ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕອນທ່ຽງວັນທີ 21 ກັນຍານີ້, ກຳປັ່ນປະຕິບັດໜ້າທີ່ 2 ລຳຂອງຝ່າຍຈີນ ທີ່ເຂົ້າຮ່ວມການເຄື່ອນໄຫວລາດຕະເວນຮ່ວມຈີນ-ລາວ-ມຽນມ້າ-ໄທ ເພື່ອປະຕິບັດກົດໝາຍຕາມແມ່ນ້ຳຂອງ ຄັ້ງທີ 74 ໄດ້ເດີນກັບຢ່າງສະດວກແລະຈອດຢູ່ທ່າກ່ວນເຫຼີຍຂອງຈີນ, ເຊິ່ງສະແດງໃຫ້ເຫັນວ່າ, ການເຄື່ອນໄຫວເທື່ອນີ້ໄດ້ສຳເລັດຜົນຢ່າງຈົບງາມ.
ຕາມຂ່າວແຈ້ງວ່າ, ການເຄື່ອນໄຫວລາດຕະເວນຮ່ວມຂອງ 4 ປະເທດດັ່ງກ່າວໃນຄັ້ງນີ້ ເລີ່ມແຕ່ວັນທີ 18 ກັນຍານີ້, ຈີນ, ລາວ, ມຽນມ້າແລະໄທໄດ້ສົ່ງກຳປັ່ນປະຕິບັດໜ້າທີ່ລວມ 7 ລຳ ແລະພະນັກງານປະຕິບັດກົດໝາຍ 166 ຄົນເຂົ້າຮ່ວມ, ໃຊ້ເວລາ 4 ມື້ 3 ຄືນ, ເດີນເຮືອ 511 ກິໂລແມັດ.
ໃນໄລຍະລາດຕະເວນຮ່ວມ, 4 ຝ່າຍໄດ້ຮ່ວມກັນດຳເນີນການເຄື່ອນໄຫວຕ່າງໆຢູ່ເຂດນ້ຳທີ່ສຳຄັນ, ເຊັ່ນ: ການກວດກາຮ່ວມຢ່າງເປີດເຜີຍ, ການຢາມປະຊາຊົນຮ່ວມ, ການໂຄສະນາການປາບປາມຢາເສບຕິດແລະອື່ນໆ, ເພື່ອໂຈມຕີອາຊະຍະກຳຕ່າງໆຢູ່ລ້ອງແມ່ນ້ຳຂອງ, ເຊັ່ນ: ການຄ້າຢາເສບຕິດ, ການຄ້າເຖື່ອນ, ການລັກຂ້າມຊາຍແດນແລະອື່ນໆ, ເຊິ່ງໄດ້ເຮັດໃຫ້ພວກອາຊະຍະກອນປະເພດຕ່າງໆທີ່ເຄື່ອນໄຫວຢູ່ຕາມລ່ອງແມ່ນ້ຳຂອງຮູ້ສຶກເກງຂາມ.
ຜູ້ຮັບຜິດຊອບທີ່ກ່ຽວຂ້ອງຂອງກອງປ້ອງກັນຊາຍແດນແຂວງຢຸນນານຈີນກ່າວວ່າ, ນັບແຕ່ເລີ່ມດຳເນີນການລາດຕະເວນຮ່ວມຕາມແມ່ນ້ຳຂອງເປັນຕົ້ນມາ, ພາຍໃຕ້ຄວາມພະຍາຍາມຮ່ວມຂອງພາກສ່ວນປະຕິບັດກົດໝາຍຂອງ 4 ປະເທດ, ອາຊະຍະກຳປະເພດຕ່າງໆຢູ່ລ່ອງແມ່ນ້ຳຂອງໄດ້ຖືກສະກັດກັ້ນຢ່າງບັງເກີດຜົນ, ສະພາບຄວາມສະຫງົບຕາມລ່ອງແມ່ນ້ຳຂອງໄດ້ຮັບການປັບປຸງໃຫ້ດີຂຶ້ນຢ່າງບັງເກີດຜົນ. ການຮັກສາຄວາມປອດໄພຄວາມໝັ້ນຄົງຂອງລ່ອງແມ່ນ້ຳຂອງ, ສ້າງແມ່ນ້ຳຂອງໃຫ້ເປັນແມ່ນ້ຳປອດໄພແລະແມ່ນ້ຳທີ່ມີຄວາມສະຫງົບສຸກ, ແມ່ນຄວາມປາຖະໜາຮ່ວມຂອງບັນດາປະເທດຕາມລ່ອງແມ່ນ້ຳຂອງ, ສອດຄ່ອງກັບຄວາມຫວັງຂອງປະຊາຊົນຕາມສອງຝາກຝັ່ງ, ແລະກໍ່ເປັນໜ້າທີ່ຮ່ວມຂອງພາກສ່ວນປະຕິບັດກົດໝາຍຂອງ 4 ປະເທດ.
ຄຳເຫັນ
0