ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ໃນໄລຍະດຳເນີນກອງປະຊຸມເວທີປຶກສາຫາລືເສດຖະກິດຕາເວັນອອກຄັ້ງທີ 4 ທີ່ຫາກໍ່ອັດລົງຢູ່ນະຄອນວາລາດີໂວສຕອກ ປະເທດຣັດເຊຍໃນຫວ່າງກ່ອນນີ້ບໍ່ດົນ, ທ່ານສີຈິ້ນຜິງ ປະທານປະເທດຈີນແລະທ່ານອາລາດີເມຍ ປູຕິນ ປະທານາທິບໍດີຣັດເຊຍໄດ້ພົບປະກັນເປັນເທື່ອທີສາມພາຍໃນໄລຍະ 4 ເດືອນຜ່ານມາ. ການພົບປະແລກປ່ຽນກັນເລື້ອຍໆລະຫວ່າງປະມຸກລັດແບບນີ້ໄດ້ກາຍເປັນຈຸດພົ້ນເດັ່ນຈຸດໜຶ່ງຂອງການຂະຫຍາຍສາຍພົວພັນຈີນ-ຣັດເຊຍ ເປັນການຢັ້ງຢືນອີກເທື່ອໜຶ່ງວ່າ:ໃນໄລຍະ 5 ປີຜ່ານມາ, ທ່ານສີຈິ້ນຜິງແລະທ່ານປູຕິນໄດ້ພົບປະກັນຫຼາຍກວ່າ 20 ຄັ້ງ ອັນໄດ້ສ່ອງແສງໃຫ້ເຫັນເຖິງສາຍພົວພັນຈີນ-ຣັດເຊຍຖືກຍົກລະດັບສູງຂຶ້ນແລະມີຄວາມພິເສດ ທັງເນັ້ນໃຫ້ເຫັນເຖິງສາຍພົວພັນລະຫວ່າງສອງປະເທດເປັນບູລິມະສິດໃນວາລະວຽກງານການຕ່າງປະເທດຂອງກັນແລະກັນ. ມິດຕະພາບສ່ວນຕົວຂອງປະມຸກລັດສອງປະເທດໄດ້ເສີມຂະຫຍາຍບົດບາດຄວາມເປັນແບບຢ່າງທີ່ດີໃນການໄປມາຫາສູ່ກັນໃນທຸກລະດັບແລະທຸກຂົງເຂດລະຫວ່າງສອງປະເທດ.
ພາຍໃຕ້ການວາງແຜນຍຸດທະສາດ,ຊຸກຍູ້ໂດຍກົງແລະເປັນແບບຢ່າງທີ່ດີຂອງປະມຸກລັດສອງປະເທດ, ສາຍພົວພັນຄູ່ປະສານງານຍຸດທະສາດຮອບດ້ານຈີນ-ຣັດເຊຍໄດ້ກ້າວເຂົ້າສູ່ຍຸກໃໝ່ທີ່ຂະຫຍາຍຕົວ ໃຫຍ່ຫຼວງກວ່າເກົ່າແລະມີລະດັບສູງກວ່າເກົ່າ. ນອກຈາກປັບປຸງໂຄງປະກອບດ້ານການຄ້າລະຫວ່າງສອງປະເທດໃຫ້ດີຂຶ້ນທັງຄຸນນະພາບແລະປະລິມານແລ້ວ, ໂຄງການຮ່ວມມືຍຸດທະສາດສຳຄັນ ລະຫວ່າງສອງປະເທດໃນຂົງເຂດການລົງທຶນ,ພະລັງງານ,ຄົມມະນາຄົມ,ການກໍ່ສ້າງພື້ນຖານໂຄງລ່າງ, ການບິນກັບການບິນອະວະກາດແລະຂົງເຂດອື່ນໆກໍໄດ້ຮັບການຈັດຕັ້ງປະຕິບັດແລະມີຄວາມຄືບໜ້າເປັນຢ່າງດີ ຂະນະດຽວກັນຍັງ ມີຈຸດພົ້ນເດັ່ນຂອງການເຕີບໂຕໃໝ່ແຫ່ງການຮ່ວມມືໃນດ້ານວິທະຍາສາດເຕັກໂນໂລຊີ, ກະສິກຳ,ການຄ້າເອເລັກໂຕຣນິກແລະອື່ນໆອີກ.
ການໄປມາຫາສູ່ກັນລະຫວ່າງປະຊາຊົນສອງຊາດຢ່າງສະໜິດສະໜົມນັ້ນ. ປະມຸກລັດສອງປະເທດຮູ້ດີມາໂດຍຕະຫຼອດເຖິງ ບົດບາດສຳຄັນຂອງປະຊາຊົນທີ່ນິຍົມໄປມາຫາສູ່ກັນລະຫວ່າງສອງຊາດ, ມີພຽງແຕ່ສ້າງພື້ນຖານທາງຈິດໃຈຂອງປະຊາຊົນໃຫ້ໝັ້ນຄົງເທົ່ານັ້ນ ຈິ່ງຈະສາມາດກໍ່ສ້າງຕຶກສູງແຫ່ງມິດຕະພາບຈີນ-ຣັດເຊຍທີ່ສືບທອດກັນໄປທຸກເຊັ່ນຄົນ. ເດືອນກໍລະກົດປີຜ່ານມາ, ຢູ່ນະຄອນຫຼວງມົສກູ ປະເທດຣັດເຊຍ, ທ່ານປະທານສີຈິ້ນຜິງແລະທ່ານປະທານາທິບໍດີປູຕິນໄດ້ຮ່ວມກັນລົງນາມໃນຖະແຫຼງການຮ່ວມລະຫວ່າງສປຈີນກັບສະຫະພັນຣັດເຊຍວ່າດ້ວຍການລົງເລິກສາຍພົວພັນຄູ່ຮ່ວມປະສານງານທາງຍຸດທະສາດຮອບດ້ານຕື່ມອີກ ເຊິ່ງໄດ້ເນັ້ນເປັນພິເສດວ່າ: ການເຊື່ອມສານຈິດໃຈລະຫວ່າງປະຊາຊົນແລະການເຊື່ອມໂຍງດ້ານວັດທະນະທຳເປັນພື້ນຖານຂອງມິດຕະພາບອັນໝັ້ນຄົງຂະໜົງແກ່ນລະຫວ່າງສອງປະເທດ.
ພາຍໃຕ້ການນຳພາຂອງປະມຸກລັດສອງປະເທດ, ພື້ນຖານ ທາງສັງຄົມແລະທາງຈິດໃຈຂອງປະຊາຊົນບົນຈິດໃຈມິດຕະພາບຈີນ-ຣັດເຊຍນັບມື້ນັບໜັກແໜ້ນກວ່າເກົ່າ. ຜ່ານຈາກການຈັດກິດຈະກຳສະເພາະລະດັບຊາດເຊັ່ນ ກິດຈະກຳປີມິດຕະພາບ, ປີພາສາຂອງກັນແລະກັນ,ປີທ່ອງທ່ຽວ,ປີແລກປ່ຽນມິດຕະພາບຊາວໜຸ່ມ, ປີແລກປ່ຽນສື່ມວນຊົນ, ປີແລກປ່ຽນການຮ່ວມມືລະຫວ່າງທ້ອງຖິ່ນແລະອື່ນໆ, ການໄປມາຫາສູ່ກັນລະຫວ່າງປະຊາຊົນຈີນ-ຣັດເຊຍນັບມື້ນັບແໜ້ນແຟ້ນແລະສະໜິດສະໜົມຍິ່ງຂຶ້ນ ແລະມີຄວາມເຂົ້າໃຈກັນເລິກເຊິ່ງຍິ່ງໆຂຶ້ນ.
ສາຍພົວພັນຈີນ-ຣັດເຊຍເປັນແບບຢ່າງແຫ່ງສາຍພົວພັນລະຫວ່າງປະເທດໃຫຍ່ແລະລະຫວ່າງປະເທດບ້ານໃກ້ເຮືອນຄຽງ ທັງສ່ອງແສງໃຫ້ເຫັນເຖິງພຶດຕິກຳທີ່ສຳເລັດຜົນຂອງນະໂຍບາຍການຕ່າງປະເທດຂອງປະເທດໃຫຍ່ທີ່ມີສີສັນພິເສດຂອງຈີນ. ຄືດັ່ງທີ່ທ່ານວາງຢີ້ ທີ່ປຶກສາແຫ່ງລັດ ທັງເປັນລັດຖະມົນຕີກະຊວງການຕ່າງປະເທດຈີນກ່າວວ່າ: ພາຍໃຕ້ການເອົາໃຈໃສ່ແລະບຳລຸງກໍ່ສ້າງຂອງປະມຸກລັດສອງປະເທດຈີນ-ຣັດເຊຍ, ຄວາມເຂົ້າໃຈກັນແລະຄວາມສະໜິດສະໜົມລະຫວ່າງປະຊາຊົນສອງຊາດຈະຄ່ອຍໆທ້ອນໂຮມເຂົ້າກັນກາຍເປັນມິດຕະພາບຈີນ-ຣັດເຊຍທີ່ຈະສືບທອດກັນໄປທຸກເຊັ່ນຄົນ ແລະກາຍເປັນພະລັງຂັບເຄື່ອນທີ່ບໍ່ເຫືອດແຫ້ງໃນການຊຸກຍູ້ສາຍພົວພັນສອງປະເທດໃຫ້ຂະຫຍາຍຕົວຢ່າງບໍ່ຢຸດຢັ້ງ.
ຄຳເຫັນ
0