ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ກອງປະຊຸມປາງລົງສະຕະວັດທີ 21 ຄັ້ງທີ 3 ແລະກອງປະຊຸມສັນຕິພາບສະຫະພາບມຽນມາໄດ້ຈັດຂຶ້ນຢູ່ນະຄອນຫຼວງເນປີດໍ ປະເທດມຽນມາໃນວັນທີ 11 ກໍລະກົດນີ້ໂດຍມີຜູ້ແທນບັນດາຝ່າຍເຊັ່ນ ລັດຖະບານ, ກອງທັບ, ກຸ່ມປະກອບອາວຸດຊົນເຜົ່າທ້ອງຖິ່ນ, ລັດຖະສະພາ,ບັນດາພັກການເມືອງ, ອົງການຈັດຕັ້ງທາງສັງຄົມ, ຜູ້ສັງເກດ ແລະຜູ້ກ່ຽວຂ້ອງອື່ນໆ 1000 ກວ່າຄົນ ເຂົ້າຮ່ວມ. ໃນນີ້, ກຸ່ມປະກອບອາວຸດຊົນເຜົ່າທ້ອງຖິ່ນທີ່ຮ່ວມປະຊຸມລວມທັງກຸ່ມປະກອບອາວຸດ 10 ກຸ່ມທີ່ໄດ້ລົງນາມໃນສັນຍາຢຸດຍິງທົ່ວປະເທດແລະ 7 ກຸ່ມທີ່ບໍ່ທັນໄດ້ລົງນາມໃນສັນຍາ.
ໃນເວລາປະກອບຄຳເຫັນໃນພິທີເປີດກອງປະຊຸມ, ທ່ານນາງອ໋ອງຊານຊູຈີ ທີ່ປຶກສາແຫ່ງລັດມຽນມາໄດ້ຮຽກຮ້ອງໃຫ້ບັນດາຝ່າຍຈົ່ງສາມັກຄີແລະພະຍາຍາມຮ່ວມກັນເພື່ອບັນລຸຄວາມປອງດອງຊາດແລະສັນຕິພາບ. ກອງປະຊຸມຄັ້ງນີ້ຈະດຳເນີນໄປເປັນເວລາ 6 ວັນ, ຄາດວ່າຈະເປີດເຜີຍເນື້ອໃນສັນຍາສະຫະພາບມຽນມາສະບັບໃໝ່ໃນວັນທີ 16 ກໍລະກົດນີ້.
ກ່ອນກອງປະຊຸມໄຂຂຶ້ນ, ທ່ານຊຸນໂກວສຽງ ທູດພິເສດວຽກງານອາຊີກະຊວງການຕ່າງປະເທດຈີນທີ່ຖືກເຊີນເຂົ້າຮ່ວມກອງປະຊຸມນັ້ນຢືນຢັນວ່າ ໃນຖານະເປັນໝູ່ເພື່ອນທີ່ດີຂອງມຽນມາ, ຈີນຫວັງຈະໄດ້ເຫັນຂະບວນການສັນຕິພາບມຽນມາມີຄວາມຄືບໜ້າໄປຢ່າງບໍ່ຢຸດຢັ້ງ. ຈີນຈະສືບຕໍ່ທຳຄວາມພະຍາຍາມຈົນສຸດຄວາມສາມາດເພື່ອສະໜັບສະໜູນແລະຊ່ວຍເຫຼືອມຽນມາໃຫ້ບັນລຸສັນຕິພາບໂດຍໄວ.
ຄຳເຫັນ
0