮ່ວມກັນຕົກລົງໃຫ້ປະເທດກຽກກິດສະຖານດຳລົງຕຳແໜ່ງເປັນປະເທດປະທານໝູນວຽນຂອງອົງການຮ່ວມມືຊຽງໄຮຫຼັງກອງປະຊຸມສຸດຍອດຄັ້ງນີ້.
ທ່ານເອັກຊຳໂອ ກ່າວຕື່ມວ່າ, ຢາກບັນລຸເສດຖະກິດໂລກາພິວັດແລະການເຊື່ອມຍົງພາກພື້ນເຂົ້າກັນ, ປະເທດທີ່ກ່ຽວຂ້ອງຂອງອົງການຮ່ວມມືຊຽງໄຮຄວນດຳເນີນການຮ່ວມມືຢ່າງໃກ້ຊິດກວ່າເກົ່າ, ເພີ່ມທະວີການແລກປ່ຽນແລະປະສານງານກັນ. ທ່ານກ່າວວ່າ, ເບິ່ງຈາກໝາກຜົນຂອງກອງປະຊຸມສຸດຍອດຄັ້ງນີ້ແລ້ວ, ປະເທດສະມາຊິກຕ່າງໆລ້ວນແຕ່ເຫັນຄວາມສຳຄັນຂອງການເປີດກວ້າງການໄປມາຫາສູ່ກັນແລະການຮ່ວມມືສາກົນ. ກຳປູເຈຍໃນຖານະເປັນຄູ່ເຈລະຈາຂອງອົງການຮ່ວມມືຊຽງໄຮ, ຫວັງວ່າຈະສາມາດລົງເລິກການຮ່ວມມືກັບປະເທດທີ່ກ່ຽວຂ້ອງຕື່ມອີກ, ຮ່ວມກັນວາງແຜນພັດທະນາໃນອະນາຄົດ.
ຄຳເຫັນ
0