ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕາມຂ່າວCRI:ວັນທີ 21 ກັນຍານີ້, ທ່ານສີຈິ້ນຜີງ, ເລຂາທິການໃຫຍ່ສູນກາງພັກກອມມູນິດຈີນ, ປະທານປະເທດຈີນໄດ້ສົ່ງສານໄວ້ອາໄລໄປຍັງທ່ານຫງວຽນ ຟູ ຈ້ອງ, ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ, ໂດຍຕາງໜ້າພັກ, ລັດຖະບານແລະປະຊາຊົນຈີນ, ແລະໃນນາມສ່ວນຕົວສະແດງຄວາມໄວ້ອາໄລຢ່າງເສຍໃຈທີ່ສຸດຕໍ່ການເຖິງແກ່ກຳຂອງທ່ານເຈິ່ນ ດ້າຍ ກວາງ, ປະທານປະເທດຫວຽດນາມ, ແລະສະແດງຄວາມຢື້ຢາມຖາມຂ່າວຢ່າງເລິກເຊິ່ງທີ່ສຸດຕໍ່ຄອບຄົວຂອງທ່ານ. ເນື້ອໃນຂອງສານມີດັ່ງນີ້:
ເມື່ອໄດ້ຮັບຊາບຢ່າງຕົກໃຈວ່າສະຫາຍເຈິ່ນ ດ້າຍ ກວາງ, ປະທານປະເທດສາທາລະນະລັດສັງຄົມນິຍົມຫວຽດນາມໄດ້ເຖິງແກ່ມໍລະນະກຳ, ຂ້າພະເຈົ້າຂໍຕາງໜ້າພັກກອມມູນິດ, ລັດຖະບານ, ປະຊາຊົນຈີນແລະໃນນາມສ່ວນຕົວ, ສະແດງຄວາມໄວ້ອາໄລຢ່າງເສຍໃຈທີ່ສຸດຕໍ່ທ່ານແລະຜ່ານຈາກທ່ານໄປຍັງພັກກອມມູນິດຫວຽດນາມ, ລັດຖະບານແລະປະຊາຊົນຫວຽດນາມກ່ຽວກັບການເຖິງແກ່ກຳຂອງສະຫາຍເຈິ່ນດ້າຍກວາງ. ພວກຂ້າພະເຈົ້າຮູ້ສຶກເສົ້າສະຫຼົດໃຈທີ່ສຸດຕໍ່ການເຖິງແກ່ກຳຂອງທ່ານເຈິ່ນ ດ້າຍ ກວາງ.
ສະຫາຍເຈິ່ນ ດ້າຍ ກວາງແມ່ນຜູ້ນຳຜູ້ດີເດັ່ນຂອງພັກແລະລັດຫວຽດນາມ, ໄດ້ປະກອບສ່ວນອັນສຳຄັນເຂົ້າໃນການພັດທະນາຂອງປະເທດແລະພາລະກິດປ່ຽນແປງໃໝ່ແລະເປີດປະຕູສູ່ພາຍນອກຂອງຫວຽດນາມ. ສະຫາຍເຈິ່ນ ດ້າຍ ກວາງເປັນສະຫາຍແລະເພື່ອນມິດທີ່ສະໜິດສະໜົມຂອງປະຊາຊົນຈີນ, ໄດ້ສຸມກຳລັງເຂົ້າໃນການສືບທອດແລະສົ່ງເສີມມິດຕະພາບອັນເປັນມູນເຊື້ອລະຫວ່າງຈີນກັບຫວຽດນາມ, ຕັ້ງໜ້າຊຸກຍູ້ການຂະຫຍາຍການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດ.
ຂ້າພະເຈົ້າເຊື່ອໝັ້ນວ່າ, ພາຍໃຕ້ການນຳພາຢ່າງເຂັ້ມແຂງຂອງສະຫາຍເລຂາທິການໃຫຍ່, ພັກ, ລັດຖະບານແລະປະຊາຊົນຫວຽດນາມຍ່ອມຈະສາມາດຫັນຄວາມໂສກເສົ້າໃຫ້ກາຍເປັນກຳລັງໃຈແລະໄດ້ຮັບຜົນສຳເລັດໃໝ່ຢ່າງບໍ່ຢຸດຢັ້ງໃນພາລະກິດສ້າງສາສັງຄົມນິຍົມ.
ຂ້າພະເຈົ້າຂໍຝາກຄວາມຢື້ຢາມຖາມຂ່າວຢ່າງເລິກເຊິ່ງທີ່ສຸດໄປຍັງຄອບຄົວຂອງສະຫາຍເຈິ່ນ ດ້າຍ ກວາງ.
ຄຳເຫັນ
0