ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 8 ພຶດສະພາປີນີ້, ວໍຊິງຕັນປະກາດຢ່າງເປີດເຜີຍວ່າ, ຈະຖອນຕົວອອກຈາກສັນຍາຮອບດ້ານກ່ຽວກັບບັນຫານິວເຄຼຍອີຣານທີ່ລົງນາມເມື່ອປີ 2015. ການກະທຳດັ່ງກ່າວໄດ້ມີຜົນສະທ້ອນຄັ້ງທຳອິດເລີ່ມແຕ່ 0:01 ໂມງວັນທີ 7 ສິງຫາຕາມເວລາພາກຕາເວັນອອກອາເມຣິການີ້ຄື: ອາເມຣິກາໄດ້ຮື້ຟື້ນການຂວ້ຳບາດຮອບດ້ານຕໍ່ເສດຖະກິດອີຣານສ່ວນໜຶ່ງ, ກ່ຽວພັນເຖິງຂະແໜງການລົດຍົນ, ຂະແໜງການບິນ, ຄຳແລະການຊື້ຂາຍໂລຫະຕົ້ນຕໍອື່ນໆ. ລັດຖະບານອາເມຣິກາໄດ້ຂົ່ມຂູ່ວ່າ, ຖ້າໃຜຮັກສາການພົວພັນທາງການຄ້າກັບອີຣານ, ກໍບໍ່ສາມາດດຳເນີນທຸລະກິດກັບອາເມຣິກາໄດ້. ຂ່າວແຈ້ງວ່າ, ກຸ່ມບໍລິສັດຜະລິດລົດຍົນ PSA Peugeot Citroen ແລະກຸ່ມບໍລິສັດ Renault ຂອງຝຣັ່ງລ້ວນແຕ່ໄດ້ຮັບຜົນກະທົບຈາກເລື່ອງນີ້, ກຸ່ມບໍລິສັດ PSA Peugeot Citroen ໄດ້ຢຸດການດຳເນີນທຸລະກິດຢູ່ອີຣານເປັນການຊົ່ວຄາວ, ຈຳນວນຂາຍລົດຢູ່ອີຣານຂອງບໍລິສັດ Renault ໃນ 6 ເດືອນຕົ້ນປີນີ້ໄດ້ຫຼຸດລົງຫຼາຍກວ່າ 10%.
ນະໂຍບາຍຈຳນວນໜຶ່ງທີ່ລັດຖະບານອາເມຣິກາຊຸດປັດຈຸບັນປະຕິບັດນັ້ນປຽບເໝືອນ “ຮູດຳ” ຕ່າງໆໃນອະວະກາດ, ຢູ່ຮູມືດທີ່ຄົນທັງຫຼາຍເບິ່ງບໍ່ເຫັນນັ້ນ, ອາເມຣິກາໃຊ້ກຳລັງຂອງຕົນທຳລາຍຈຸດເດັ່ນຕ່າງໆຂອງການເຕີບໂຕເສດຖະກິດໂລກ. ການທີ່ຖອນຕົວອອກຈາກສັນຍາຮອບດ້ານກ່ຽວກັບບັນຫານິວເຄຼຍອີຣານແລະຮື້ຟື້ນການຂວ້ຳບາດຮອບດ້ານຕໍ່ອີຣານກໍແມ່ນໜຶ່ງໃນ “ຮູດຳ” ດັ່ງກ່າວ.
ນະໂຍບາຍນີ້ຄື “ຮູດຳ” ມີບົດບາດທາງລົບຕໍ່ເສດຖະກິດໂລກອາດຈະປາກົດອອກໃຫ້ເຫັນຫຼາຍກວ່າເກົ່າຫຼັງວັນທີ 5 ພະຈິກ, ຮອດເວລານັ້ນອາເມຣິກາຈະເປີດການຂວ້ຳບາດຕໍ່ອີຣານຄືນໃໝ່ໃນໄລຍະທີສອງ, ແລະກ່ຽວພັນເຖິງຂະແໜງການພະລັງງານ, ການຊື້ຂາຍນ້ຳມັນເຊື້ອໄຟແລະການທະນາຄານ. ວໍຊິງຕັນໄດ້ຂົ່ມຂູ່ວ່າຮອດເວລານັ້ນຈະເຮັດໃຫ້ການສົ່ງອອກນ້ຳມັນເຊື້ອໄຟຂອງອີຣານຫຼຸດເປັນສູນ. ໃນຖານະເປັນຂະແໜງການເສົາຄ້ຳຂອງອີຣານ, ນ້ຳມັນເຊື້ອໄຟໄດ້ກວມ 70%-80%ຂອງຍອດມູນຄ່າການສົ່ງອອກ, ທັງມີບົດບາດສຳຄັນຕໍ່ການຊຸກຍູ້ຂະແໜງການອື່ນໆ. ຜົນສະທ້ອນທາງລົບຕໍ່ອີຣານຂອງການຂວ້ຳບາດຂອງອາເມລິກາໄດ້ສະແດງອອກຢ່າງຈະແຈ້ງ. ຍິ່ງກວ່ານັ້ນ, ຍ້ອນວ່າອີຣານແມ່ນປະເທດຜະລິດນ້ຳມັນເຊື້ອໄຟໃຫຍ່ອັນດັບທີ 3 ໃນອົງການໂອເປັກທັງເປັນປະເທດຜູ້ຜະລິດນ້ຳມັນເຊື້ອໄຟອັນດັບທີ 4 ຂອງໂລກ, ແຕ່ລະມື້ໄດ້ຜະລິດນ້ຳມັນເຊື້ອໄຟ 2,500,000 ບາເຣວ, ຕອບສະໜອງຕໍ່ຄວາມຕ້ອງການຂອງໂລກໄດ້ປະມານ 3%, ອາເມຣິກາຫ້າມບໍ່ໃຫ້ອີຣານສົ່ງອອກນ້ຳມັນເຊື້ອໄຟ, ຍ່ອມຈະເຮັດໃຫ້ລາຄານ້ຳມັນເຊື້ອໄຟຂອງໂລກສູງຂຶ້ນຢ່າງແນ່ນອນ.
ສົງຄາມການຄ້າທີ່ວໍຊິງຕັນກໍ່ຂຶ້ນ,ແມ່ນ “ຮູດຳຫຼື Black Hole ອາເມຣິກາ”ອີກອັນໜຶ່ງ ທີ່ອາດຈະປີ້ນມາຕູ່ຫາວ່າຮ້າຍການເຕີບໂຕຂອງເສດຖະກິດໂລກໂດຍບໍ່ຕ້ອງສົງໄສ. ເຖິງວ່າມະຫາເສດຖີທ່ານຜູ້ນັ້ນໄດ້ພິມບົດຄວາມລົງສື່ສັງຄົມອອນລາຍເລື້ອຍໆໃນຫວ່າງມໍ່ໆນີ້ໂດຍໄດ້ປະກາດວ່າ“ພວມເອົາຊະນະສົງຄາມການຄ້າ”ກໍ່ຕາມ,ແຕ່ນັກວິເຄາະເວົ້າວ່າ,ການເຕີບໂຕຂອງເສດຖະກິດໂລກໄດ້ມີການເຊື່ອມຕໍ່ກັນກັບການຄ້າຢ່າງແໜ້ນແຟ້ນ ໂດຍສະເພາະແມ່ນການຂຶ້ນພາສີໃນທີ່ສຸດຈະມີຜົນກະທົບຕໍ່ປະລິມານການຄ້າໂລກແລະຄວາມໝັ້ນໃຈດ້ານການຄ້າ,ອາດຈະພາໃຫ້ເສດຖະກິດຊຸດໂຊມລົງແລະໄພເງິນເຟີ້ເກີດຂຶ້ນພ້ອມກັນ,ຊຶ່ງຈະເຮັດໃຫ້ເສດຖະກິດໂລກນັບມື້ນັບຊຸດໂຊມລົງ.
ທະນາຄານໂລກໄດ້ກ່າວຢ່າງຂາດຕົວໃນບົດລາຍງານສະບັບໜຶ່ງທີ່ເປີດເຜີຍໃນຕົ້ນເດືອນມິຖຸນາປີນີ້ໂດຍຂຽນວ່າ:ຜົນກະທົບຈາກຄວາມຂັດແຍ້ງກັນດ້ານການຄ້າທີ່ຮຸນແຮງຂຶ້ນທີ່ມີຕໍ່ການຄ້າທົ່ວໂລກນັ້ນບໍ່ຕ່ຳກວ່າຜົນກະທົບຈາກວິກິດການການເງິນໃນປີ 2008, ສ່ວນປະເທດທີ່ພວມພັດທະນາໄດ້ຮັບຜົນກະທົບຫຼາຍກວ່າໝູ່,ເພາະວ່າປະເທດເຫຼົ່ານີ້ພັດທະນາໂດຍເພິ່ງພາອາໄສສູງກວ່າຕໍ່ກຸ່ມເສດຖະກິດທີ່ສຳຄັນ.
ໜັງສືພິມຍີ່ປຸ່ນທາມສ໌ໄດ້ພິມບົດວິຈານບົດໜຶ່ງໂດຍໄດ້ຕຳໜິສົງຄາມການຄ້າອາເມຣິກາພາໃຫ້ທົ່ວໂລກຊຸດໂຊມລົງແນວໃດໂດຍຂຽນວ່າ: “ຍິນດີຕ້ອນຮັບເຂົ້າສູ່ຄວາມຝັນທີ່ຜີອຳໜ້າສັງເວດທີ່ສຸດຂອງພວກນັກເສດຖະສາດ:ພາວະຈຶ້ງ.” ບົດວິຈານດັ່ງກ່າວຍັງໄດ້ຊີ້ວ່າ: ວິທີການແກ້ໄຂພາວະຈຶ້ງມີພຽງແຕ່ອັນໜຶ່ງອັນດຽວ,ນັ້ນກໍ່ຄືຕັດຂາດແຫຼ່ງກຳເນີດ ຄືລັດຖະບານອາເມຣິກາຕ້ອງປະລະການຂຶ້ນພາສີ.
ບໍ່ວ່າການຖອນອອກຈາກສັນຍາວ່າດ້ວຍອາວຸດນິວເຄຼຍແລະກໍ່ສົງຄາມການຄ້າ,ຫຼືວ່າການຖອນອອກຈາກ “ສັນຍາປາຣີ”, ຖອນອອກຈາກອົງການການສຶກສາ,ວິທະຍາສາດແລະວັດທະນະທຳຂອງສະຫະປະຊາຊາດຫຼື UNESCO ແລະອື່ນໆກໍ່ຕາມ,ນະໂຍບາຍຕ່າງໆທີ່ວໍຊິງຕັນໄດ້ໃຊ້,ໄດ້ສ່ອງແສງໃຫ້ເຫັນເຖິງຈຸດພິເສດນະໂຍບາຍການທູດທີ່ໃຫຍ່ທີ່ສຸດຂອງລັດຖະບານອາເມຣິກາຊຸດປັດຈຸບັນ,ນັ້ນກໍ່ຄື “ຄວາມບໍ່ແນ່ນອນ”. ແຕ່ໃນຖານະເປັນກຸ່ມເສດຖະກິດໃຫຍ່ອັນດັບໜຶ່ງແລະປະເທດເຂັ້ມແຂງທີ່ສຸດທີ່ມີຜົນສະທ້ອນຫຼາຍທີ່ສຸດຕໍ່ໂລກ, ລັດຖະບານອາເມຣິກາຍັງຂາດ “ຄວາມແນ່ນອນ” ຕໍ່ໂລກ. ໂລກບໍ່ຕ້ອງການ “ຮູດຳອາເມຣິກາ”, ເພາະວ່າມັນຈະປີ້ນຄືນມາຕູ່ຫາວ່າຮ້າຍຄວາມສວຍງາມແລະຄວາມຈະເລີນຮຸ່ງເຮືອງທີ່ສະຫວ່າງສະໄຫວທັງໝົດໃນບາດດຽວໂລດ.
ຄຳເຫັນ
0