ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 16 ສິງຫານີ້, ກະຊວງການຄ້າຈີນປະກາດວ່າ: ໂດຍຕອບສະໜອງຕາມຄຳເຊື້ອເຊີນຂອງອາເມຣິກາ, ທ່ານຫວາງໂຊ້ເວີນ ຮອງລັດຖະມົນຕີກະຊວງການຄ້າຈີນທັງເປັນຮອງຜູ້ຕາງໜ້າເຈລະຈາການຄ້າສາກົນຈະນຳພາຄະນະຜູ້ແທນຢ້ຽມຢາມອາເມຣິກາໃນທ້າຍເດືອນສິງຫານີ້ເພື່ອປຶກສາຫາລືກັບຄະນະຜູ້ແທນອາເມຣິກາກ່ຽວກັບບັນຫາເສດຖະກິດການຄ້າລະຫວ່າງສອງປະເທດທີ່ຕ່າງຝ່າຍຕ່າງໃຫ້ຄວາມສົນໃຈ.
ສື່ມວນຊົນອາເມຣິກາຈຳນວນບໍ່ໜ້ອຍໄດ້ລາຍງານວ່າ ຂ່າວກ່ຽວກັບຈີນ-ອາເມຣິກາຈະປຶກສາຫາລືເສດຖະກິດການຄ້າຄືນໃໝ່ນັ້ນໄດ້ສ້າງຄວາມໝັ້ນໃຈໃຫ້ແກ່ຕະຫຼາດ. CNBC ເຊິ່ງເປັນສື່ມວນຊົນເສດຖະກິດການເງິນອາເມຣິກາລາຍງານວ່າ: ວັນທີ 17 ສິງຫານີ້ ດັດຊະນີສະເລ່ຍຂອງອຸດສາຫະກຳດາວຈອນໄດ້ສູງຂຶ້ນ 110,59 ຈຸດ ແລະບັນລຸເຖິງ 25669,32 ຈຸດໃນເວລາປິດຕະຫຼາດ.
ຂະນະດຽວກັນ, ກໍມີສື່ມວນຊົນອາເມຣິກາໄດ້ລາຍງານໂດຍສະແດງເຖິງຄວາມເປັນຫ່ວງຂອງປະຊາຊົນພາຍໃນອາເມຣິກາທີ່ມີຕໍ່ນະໂຍບາຍການຄ້າຂອງລັດຖະບານ. ໜັງສືພິມວໍຊິງຕັນໂພສໄດ້ລົງພິມບົດວິເຄາະບົດໜຶ່ງກ່ອນໜ້ານີ້ບໍ່ດົນວ່າ ນັບແຕ່ຂຶ້ນພາສີຕໍ່ຜະລິດຕະພັນເຫຼັກກ້າແລະອາລູມີນຽມທີ່ນຳເຂົ້າຈາກຕ່າງປະເທດເປັນຕົ້ນມາ, ນະໂຍບາຍການຄ້າແຕ່ຝ່າຍດຽວທີ່ລັດຖະບານອາເມຣິກາປະຕິບັດໃນໄລຍະມໍ່ໆມານີ້ໄດ້ພາໃຫ້ຄູ່ການຄ້າທັງຫຼາຍຂອງອາເມຣິກາມີຄວາມກັງວົນ.
ນອກນີ້, ໜັງສືພິມ The Hill ຂອງອາເມຣິກາໄດ້ລົງພິມບົດວິຈານໂດຍຊີ້ໃຫ້ເຫັນວ່າ ອຸປະສັກໃຫຍ່ອັນໜຶ່ງທີ່ຂັດຂວາງການປຶກສາຫາລືບັນຫາເສດຖະກິດການຄ້າຈີນ-ອາເມຣິກາໃນປັດຈຸບັນຄືລັດຖະບານອາເມຣິກາໃຫ້ຄວາມສຳຄັນສູງເກີນໄປຕໍ່ການຂາດດຸນການຄ້າ, ຂະນະດຽວກັນ, ບົດຄວາມຍັງໄດ້ລະບຸອີກວ່າ: ນະໂຍບາຍລັດທິປົກປ້ອງການຄ້າທີ່ລັດຖະບານອາເມຣິກາປະຕິບັດຕໍ່ຈີນໃນປັດຈຸບັນຈະເຮັດໃຫ້ວິສາຫະກິດອາເມຣິກາສູນເສຍໂຄຕາຕະຫຼາດທັງພາຍໃນແລະຕ່າງປະເທດ ແລະເຮັດໃຫ້ຕ່ອງໂສ້ມູນຄ່າທົ່ວໂລກເກີດມີການເໜັງຕີງ.
ຄຳເຫັນ
0