ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕົວເລກສະຖິຕິດຶງດູດທຶນຕ່າງປະເທດທີ່ກະຊວງການຄ້າຈີນເປີດເຜີຍຫຼ້າສຸດສະແດງໃຫ້ເຫັນວ່າ, ແຕ່ເດືອນມັງກອນຫາເດືອນກໍລະກົດປີນີ້ຈີນໄດ້ອະນຸມັດວິສາຫະກິດທຶນຕ່າງປະເທດໃໝ່ 35.239 ແຫ່ງ, ທຽບໃສ່ໄລຍະດຽວກັນຂອງປີຜ່ານມາເພີ່ມຂຶ້ນ 99,1%, ການນຳໃຊ້ທຶນຕ່າງປະເທດຕົວຈິງບັນລຸເຖິງ 496.71 ຕື້ຢວນ, ທຽບໃສ່ໄລຍະດຽວກັນຂອງປີຜ່ານມາເພີ່ມຂຶ້ນ 2,3%.
ເບິ່ງໃນດ້ານປະລິມານແລ້ວ, ການດຶງດູດທຶນຕ່າງປະເທດຂອງຈີນໄດ້ເພີ່ມຂຶ້ນຢ່າງໝັ້ນທ່ຽງໄປໃນທາງທີ່ດີ. ສິ່ງທີ່ສຳຄັນທີ່ສຸດກໍຄື, ຄຸນນະພາບການດຶງດູດທຶນຕ່າງປະເທດໄດ້ຍົກສູງຂຶ້ນຢ່າງໝັ້ນທ່ຽງ, ຈາກຂົງເຂດປຸງແຕ່ງທີ່ມີມູນຄ່າເພີ່ມໜ້ອຍຄ່ອງໆຫັນໄປສູ່ຂົງເຂດການຜະລິດດ້ວຍເຕັກນິກທີ່ມີມູນຄ່າເພີ່ມສູງ. ໂຄງປະກອບການດຶງດູດທຶນຕ່າງປະເທດໄດ້ຮັບການປັບປຸງໃຫ້ດີຂຶ້ນມີຜົນດີຕໍ່ການຊຸກຍູ້ເສດຖະກິດຈີນບັນລຸການພັດທະນາທີ່ມີຄຸນນະພາບສູງຢ່າງຈະແຈ້ງ.
ໃນໄລຍະເວລາທີ່ອາເມຣິກາກໍ່ສົງຄາມການຄ້າ, ສະຖານະການເສດຖະກິດໂລກສະຫຼັບສັບຊ້ອນ, ແຕ່ຈີນຍັງໄດ້ຮັບຜົນສຳເລັດໃນການດຶງດູດທຶນຕ່າງປະເທດ, ສາເຫດແມ່ນຫຍັງ?
ໜຶ່ງ, ແມ່ນຍ້ອນວ່າສະພາບແວດລ້ອມດຳເນີນທຸລະກິດຂອງຈີນໄດ້ປັບປຸງດີຂຶ້ນຢ່າງຕໍ່ເນື່ອງ, ຂໍ້ຈຳກັດດ້ານການລົງທຶນໄດ້ຫຼຸດລົງເທື່ອລະກ້າວ. ສອງ, ຈີນມີທ່າແຮງພິເສດດ້ານຕ່ອງໂສ້ອຸດສາຫະກຳ, ຄວາມສາມາດການຜະລິດຂະໜາດໃຫຍ່ແລະຕະຫຼາດ, ສາມາດສະໜອງຄວາມຮຽກຮ້ອງຕ້ອງການຢ່າງຄົບຖ້ວນໃຫ້ແກ່ການຜະລິດຂອງວິສາຫະກິດທຶນຕ່າງປະເທດ. ສາມ, ຈີນມີຄວາມຕັດສິນໃຈແລະມາດຕະການທີ່ສືບຕໍ່ເປີດກວ້າງການເປີດປະຕູສູ່ພາຍນອກ, ສິ່ງເຫຼົ່ານີ້ແມ່ນລ້ຳຄ່າໃນເງື່ອນໄຂທີ່ສຸດໃນປັດຈຸບັນທີ່ລັດທິປົກປ້ອງການຄ້າຟື້ນຄືນໃໝ່.ປັດຈຸບັນ, ຕະຫຼາດຈີນໄດ້ດຶງດູດທຶນຕ່າງປະເທດຢ່າງຕໍ່ເນື່ອງ, ສະແດງໃຫ້ເຫັນວ່າທຶນທົ່ວໂລກແລະບໍລິສັດຂ້າມຊາດມີຄວາມໝັ້ນໃຈມີຄວາມຫວັງຢ່າງເຕັມທີ່ຕໍ່ອະນາຄົດຂອງຈີນ, ພ້ອມທັງສະແດງໃຫ້ເຫັນວ່າໂລກາພິວັດເປັນຄຸນຄ່າຮ່ວມກັນຂອງປະເທດຕ່າງໆ. ມີບົດບາດສຳຄັນໃນການຊຸກຍູ້ການຮັກສາລະບົບການຄ້າຫຼາຍຝ່າຍແລະສ້າງເສດຖະກິດເປີດປະຕູຂອງໂລກ.
ປີນີ້ແມ່ນການປະຕິຮູບເປີດປະຕູສູ່ພາຍນອກຂອງຈີນຄົບຮອບ 40 ປີ. ທ່ານສີຈິ້ນຜິງ ປະທານປະເທດຈີນເຄີຍປະກາດໃນກອງປະຊຸມເວທີປຶກສາຫາລືເສດຖະກິດໂລກດາວົສໃນປີຜ່ານມາວ່າ, ເລີ່ມແຕ່ປີ 2017 ຫາປີ 2021, ຈີນຈະດຶງດູດທຶນຕ່າງປະເທດ 600 ຕື້ໂດລາສະຫະລັດ. ນີ້ແມ່ນໂອກາດໃໝ່ສຳລັບປະເທດຕ່າງໆຊຸກຍູ້ການພັດທະນາເສດຖະກິດສັງຄົມໂດຍບໍ່ຕ້ອງສົງໃສ. ໃນອະນາຄົດ, ຈີນຍັງຈະສືບຕໍ່ພັດທະນາໄປຕາມຈັງຫວະຂອງຕົນເອງ, ໂຍະຍານຄວາມຈຳກັດດ້ານການລົງທຶນຂອງນັກທຸລະກິດຕ່າງປະເທດຕື່ມອີກ, ສ້າງສະພາບແວດລ້ອມດຳເນີນທຸລະກິດທີ່ມີຊີວິດຊີວາຫຼາຍກວ່າເກົ່າ, ເຮັດໃຫ້ວິສາຫະກິດຕ່າງປະເທດສາມາດໄດ້ຮັບຜົນປະໂຫຍດຫຼາຍກວ່າເກົ່າຢູ່ຕະຫຼາດຈີນ.
ຄຳເຫັນ
0