ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ເພື່ອເປັນການຕອບໂຕ້ໃນເລື່ອງທີ່ອາເມຣິກາຮ້ອງຟ້ອງຕໍ່ໜ່ວຍງານແກ້ໄຂຂໍ້ຂັດແຍ້ງຂອງອົງການການຄ້າໂລກ ຫຼື WTO ໃນກໍລະນີທີ່ຈີນໃຊ້ມາດຕະການຕອບໂຕ້ມາດຕາ 232 ຂອງອາເມຣິກາສຳລັບຜະລິດຕະພັນເຫຼັກກ້າແລະອາລູມີນຽມ, ເຈົ້າໜ້າທີ່ກະຊວງການຄ້າຈີນ ໄດ້ຖະແຫຼງໃນວັນທີ 18 ກໍລະກົດນີ້ ໂດຍຊີ້ໃຫ້ເຫັນວ່າ: ມາດຕະການຂອງຈີນເປັນມາດຕະການຊອບທຳ ແລະກໍສອດຄ່ອງກັບກະຕິກາການຄ້າຫຼາຍຝ່າຍ, ອາເມຣິກາຄວນຢຸດຕິການໃຊ້ມາດຕະການຈຳກັດທີ່ຝືນກັບກະຕິກາຂອງອົງການການຄ້າໂລກໂດຍໄວ.
ວັນທີ 16 ກໍລະກົດນີ້, ອາເມຣິກາໄດ້ຮ້ອງຟ້ອງຈີນຕໍ່ໜ່ວຍງານແກ້ໄຂຂໍ້ຂັດແຍ້ງຂອງອົງການການຄ້າໂລກ ໂດຍຊີ້ວ່າ: ລັດຖະບານຈີນໃຊ້ມາດຕະການຕອບໂຕ້ມາດຕາ 232 ຂອງອາເມຣິກາສຳລັບຜະລິດຕະພັນເຫຼັກກ້າແລະອາລູມີນຽມນັ້ນບໍ່ສອດຄ່ອງກັບກະຕິກາທີ່ກ່ຽວຂ້ອງຂອງອົງການການຄ້າໂລກ. ເຈົ້າໜ້າທີ່ກົມສົນທິສັນຍາແລະກົດໝາຍ ກະຊວງການຄ້າຈີນ ຈຶ່ງໄດ້ມີຄຳຖະແຫຼງເພື່ອເປັນການຕອບໂຕ້ ໂດຍຊີ້ໃຫ້ເຫັນວ່າ: ມາດຕາ 232 ຂອງອາເມຣິກາທີ່ປະຕິບັດຕໍ່ຜະລິດຕະພັນເຫຼັກກ້າແລະອາລູມີນຽມ ໄດ້ຖືເອົາ “ຄວາມໝັ້ນຄົງແຫ່ງຊາດ” ເປັນຂໍ້ອ້າງນັ້ນ ຄວາມຈິງພັດເປັນການກະທຳປົກປ້ອງການຄ້າ ເຊິ່ງເປັນການຮັບຮູ້ທີ່ເປັນເອກະພາບຈາກບັນດາສະມາຊິກອົງການການຄ້າໂລກມາແລ້ວ. ມາດຕະການຂອງອາເມຣິກາເປັນການທຳລາຍກະຕິກາການຄ້າຫຼາຍຝ່າຍຢ່າງໜັກໜ່ວງ ໄດ້ສ້າງຄວາມເສຍຫາຍໃຫ້ແກ່ສິດແລະຜົນປະໂຫຍດອັນຊອບທຳຂອງສະມາຊິກອົງການການຄ້າໂລກ ລວມທັງຈີນ. ຈີນໄດ້ສະໜີຄຳຮ້ອງຟ້ອງອາເມຣິກາຕາມກະຕິກາອົງການການຄ້າໂລກເພື່ອພິຈາລະນາເລື່ອງຄ່າທົດແທນ ແຕ່ຝ່າຍອາເມຣິກາພັດປະຕິເສດບໍ່ໃຫ້ຄຳຕອບ. ສະນັ້ນ, ຈີນຈຶ່ງຈຳເປັນຕ້ອງໃຊ້ມາດຕະການຕ່າງຫາກຕາມມາດຕາທີ່ກ່ຽວຂ້ອງທີ່ໄດ້ລະບຸໄວ້ໃນ “ກົດໝາຍການຄ້າກັບຕ່າງປະເທດຂອງສາທາລະນະລັດປະຊາຊົນຈີນ” ເພື່ອທົດແທນຜົນເສຍຫາຍທີ່ເກີດຈາກອາເມຣິກາໃຊ້ມາດຕາ 232 ຕໍ່ຈີນກ່ຽວກັບຜະລິດຕະພັນເຫຼັກກ້າແລະອາລູມີນຽມ ແລະປົກປັກຮັກສາສິດແລະຜົນປະໂຫຍດທີ່ຖືກຕ້ອງຕາມກົດໝາຍຂອງຕົນ.
ຄຳເຫັນ
0