ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
CRI ລາຍງານວ່າ: ວັນທີ 10 ກໍລະກົດນີ້, ຢູ່ນະຄອນຫຼວງກົວລາລຳເປີ ປະເທດມາເລເຊຍ, ທ່ານນາງເຢວບີຢິນ ລັດຖະມົນຕີກະຊວງພະລັງງານ,ເຕັກໂນໂລຊີ, ວິທະຍາສາດ,ການປ່ຽນແປງດິນຟ້າອາກາດແລະສິ່ງແວດລ້ອມມາເລເຊຍໄດ້ຢືນຢັນວ່າ, ລັດຖະບານມາເລເຊຍຊຸດໃໝ່ຫວັງຢ່າງຍິ່ງຈະຮ່ວມກັບຈີນຮັກສາສາຍພົວພັນມິດຕະພາບລະຫວ່າງສອງປະເທດ.
ທ່ານນາງເຢວບີຢິນ ກ່າວໃນໂອກາດປະກອບຄຳເຫັນໃນເວທີປຶກສາຫາລືການຮ່ວມມືໃຕ້ໃຕ້ໃນຍຸກໃໝ່ຂອງອາຊີ ທີ່ຈັດຂຶ້ນຢູ່ມະຫາວິທະຍາໄລມາເລເຊຍວ່າ, ມາເລເຊຍແລະຈີນຄວນປະຕິບັດຕາມຫຼັກການທີ່ໄວ້ເນື້ອເຊື່ອໃຈກັນ,ເຄົາລົບເຊິ່ງກັນແລະກັນແລະຕ່າງຝ່າຍຕ່າງມີຜົນປະໂຫຍດເພື່ອບັນລຸເປົ້າໝາຍໃຫ້ຕ່າງຝ່າຍຕ່າງໄດ້ຮັບຜົນປະໂຫຍດນຳກັນ. ທ່ານນາງເຢວບີຢິນມີຂໍ້ສະເໜີວ່າ, ວິສາຫະກິດຂອງສອງປະເທດສາມາດຮ່ວມກັນຄົ້ນຄວ້າການຫັນເຕັກໂນໂລຊີໃຫ້ເປັນສິນຄ້າ ທັງສ້າງຕັ້ງສູນອຸດສາຫະກຳເພື່ອສ້າງໂອກາດວຽກເຮັດງານທຳໃຫ້ແຕ່ລະປະເທດຫຼາຍຂຶ້ນຕື່ມ. ຂະນະດຽວກັນ, ສອງປະເທດຄວນເພີ່ມທະວີການແລກປ່ຽນດ້ານວິຊາການແລະການຮ່ວມມືໃນຂົງເຂດວິທະຍາສາດເຕັກນິກ,ການອະນຸລັກສິ່ງແວດລ້ອມກໍຄືບັນດາປະເທດໃນອາຊີຮັບມືກັບບັນຫາການປ່ຽນແປງຂອງດິນຟ້າອາກາດແລະອື່ນໆ. ນອກນີ້, ນາງຍັງຫວັງໃຫ້ວິສາຫະກິດມາເລເຊຍແລະຈີນຕັ້ງໜ້າຊຸກຍູ້ການລົງທຶນແບບຕ່າງຝ່າຍຕ່າງມີຜົນປະໂຫຍດເພື່ອຍົກສູງກຳລັງແຂ່ງຂັນແລະບັນລຸເປົ້າໝາຍພັດທະນາຮ່ວມກັນ.
ຄຳເຫັນ
0