ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຄວາມຍິ່ງໃຫຍ່ຂອງພາລະກິດບໍ່ພຽງແຕ່ຍ້ອນຄວາມສະຫງ່າງາມຂອງເປົ້າໝາຍ, ແຮ່ງຍ້ອນຄວາມສະຫງ່າງາມຂອງຂະບວນການບຸກບືນສູ້ຊົນ; ຄວາມດີງາມຂອງຊີວິດບໍ່ພຽງແຕ່ຍ້ອນການຊົມໃຊ້ທີ່ອຸດົມສົມບູນ, ແຮ່ງຍ້ອນມີປະສົບປະການທີ່ອຸດົມສົມບູນ. ເວລາຜານໄປທ່າມກາງຟ້າຝົນລົມແດງ ພາຍໃຕ້ການນຳພາຂອງພັກກອມມູນິດຈີນ, ປະຊາຊົນຈີນບຸກບືນສູ້ຊົນ, ຜ່ານຜ່າຄວາມຫຍຸ້ງຍາກຕ່າງໆນານາ, ບຸກໜ້າບືນຕົວ, ໄດ້ຈາລຶກໄວ້ໃນປະຫວັດສາດເໝືອນແສງຕາເວັນສາດສ່ອງຂອງຍຸກສະໄໝ ແລະ ສ້າງຊີວິດທີ່ດີງາມຂອງຕົນ.
ຍັງຈື່ໄດ້ວ່າ, ເມື່ອຫາກໍ່ສ້າງຕັ້ງສາທາລະນະລັດປະຊາຊົນຈີນຂຶ້ນ, ລວມຍອດຜະລິດຕະພັນພາຍໃນ ຫຼື GDP ຂອງຈີນມີພຽງແຕ່ 10 ກວ່າຕື້ໂດລາສະຫະລັດເທົ່ານັ້ນ, ຕອນນັ້ນເກືອບບໍ່ມີອຸດສາຫະກຳໜັກເລີຍ ແລະ ອຸດສາຫະກຳເບົາມີພຽງແຕ່ອຸດສາຫະກຳຕ່ຳແຜ່ນບໍ່ເທົ່າໃດແຫ່ງເທົ່ານັ້ນ. ປະທານເໝົາເຈີຕົ່ງ ໄດ້ທອດຖອນໃຈຢ່າງແຮງແລະເວົ້າວ່າ: ພວກເຮົານອກຈາກສາມາດເຮັດໂຕະຕັ່ງ, ເຕົ້າຊາຖ້ວຍຊາແລ້ວ ອັນອື່ນ ເຊັ່ນ: ລົດ, ເຮືອບິນ, ລົດຕັງ, ລົດຕັກເຕີກໍບໍ່ມີຄວາມສາມາດທີ່ຈະຜະລິດໄດ້. ຢູ່ບົນພື້ນຖານຄວາມທຸກຍາກຈົນເກືອບຂາດເຂີນທຸກສິ່ງທຸກຢ່າງ ແລະ ເຕັມໄປດ້ວຍຊາກສະຫຼັກຫັກພັງທີ່ເກີດຈາກສົງຄາມ ພວກເຮົາສາມາດຕ້ານກັບການປິດລ້ອມທາງການທະຫານແລະການຂວ້ຳບາດທາງດ້ານເສດຖະກິດຢ່າງຮອບດ້ານຈາກຈັກກະພັດນິຍົມ, ສາມາດຕ້ານກັບໄພຂົ່ມຂູ່ທີ່ໜັກໜ່ວງຂອງແປວໄຟສົງຄາມທີ່ແຜ່ລາມມາເຖິງແຄມແມ່ນ້ຳຢ່າລູ້, ສາມາດຜ່ານຜ່າຄວາມຫຍຸ້ງຍາກສຸດຂີດທີ່ເກີດຈາກໄພພິບັດທາງທຳມະຊາດ 3 ປີຕິດຕໍ່ກັນ... ຈາກນັ້ນມາ, ພວກເຮົາກໍສາມາດສ້າງລະບົບອຸດສາຫະກຳແລະລະບົບເສດຖະກິດແຫ່ງຊາດທີ່ເປັນເອກະລາດ ແລະ ອ່າວສົມບູນຄົບຖ້ວນ, ຖອນໝວກແຫ່ງ “ປະເທດຂາດເຂີນນ້ຳມັນ” ອອກ, ສາມາດຜະລິດລົດຫຍີ່ຫໍ້ເຈຟ້າງ ແລະ ລົດຕັກເຕີຕົ່ງຟ່າງຫົງຂອງຕົນ, ສາມາດຄົ້ນຄວ້າ-ຜະລິດຂີປະນາວຸດ, ລະເບີດປະລະມານູ ແລະ ດາວທຽມ ທີ່ສັ່ນສະເທືອນໄປທົ່ວໂລກ...ປະຊາຊົນຈີນເພິ່ງກຳລັງຕົນເອງ, ຕໍ່ສູ້ຢ່າງທໍລະຫົດອົດທົນ ແລະສາມາດຢືນຢ່າງສະຫງ່າຜ່າເຜີຍທັງໃນດ້ານການເມືອງແລະເສດຖະກິດ, ໂສມໜ້າຂອງປະເທດ ແລະ ຊີວິດການເປັນຢູ່ຂອງປະຊາຊົນໄດ້ມີການປ່ຽນແປງໂດຍພື້ນຖານ.
ຍັງຈື່ໄດ້ວ່າ, ເມື່ອຫາກໍ່ປະຕິຮູບແລະເປີດປະຕູສູ່ພາຍນອກ ບັດຊື້ສະບຽງ, ບັດຊື້ນ້ຳມັນ, ບັດຊື້ຊີ້ນ, ບັດຊື້ແຜ່ນຜ້າ ແລະອື່ນໆ ລ້ວນແຕ່ແມ່ນສິ່ງຂາດບໍ່ໄດ້ໃນຊີວິດປະຈຳວັນຂອງປະຊາຊົນຈີນ ຈົນຮອດການຊື້ນ້ຳຕານ, ຂະໜົມ, ກັບຂີດໄຟ ແລະ ສະບູ ກໍລ້ວນແຕ່ຕ້ອງມີບັດທີ່ກ່ຽວຂ້ອງ; ຫຼາຍເພດໄວຢູ່ຮ່ວມຫ້ອງດຽວກັນຢ່າງແອອັດເປັນສະພາບທີ່ມີຢູ່ທົ່ວໄປ, ເຮືອນບໍ່ຕົບແຕ່ງ, ເຮືອນຫຍ້າຄາ, ຕຶກທີ່ຫ້ອງຕ່າງໆມີລະບຽງຮ່ວມກັນ, ຫຼາຍໆຄອບຄົວຢູ່ຕຶກດຽວກັນຢ່າງແອອັດແລະມີເດີ່ນຫຼິ້ນແຫ່ງດຽວ, ນີ້ກໍຄືພາບຊີວິດຂອງປະຊາຊົນໃນຕົວເມືອງແລະຊົນນະບົດ; ລົດຖີບ, ໂມງໃສ່ແຂນ, ຈັກຫຍິບ ແລະ ເຄື່ອງຮັບວິທະຍຸ ສິ່ງເຫຼົ່ານີ້ຖືກຂະໜານນາມວ່າ “ສາມໝູນໜຶ່ງສຽງ” ໄດ້ກາຍເປັນສິ່ງລ້ຳຄ່າຂອງປະຊາຊົນໃນຊີວິດປະຈຳວັນ; ໄລຍະນັ້ນ, ສະໜາມບິນເດີໂກເລປະເທດຝຣັ່ງສາມາດໃຫ້ຍົນຂຶ້ນລົງໄດ້ເຖິງ 60 ຖ້ຽວພາຍໃນໜຶ່ງຊົ່ວໂມງ, ແຕ່ສະໜາມບິນສາກົນນະຄອນຫຼວງປັກກິ່ງສາມາດໃຫ້ຍົນຂຶ້ນລົງໄດ້ພຽງແຕ່ 2 ຖ້ຽວເທົ່ານັ້ນພາຍໃນເວລາໜຶ່ງຊົ່ວໂມງ; ໃນຮ້ານຄ້າຂະໜາດໃຫຍ່ຂອງນະຄອນຫຼວງໂຕກຽວປະເທດຍີ່ປຸ່ນມີສິນຄ້າເຖິງ 5 ແສນປະເພດ, ແຕ່ຢູ່ໃນຕຶກສັບພະສິນຄ້າ ຖະໜົນຫວາງຝູຈິງ ນະຄອນຫຼວງປັກກິ່ງ ມີພຽງແຕ່ 22.000 ປະເພດເທົ່ານັ້ນ...ຢູ່ໃນເງື່ອນໄຂທີ່ເຂົ້າຂອງເຄື່ອງໃຊ້ຂາດເຂີນທີ່ສຸດ, ຊີວິດມີຄວາມທຸກຍາກ ແລະ ເສດຖະກິດແຫ່ງຊາດເກືອບຈະພັງທະລາຍນັ້ນ, ພວກເຮົາໄດ້ທຳການຕົກລົງຂັ້ນຍຸດທະສາດຢ່າງເດັດດ່ຽວ ຄື ຖືເອົາການສ້າງສາເສດຖະກິດເປັນຕົ້ນຕໍ, ດຳເນີນການປະຕິຮູບແລະໄຂປະຕູສູ່ພາຍນອກ ມ້າງແອກແຫ່ງແນວຄິດທັດສະນະ, ທຳລາຍສິ່ງກີດຂວາງດ້ານໂຄງປະກອບ ແລະ ກົນໄກ, ໃນທີ່ສຸດກໍສາມາດເດີນໄປຕາມເສັ້ນທາງສັງຄົມນິຍົມທີ່ມີສີສັນພິເສດຂອງຈີນ. ພວກເຮົາປະສົບຄວາມຍາກລຳບາກໃນການປະຕິຮູບດ້ານລາຄາສິນຄ້າ, ໄດ້ປະສົບຄວາມຫຍຸ້ງຍາກທີ່ເກີດຈາກການຂວ້ຳບາດຂອງປະເທດຕາເວັນຕົກ, ໄດ້ຜ່ານຜ່າພາຍຸວິກິດການທາງການເງິນອາຊີ ກໍຄືວິກິດການທາງການເງິນໂລກ, ໄດ້ປະສົບການທົດສອບຈາກໄພພິບັດນ້ຳຖ້ວມຂະໜາດໃຫຍ່ພິລຶກ, ແຜ່ນດິນໄຫວຂະໜາດໃຫຍ່ພິລຶກ, ພະຍາດຊາສລະບາດເປັນບໍລິເວນກວ້າງ ແລະອື່ນໆ. ພວກເຮົາສາມາດຝຶກລອຍນ້ຳໃນທະເລ, ມີຄວາມໝັ້ນໜຽວກ້າແກ່ນຍິ່ງຂຶ້ນຫຼັງທົດສອບກັບຄວາມຫຍຸ້ງຍາກຕ່າງໆນານາ, ກຳລັງດ້ານເສດຖະກິດ, ກຳລັງດ້ານວິທະຍາສາດເຕັກນິກ, ກຳລັງດ້ານການປ້ອງກັນປະເທດ ແລະ ກຳລັງສັງລວມຂອງຈີນໄດ້ພັດທະນາແບບກ້າວກະໂດດທີ່ມີລັກສະນະຄັ້ງປະຫວັດສາດ, ຊີວິດການເປັນຢູ່ຂອງປະຊາຊົນຈີນໄດ້ອຳລາຍຸກສະໄໝແຫ່ງ “ບັດຊື້ເຄື່ອງ”, ເດີນຜ່ານ “ຍຸກກິນອີ່ມນຸ່ງອຸ່ນ” ແລະ ຕ້ອນຮັບຍຸກ “ອີ່ມໜຳສຳລານຮອບດ້ານ”.
ຄວາມສຸກໄດ້ມາຈາກຄວາມພະຍາຍາມສູ້ຊົນດ້ວຍຄວາມລຳບາກ. ທຸກມື້ນີ້, ຈີນໃນຖານະເປັນກຸ່ມເສດຖະກິດໃຫຍ່ອັນດັບສອງຂອງໂລກໄດ້ສ້າງໃຫ້ມີເຄືອຂ່າຍປະກັນສັງຄົມທີ່ໃຫຍທີ່ສຸດຂອງໂລກ ເຊິ່ງປົກຄຸມປະຊາກອນ 1,3 ຕື້ກວ່າຄົນ, ໄດ້ສ້າງສິ່ງມະຫັດສະຈັນໃນການເຮັດໃຫ້ປະຊາຊົນຫຼຸດພົ້ນຈາກຄວາມທຸກຍາກ 13 ລ້ານກວ່າຄົນຕໍ່ປີ, ສ້າງຜົນສຳເລັດໃນການປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນຄື ເດັກນ້ອຍໄດ້ຮັບການລ້ຽງດູເບິ່ງແຍງ,ໄດ້ຮັບການສຶກສາ, ອອກແຮງງານຈະໄດ້ລາຍຮັບ, ເມື່ອເຈັບເປັນມີເງິນປິ່ນປົວ, ເມື່ອເຖົ້າແກ່ມີເງິນລ້ຽງຊີບ, ມີເຮືອນຢູ່,ກຸ່ມຄົນດ້ອຍໂອກາດຈະໄດ້ຮັບການຊ່ວຍເຫຼືອ. ປະຊາຊົນທົ່ວປະເທດເກາະແຂນກັນເລັ່ງມຸ່ງໜ້າໄປສູ່ຄວາມຝັນຮ້ອຍປີທີ່ສ້າງສັງຄົມອິ່ມໜຳສຳລານຮອບດ້ານໃຫ້ສຳເລັດ… ຜົນສຳເລັດທີ່ຍິ່ງໃຫຍ່ແລະໜ້າປິຕິຊົມຊື່ນເຫຼົ່ານີ້ແມ່ນປະຊາຊົນຈີນຍາດມາໄດ້ຈາກການບາກບັ່ນພະຍາຍາມສູ້ຊົນດ້ວຍຄວາມດຸໝັ່ນພາກພຽນ,ສູ້ທຸກທົນຍາກເພື່ອບັນລຸຄວາມຝັນຂອງປະຊາຊົນຈີນທີ່ສະແຫວງຫາຊີວິດການເປັນຢູ່ທີ່ດີງາມ.
ໃນເວລາກ່າວປາໄສຢູ່ເວທີປຶກສາຫາລືອຸດສາຫະກຳການຄ້າປະເທດບຣິກສທີ່ຈັດຂຶ້ນຢູ່ນະຄອນໂຈຮັນເນັສເບີກປະເທດອາຟຣິກກາໃຕ້, ທ່ານສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນໄດ້ຍົກເອົາຄຳບູຮານຈີນທີ່ວ່າ “ຄວາມຫຍຸ້ງຍາກລຳບາກຈະຊ່ວຍໃຫ້ປະສົບຜົນສຳເລັດ”ເພື່ອສະຫຼຸບແລະພັນລະນາຂະບວນວິວັດການພັດທະນາທີ່ບໍ່ທຳມະດາແລະມີຜົນສຳເລັດທີ່ຍິ່ງໃຫຍ່ທີ່ໄດ້ມາຈາກການຜ່ານຜ່າຄວາມຫຍຸ້ງຍາກຕ່າງໆນາໆແລະບາກບັ່ນພະຍາຍາມສູ້ຊົນຢ່າງບໍ່ລົດລະຂອງຈີນ. ນີ້ຄືຂໍ້ສະຫຼຸບໃນປະຫວັດສາດ, ຍິ່ງເປັນກຳລັງແຮງໃຈທີ່ໄດ້ມາຈາກຄວາມເປັນຈິງໃນປັດຈຸບັນແລະບົ່ງບອກເຖິງອະນາຄົດທີ່ດີງາມ. ຈີນຄືເຊື້ອຊາດທີ່ເກົ່າແກ່,ປະເທດທີ່ໜຸ່ມແໜ້ນ, ປະຊາຊົນຈີນນັບເປັນຕື້ກວ່າຄົນທີ່ກຳລັງພະຍາຍາມສູ້ຊົນສະແຫວງຫາຊີວິດທີ່ມີຄວາມສຸກ, ເມື່ອໄດ້ຜ່ານຜ່າຄວາມຫຍຸ້ງຍາກຕ່າງໆນາໆແລ້ວໄດ້ສ້າງຜົນສຳເລັດທີ່ໜ້າພາກພູມໃຈໃນທຸກມື້ນີ້ ແລະກໍຈະສືບຕໍ່ບຸກບືນດ້ວຍຄວາມກ້າຫານເພື່ອມຸ່ງໜ້າໄປສູ່ອະນາຄົດທີ່ດີງາມກວ່າເກົ່າຢ່າງແນ່ນອນ.
ຄຳເຫັນ
0