ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ພິທີລົງນາມໃນສັນຍາວ່າດ້ວຍລັດຖະບານຈີນຊ່ວຍເຫຼືອລັດຖະບານມຽນມາປະຕິສັງຂອນພະທາດທັດບິນຢູ ພະທາດສູງສຸດຂອງເມືອງບາການ ໄດ້ຈັດຂຶ້ນໃນວັນທີ 22 ກັນຍານີ້ຢູ່ບາການ “ເມືອງແຫ່ງພະທາດ” ເຊິ່ງເປັນຂີດໝາຍສະແດງໃຫ້ເຫັນວ່າ ການຮ່ວມມືລະຫວ່າງຈີນ-ມຽນມາໃນການປະຕິສັງຂອນພະທາດບາການໄດ້ເລີ່ມປະຕິບັດຢ່າງເປັນທາງການ ທັງເປັນເທື່ອທຳອິດທີ່ສອງປະເທດຮ່ວມມືໃນວຽກງານດ້ານນີ້.
ພະທາດບາການເປັນມໍລະດົກວັດທະນະທຳທີ່ສຳຄັນຂອງໂລກ, ມີພະທາດນ້ອຍໃຫຍ່ນັບເປັນຫຼາຍພັນແຫ່ງ. ເດືອນສິງຫາປີ 2016, ພະທາດຫຼາຍແຫ່ງເຊິ່ງລວມທັງພະທາດທັດບິນຢູ ໄດ້ຮັບຜົນເສຍຫາຍຈາກໄພແຜ່ນດິນໄຫວ. ຈາກນັ້ນ, ລັດຖະບານຈີນໄດ້ສະໜອງເງິນຊ່ວຍເຫຼືອ 1 ລ້ານໂດລາສະຫະລັດໃຫ້ລັດຖະບານມຽນມາໂດຍທັນທີ ເພື່ອໃຊ້ເຂົ້າໃນວຽກງານປະຕິສັງຂອນພະທາດຢ່າງຮີບດ່ວນ. ເດືອນພຶດສະພາປີ 2017 ຜ່ານມາ, ຢູ່ນະຄອນຫຼວງປັກກິ່ງ, ພາກສ່ວນກ່ຽວຂ້ອງຂອງລັດຖະບານສອງປະເທດຈີນ-ມຽນມາໄດ້ເຊັນບົດບັນທຶກຄວາມເຂົ້າໃຈວ່າດ້ວຍການຮ່ວມມືປະຕິສັງຂອນແລະອະນຸລັກຮ່ອງຮອຍບູຮານສະຖານບາການຫຼັງແຜ່ນດິນໄຫວ.
ຕາມສັນຍາທີ່ສອງປະເທດເຊັ່ນກັນໃນວັນທີ 22 ກັນຍານີ້, ຜູ້ຊ່ຽວຊານວັດຖຸບູຮານຂອງຈີນຈະເຂົ້າປະຈຳການຢູ່ເມືອງບາການເພື່ອຮ່ວມກັບຊ່ຽວຊານມຽນມ້າປະຕິສັງຂອນພະທາດທັດບິນຢູຢ່າງຮອບດ້ານ ແລະລັດຖະບານຈີນຈະລົງທຶນປະມານ 200 ລ້ານຢວນຫຼືປະມານ 29 ລ້ານ 2 ແສນໂດລາສະຫະລັດເຂົ້າໃນວຽກງານປະຕິສັງຂອນຄັ້ງນີ້. ທ່ານຫົງລຽງ ເອກອັກຄະລັດຖະທູດຈີນປະຈຳມຽນມາຢືນຢັນໃນພິທີລົງນາມວ່າ: ຈີນ-ມຽນມາຮ່ວມມືກັນດຳເນີນການປະຕິສັງຂອນພະທາດບາການເທື່ອນີ້ເປັນເທື່ອທຳອິດ ແລະເປັນນິມິດໝາຍສຳຄັນໃນປະຫວັດສາດແຫ່ງການແລກປ່ຽນວັດທະນະທຳທາງພຸດທະສາສະໜາລະຫວ່າງສອງປະເທດ ແລະຈະເກີດມີຜົນສະທ້ອນເລິກເຊິ່ງຍາວໄກຕໍ່ ພຸດທະສາສະໜາຈີນ-ມຽນມາກໍຄືມິດຕະພາບຖານອ້າຍນ້ອງລະຫວ່າງສອງປະເທດ. ເຊື່ອໝັ້ນວ່າ ຫຼັງຈາກສຳເລັດການປະຕິສັງຂອນແລ້ວ, ພະທາດທັດບິນຢູຈະກາຍເປັນສັນຍາລັກໃໝ່ແຫ່ງມິດຕະພາບຈີນ-ມຽນມາ.
ທ່ານອ໋ອງໂກ ລັດຖະມົນຕີກະຊວງສາສະໜາແລະວັດທະນະທຳມຽນມາໄດ້ສະແດງຄວາມຂອບໃຈຕໍ່ການສະໜັບສະໜູນຈາກລັດຖະບານຈີນ, ທ່ານກ່າວວ່າ: ຊ່ຽວຊານສະຖາປັດຕະຍະກຳຈີນທີ່ເດີນທາງມາມຽນມາເພື່ອຮ່ວມມືກັນທັງເປັນການປະກອບສ່ວນເຂົ້າໃນການປະຕິສັງຂອນພະທາດນັ້ນຍືນຍົງຄົງຕົວຢູ່ແຜ່ນດິນບາການສືບຕໍ່ໄປ ທັງເປັນສັນຍາລັກທີ່ສະແດງໃຫ້ເຫັນວ່າ ມິດຕະພາບແລະການຮ່ວມມືລະຫວ່າງມຽນມາ-ຈີນຈະສືບຕໍ່ໄປຢ່າງຍາວນານ.
ຄຳເຫັນ
0