ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 18 ກໍລະກົດນີ້ຢູ່ນະຄອນຫຼວງປັກກິ່ງ, ທ່ານຫຼີເຄີ້ສຽງ ນາຍົກລັດຖະມົນຕີຈີນໄດ້ຕ້ອນຮັບການເຂົ້າຢ້ຽມຄຳນັບຂອງທ່ານຕຸນ ດີມໄຊນູດິນ ທູດພິເສດຂອງນາຍົກລັດຖະມົນຕີມາເລເຊຍ.
ກ່ອນອື່ນ, ທ່ານດີມໄດ້ຝາກຈົດໝາຍຂຽນດ້ວຍຕົນເອງຂອງທ່ານມາຮາເທຍ ນາຍົກລັດຖະມົນຕີມາເລເຊຍເຖິງທ່ານຫຼີເຄີ້ສຽງ ເຊິ່ງເນື້ອໃນຈົດໝາຍຂຽນວ່າ: ລັດຖະບານຊຸດໃໝ່ຂອງມາເລເຊຍຈະສືບຕໍ່ສຸມໃສ່ຮັກສາສາຍພົວພັນມິດຕະພາບກັບຈີນ, ຍິນດີຊຸກຍູ້ການເສີມຂະຫຍາຍສາຍພົວພັນຄູ່ຮ່ວມຍຸດທະສາດຮອບດ້ານລະຫວ່າງສອງປະເທດໃຫ້ເພີ່ມທະວີຂຶ້ນຕື່ມ, ຍິນດີຕ້ອນຮັບວິສາຫະກິດຈີນໄປລົງທຶນຢູ່ມາເລເຊຍ ແລະຕົນເບິ່ງອະນາຄົດແຫ່ງການພັດທະນາຂອງສາຍພົວພັນມາເລເຊຍ-ຈີນໄປໃນທິດທາງທີ່ດີ.
ທ່ານຫຼີເຄີ້ສຽງກ່າວວ່າ: ຈີນຍິນດີຮ່ວມກັບມາເລເຊຍມຸ່ງໜ້າໄປສູ່ເປົ້າໝາຍດຽວກັນ,ຮັກສາທ່ວງທ່າ ຂະຫຍາຍຕົວທີ່ດີຂອງສາຍພົວພັນລະຫວ່າງສອງປະເທດບົນພື້ນຖານເຄົາລົບເຊິ່ງກັນແລະກັນ,ປະຕິບັດຕໍ່ກັນຢ່າງສະເໝີພາບ, ເຮັດໃຫ້ຂໍ້ລິເລີ່ມ “ໜຶ່ງແລວໜຶ່ງເສັ້ນທາງ”ເຊື່ອມຕໍ່ກັບຍຸດທະສາດການພັດທະນາຂອງມາເລເຊຍໃຫ້ມີປະສິດທິຜົນຫຼາຍກວ່າເກົ່າ, ຊຸກຍູ້ການຮ່ວມມືໃນໂຄງການໃຫຍ່ເປັນຕົ້ນ ສວນນິຄົມອຸດສາຫະກຳ,ເຂດນິຄົມອຸດສາຫະກຳແຄມທະເລ,ການກໍ່ສ້າງພື້ນຖານໂຄງລ່າງຄົມມະນາຄົມແລະອື່ນໆ,ເປີດກວ້າງການແລກປ່ຽນດ້ານວັດທະນະທຳ, ສ້າງຄວາມຜາສຸກໃຫ້ປະຊາຊົນສອງຊາດໃຫ້ຫຼາຍຍິ່ງຂຶ້ນ. ພາຍໃຕ້ສະພາບການໃໝ່,ຫວັງວ່າມາເລເຊຍຈະສືບຕໍ່ເສີມຂະຫຍາຍບົດບາດສ້າງສັນເພື່ອເສີມຂະຫຍາຍສາຍພົວພັນແລະການຮ່ວມມືລະຫວ່າງຈີນ-ອາຊຽນໃຫ້ກ້າວສູ່ລ່ວງເລິກຢ່າງບໍ່ຢຸດຢັ້ງ.
ທ່ານດີມຢືນຢັນວ່າ: ມາເລເຊຍຍິນດີຮ່ວມກັບຈີນຊຸກຍູ້ການພັດທະນາຂອງສອງປະເທດກໍຄືປະເທດໃນອາຊີ, ຊຸກຍູ້ການຮ່ວມມືແບບຕ່າງຝ່າຍຕ່າງມີຜົນປະໂຫຍດລະຫວ່າງອາຊຽນກັບຈີນ,ສ້າງຄວາມຜາສຸກໃຫ້ປະຊາຊົນ ສອງປະເທດ,ພາກພື້ນກໍຄືປະຊາຊົນທົ່ວໂລກ.
ຄຳເຫັນ
0