ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ທ່ານຫຼີເຄີ້ສຽງ ນາຍົກລັດຖະມົນຕີຈີນ ໄດ້ພົບປະກັບທ່ານມາເຣຍ ເຟີນັນດາ ເອສປີໂນຊາ ປະທານກອງປະຊຸມສະມັດຊາໃຫຍ່ອົງການສະຫະປະຊາຊາດຄັ້ງທີ 73 ໃນຕອນບ່າຍວັນທີ 8 ສິງຫານີ້ຢູ່ເປີຍຕ້າຍເຫີ ໃນໂອກາດເດີນທາງຢ້ຽມຢາມຈີນຢ່າງເປັນທາງການ.
ທ່ານຫຼີເຄີ້ສຽງ ກ່າວວ່າ: ຈີນໃນຖານະເປັນປະເທດສະມາຊິກກໍ່ຕັ້ງອົງການສະຫະປະຊາຊາດ, ປະເທດສະມາຊິກຖາວອນສະພາຄວາມໝັ້ນຄົງ ແລະ ເປັນປະເທດພວມພັດທະນາທີ່ໃຫຍ່ທີ່ສຸດ ໄດ້ສະໜັບສະໜູນວຽກງານຂອງອົງການສະຫະປະຊາຊາດມາໂດຍຕະຫຼອດ. ຈີນເດັດດ່ຽວຮັກສາອິດທິພົນຂອງອົງການສະຫະປະຊາຊາດ ແລະ ສະໜັບສະໜູນໃຫ້ອົງການສະຫະປະຊາຊາດເສີມຂະຫຍາຍບົດບາດເປັນແກນກາງໃນກິດຈະການສາກົນ.
ທ່ານຫຼີເຄີ້ສຽງ ຍັງກ່າວເນັ້ນຕື່ມວ່າ: ອົງການສະຫະປະຊາຊາດ, ອົງການການຄ້າໂລກ ແລະອົງການອື່ນໆ ລ້ວນແຕ່ຕ້ອງໄດ້ປັບປຸງບູລະນະ ແລະ ປະຕິຮູບຕົນເອງ ແຕ່ການປະຕິຮູບບໍ່ແມ່ນການສ້າງຕັ້ງອົງການໃໝ່ຂຶ້ນມາແທນ ຫາກແມ່ນດຳເນີນຢູ່ບົນພື້ນຖານການຮັກສາລະບຽບສາກົນທີ່ກໍ່ຕົວຂຶ້ນຫຼັງສົງຄາມໂລກຄັ້ງທີສອງ ແລະ ດຳເນີນໄປໃນເງື່ອນໄຂຮັກສາຫຼັກການສຳຄັນຕ່າງໆ ເຊັ່ນ ກົດບັດອົງການສະຫະປະຊາຊາດ ແລະ ການຄ້າເສລີເປັນຕົ້ນ.
ທ່ານເອສປີໂນຊາ ກ່າວວ່າ: ອົງການສະຫະປະຊາຊາດໃຫ້ຄວາມສຳຄັນສູງຕໍ່ການພົວພັນກັບຈີນ ຂ້າພະເຈົ້າໃນຖານະເປັນປະທານກອງປະຊຸມສະມັດຊາໃຫຍ່ອົງການສະຫະປະຊາຊາດຄັ້ງທີ 73 ໄດ້ເລືອກຈີນເປັນເປົ້າໝາຍທຳອິດຂອງການເດີນທາງຢ້ຽມຢາມຂອງຕົນ ເນື່ອງຈາກໄດ້ເຫັນບົດບາດສຳຄັນຂອງຈີນໃນການເພີ່ມທະວີລັດທິຫຼາຍຝ່າຍ ແລະ ໄດ້ປະກອບສ່ວນອັນໃຫຍ່ຫຼວງເພື່ອສະໜັບສະໜູນວຽກງານຂອງອົງການສະຫະປະຊາຊາດ. ອົງການສະຫະປະຊາຊາດຍິນດີຮ່ວມກັບຈີນ ແລະບັນດາປະເທດໃນໂລກ ປົກປັກຮັກສາລະບຽບສາກົນທີ່ມີກະຕິກາຕ່າງໆເປັນພື້ນຖານ, ຊຸກຍູ້ການຄ້າເສລີໃນຂອບກົດໝາຍສາກົນ ແລະ ຂອບອົງການການຄ້າໂລກ, ຊຸກຍູ້ເສດຖະກິດໂລກາພິວັດທີ່ກວມລວມແລະເປັນປະໂຫຍດຕໍ່ໝົດທຸກຄົນ, ຮ່ວມມືກັນຮັບມືກັບສິ່ງທ້າທາຍຕ່າງໆ ແລະ ຊຸກຍູ້ສັນຕິພາບ, ສະຖຽນລະພາບ, ການພັດທະນາ ແລະ ຄວາມຈະເລີນຮຸ່ງເຮືອງຂອງໂລກ.
ຄຳເຫັນ
0