ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ທ່ານມາຮາເທຍ ບິນ ໂມຮາມັດ ນາຍົກລັດຖະມົນຕີມາເລເຊຍທີ່ໄດ້ຮັບເລືອກຕັ້ງໃໝ່ໃນໄວອາຍຸ 93 ປີໄດ້ສິ້ນສຸດການຢ້ຽມຢາມຈີນເປັນຄັ້ງທຳອິດພາຍຫຼັງທ່ານດຳລົງຕຳແໜ່ງຄືນໃໝ່ໃນວັນທີ 21 ສິງຫານີ້. ສື່ມວນຊົນຕາເວັນຕົກສ່ວນຫຼາຍເຫັນວ່າ, ຫຼັກໝັ້ນຕໍ່ຈີນຂອງລັດຖະບານຊຸດໃໝ່ທີ່ນຳພາໂດຍທ່ານມາຮາເທຍຈະມີການປ່ຽນແປງອັນໃຫຍ່ຫຼວງ, ຈົນວ່າມີບາງສື່ວິເຄາະວ່າ ຈະມີນະໂຍບາຍວາງທິດທາງ “ຕ້ານຈີນ”. ແຕ່ວ່າ, ທ່ານມາຮາເທຍພັດເລືອກຈີນເປັນປະເທດທຳອິດນອກຈາກປະເທດອາຊຽນໃນການຢ້ຽມຢາມ ພາຍຫຼັງທ່ານດຳລົງຕຳແໜ່ງເປັນຕົ້ນມາ.
ໃນເວລາພົບປະກັບທ່ານມາຮາເທຍ, ທ່ານສີຈິ້ນຜິງ ປະທານປະເທດຈີນໄດ້ສະແດງຄວາມຍ້ອງຍໍຊົມເຊີຍຕໍ່ລັດຖະບານມາເລເຊຍ ແລະ ທ່ານມາຮາເທຍທີ່ໄດ້ໃຫ້ຄວາມສຳຄັນຢ່າງສູງຕໍ່ການພົວພັນຈີນ-ມາເລເຊຍ, ຍ້ອງຍໍຊົມເຊີຍທ່ານມາຮາເທຍທີ່ຖືຈີນຄືໂອກາດແຫ່ງການພັດທະນາ ແລະ ສະໜັບສະໜູນຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ແລະ ຍ້ອງຍໍຊົມເຊີຍທ່ານມາຮາເທຍທີ່ໄດ້ປະກອບສ່ວນສຳຄັນຕໍ່ການຊຸກຍູ້ການຮ່ວມມືໃນພາກພື້ນອາຊີ. ການຍ້ອງຍໍຊົມເຊີຍໃນສາມດ້ານນີ້ໄດ້ເປັນການຕີລາຄາສູງຕໍ່ບຸກຄົນສຳຄັນໃນການຊຸກຍູ້ການພົວພັນຈີນ-ມາເລເຊຍ ແລະ ເປັນນັກການເມືອງທີ່ມີປະສົບການທີ່ອຸດົມສົມບູນ.
ທ່ານມາຮາເທຍກ່າວວ່າ, ການຢ້ຽມຢາມຄັ້ງນີ້ມີຈຸດປະສົງສະແດງທ່າທີຕໍ່ລັດຖະບານແລະປະຊາຊົນຈີນວ່າ, ນະໂຍບາຍໄມຕີຈິດມິດຕະພາບຕໍ່ຈີນຂອງມາເລເຊຍຈະບໍ່ມີການປ່ຽນແປງ. ທ່ານມາຮາເທຍກ່າວວ່າ, ຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ທີ່ທ່ານປະທານສີຈິ້ນຜິງສະເໜີອອກມານັ້ນ ມີຈຸດປະສົງຊຸກຍູ້ການໄປມາຫາສູ່ ແລະ ການຮ່ວມມືພາກພື້ນ ເຊິ່ງຈະສ້າງຜົນປະໂຫຍດໃຫ້ແກ່ປະເທດທັງໝົດໃນພາກພື້ນ. ມາເລເຊຍສະໜັບສະໜູນແລະຍິນດີເຂົ້າຮ່ວມຢ່າງຕັ້ງໜ້າໃນການສ້າງ “ໜຶ່ງແລວໜຶ່ງເສັ້ນທາງ” ແລະ ເຊື່ອວ່າ ນີ້ຈະມີຜົນດີຕໍ່ການພັດທະນາແລະຄວາມຈະເລີນຮຸ່ງເຮືອງຂອງພາກພື້ນ.
ບໍລິສັດຫຼັກຊັບໂນມູຣະຂອງຍີ່ປຸ່ນໄດ້ເຜີຍແຜ່ບົດລາຍງານສະບັບໜຶ່ງໂດຍສະແດງໃຫ້ເຫັນວ່າ: ມາເລເຊຍເປັນໜຶ່ງໃນ 4 ກຸ່ມເສດຖະກິດອາຊີທີ່ໄດ້ຮັບຜົນປະໂຫຍດຫຼາຍກວ່າໝູ່ຈາກການສ້າງ “ໜຶ່ງແລວໜຶ່ງເສັ້ນທາງ”, ໄດ້ດຶງດູດການລົງທຶນທີ່ກ່ຽວຂ້ອງຫຼາຍກວ່າ 34,2 ຕື້ໂດລາສະຫະລັດ,ເທົ່າກັບປະມານ 10% ຂອງລວມຍອດຜະລິດຕະພັນພາຍໃນຫຼື GDP ຂອງປະເທດດັ່ງກ່າວ. ນັກວິເຄາະຊີ້ວ່າ: ພາຍໃຕ້ຂອບ“ໜຶ່ງແລວໜຶ່ງເສັ້ນທາງ”,ການຮ່ວມມືຕົວຈິງລະຫວ່າງຈີນ-ມາເລເຊຍໄດ້ກ້າວເຂົ້າສູ່ໄລຍະໃໝ່,ຜະເຊີນໜ້າທັງໂອກາດແລະສິ່ງທ້າທາຍ.
ເຖິງວ່າຜະເຊີນກັບສິ່ງທ້າທາຍກໍ່ຕາມ,ແຕ່ການຊຸກຍູ້ການຮ່ວມມືຕົວຈິງລະຫວ່າງສອງປະເທດມີໂອກາດຫຼາຍກວ່າເກົ່າ. ຈີນເປັນຄູ່ການຄ້າອັນດັບໜຶ່ງຂອງມາເລເຊຍໃນ 9 ປີລຽນຕິດ ແລະຈີນຍັງແມ່ນປະເທດນຳເຂົ້າສິນຄ້າໃຫຍ່ອັນດັບໜຶ່ງຈາກມາເລເຊຍຢູ່ເຂດອາຊຽນ. ຈີນໄດ້ເປັນປະເທດລົງທຶນທີ່ໃຫຍ່ອັນດັບໜຶ່ງຂອງຂະແໜງການຜະລິດຂອງມາເລເຊຍ 2 ປີລຽນຕິດ,ໄດ້ລົງທຶນໃນ 380 ກວ່າໂຄງການຢູ່ມາເລເຊຍຊຶ່ງໄດ້ສ້າງວຽກເຮັດງານທຳ 6 ໝື່ນກວ່າຕຳແໜ່ງໃຫ້ແກ່ປະຊາຊົນມາເລເຊຍ.ນອກນີ້,ຈີນຍັງມີຈຳນວນນັກທ່ອງທ່ຽວໃຫຍ່ອັນດັບໜຶ່ງໄປທ່ຽວມາເລເຊຍ 6 ປີລຽນຕິດ.
ການຮ່ວມມືຕົວຈິງພາຍໃຕ້ຂອບ“ໜຶ່ງແລວໜຶ່ງເສັ້ນທາງ”ໄດ້ກາຍເປັນຊ່ອງທາງໃໝ່ແຫ່ງການຮ່ວມມືລະຫວ່າງຈີນ-ມາເລເຊຍໂດຍບໍ່ຕ້ອງສົງໄສ. ພາຍໃຕ້ການຊີ້ນຳຈາກຜູ້ນຳຂອງສອງປະເທດ,ທັງສອງຝ່າຍຈະສາມາດສ້າງຈຸດພົ້ນເດັ່ນແຫ່ງການຮ່ວມມືອັນໃໝ່ຢ່າງແນ່ນອນ,ເພີ່ມທະວີການຮ່ວມມືຕື່ມອີກແລະຕໍ່ເນື່ອງ,ເປີດກວ້າງການຮ່ວມມືແບບຕ່າງຝ່າຍຕ່າງມີຜົນປະໂຫຍດ.
ຄຳເຫັນ
0