ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ກອງປະຊຸມລະດັບລັດຖະມົນຕີຄັ້ງທີ 8 ຂອງເວທີປຶກສາຫາລືການຮ່ວມມືຈີນ-ອາຣັບໄດ້ໄຂຂຶ້ນຢູ່ຫໍສະພາປະຊາຊົນແຫ່ງຊາດທີ່ປັກກິ່ງໃນວັນທີ 10 ກໍລະກົດນີ້. ທ່ານ ສີຈິ້ນຜິງ ປະທານປະເທດຈີນໄດ້ເຂົ້າຮ່ວມພິທີໄຂກອງປະຊຸມແລະກ່າວປາໄສທີ່ສຳຄັນທີ່ພາດຫົວເລື່ອງວ່າ “ພ້ອມກັນຊຸກຍູ້ການພົວພັນຄູ່ຮ່ວມຍຸດທະສາດຈີນ-ອາຣັບໃນຍຸກໃໝ່”,ແລະໄດ້ປະກາດວ່າຈີນແລະອາຣັບມີຄວາມເຫັນຢ່າງເປັນເອກະພາບທີ່ຈະສ້າງການພົວພັນຄູ່ຮ່ວມຍຸດທະສາດຈີນ-ອາຣັບທີ່ຮ່ວມມືຮອບດ້ານ,ພັດທະນາຮ່ວມກັນແລະຫັນໜ້າສູ່ອະນາຄົດ.
ທ່ານ ສີຈິ້ນຜິງ ກ່າວເນັ້ນວ່າ, ຈີນລິເລີ່ມໃຫ້ຮ່ວມກັນສ້າງ “ໜຶ່ງແລວໜຶ່ງເສັ້ນທາງ”, ແລະໄດ້ຮັບການສະໜັບສະໜູນຢ່າງກວ້າງຂວາງແລະເຂົ້າຮ່ວມຢ່າງຕັ້ງໜ້າຈາກປະຊາຄົມໂລກຊຶ່ງລວມທັງປະເທດອາຣັບ. ປະເທດອາຣັບຕັ້ງຢູ່ແຖບເຊື່ອມຕໍ່“ໜຶ່ງແລວໜຶ່ງເສັ້ນທາງ”,ແມ່ນຄູ່ຮ່ວມມືທຳມະຊາດໃນການຮ່ວມກັນສ້າງ“ໜຶ່ງແລວໜຶ່ງເສັ້ນທາງ”. ການສ້າງ “ໜຶ່ງແລວໜຶ່ງເສັ້ນທາງ” ໄດ້ຊຸກຍູ້ການຂະຫຍາຍສາຍພົວພັນລະຫວ່າງຈີນ-ອາຣັບຢ່າງຮອບດ້ານ,ການຮ່ວມມືຮອບດ້ານລະຫວ່າງສອງຝ່າຍໄດ້ເຂົ້າສູ່ໄລຍະໃໝ່. ຈີນຍິນດີຮ່ວມກັບຝ່າຍອາຣັບເພີ່ມທະວີການເຊື່ອມຕໍ່ທາງຍຸດທະສາດແລະການເຄື່ອນໄຫວ,ຮ່ວມກັນຊຸກຍູ້ການສ້າງ “ໜຶ່ງແລວໜຶ່ງເສັ້ນທາງ”,ຮ່ວມກັນເປັນຜູ້ປົກປັກຮັກສາສັນຕິພາບແລະສະຖຽນລະພາບຂອງຕາເວັນອອກກາງ,ຜູ້ປົກປ້ອງຄວາມຍຸຕິທຳແລະຄວາມເປັນທຳ,ຜູ້ຊຸກຍູ້ການພັດທະນາຮ່ວມກັນແລະເປັນເພື່ອນມິດທີ່ດີໃນການຖອດຖອນບົດຮຽນເຊິ່ງກັນແລະກັນ.
ທ່ານ ສີຈິ້ນຜິງ ເນັ້ນອີກວ່າ: ເວທີປຶກສາຫາລືການຮ່ວມມືຈີນ-ອາຣັບຈະສາມາດເສີມຂະຫຍາຍບົດບາດຢ່າງໃຫຍ່ໃນການດຳເນີນການເຈລະຈາແລະເພີ່ມທະວີການຮ່ວມມື. ຄວນສອດຄ່ອງກັບສະພາບການຂະຫຍາຍສາຍພົວພັນລະຫວ່າງຈີນ-ອາຣັບໃນຍຸກໃໝ່,ການສ້າງເວທີປຶກສາຫາລືຄວນມີສະພາບການໃໝ່ແລະມີບົດບາດໃໝ່. ຄວນເຮັດໃຫ້ແນວຄິດລະຫວ່າງສອງຝ່າຍມີການເຊື່ອມໂຍງເຂົ້າກັນໃຫ້ຫຼາຍກວ່າເກົ່າໂດຍຜ່ານການເພີ່ມທະວີການແລກປ່ຽນກັນ. ຫວັງວ່າພວກເຮົາສາມາດເສີມຂະຫຍາຍຈິດໃຈເສັ້ນທາງສາຍໄໝ, ກ້າວເດີນເທື່ອລະບາດກ້າວເພື່ອບັນລຸເປົ້າໝາຍຂອງຕົນ, ທຳຄວາມພະຍາຍາມຢ່າງບໍ່ລົດລະເພື່ອບັນລຸໃຫ້ຊົນຊາດຈີນ-ອາຣັບພັດທະນາຈະເລີນຍິ່ງໆຂຶ້ນ,ຊຸກຍູ້ການສ້າງຄູ່ຮ່ວມຜົນປະໂຫຍດແລະຄູ່ຮ່ວມຊາຕາກຳຈີນ-ອາຣັບ.
ຄຳເຫັນ
0