ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 24 ກັນຍານີ້, ທ່ານວາງຢີ້ ທີ່ປຶກສາແຫ່ງລັດ ທັງເປັນລັດຖະມົນຕີກະຊວງການຕ່າງປະເທດຈີນໄດ້ເຂົ້າຮ່ວມກອງປະຊຸມວິສາມັນລັດຖະມົນຕີກະຊວງການຕ່າງປະເທດຂອງປະເທດສະມາຊິກກອງປະຊຸມປະສານງານແລະໄວ້ເນື້ອເຊື່ອໃຈກັນຂອງອາຊີ ຫຼື CICA ທີ່ຈັດຂຶ້ນຢູ່ນະຄອນນິວຢອກ ເຊິ່ງມີລັດຖະມົນຕີກະຊວງການຕ່າງປະເທດ ຫຼືຜູ້ຕາງໜ້າຂອງປະເທດສະມາຊິກ CICA ເຂົ້າຮ່ວມ.
ທ່ານວາງຢີ້ກ່າວວ່າ, ນັບແຕ່ຈີນເປັນປະເທດປະທານ CICA ໃນເດືອນກັນຍາປີ 2014 ເປັນຕົ້ນມາ, ຈີນໄດ້ຊຸກຍູ້ຂະບວນການ CICA ໃຫ້ມີຄວາມຄືບໜ້າຕ່າງໆ . ພາຍໃຕ້ຄວາມພະຍາຍາມຮ່ວມຂອງບັນດາຝ່າຍ, ການຮ່ວມມືພາຍໃຕ້ຂອບ CICA ໄດ້ເສີມຂະຫຍາຍບົດບາດທີ່ມີລັກສະນະສ້າງສັນສຳຄັນໃນການຊຸກຍູ້ສະຖຽນລະພາບ ແລະ ຄວາມຈະເລີນຮຸ່ງເຮືອງຂອງພາກພື້ນ.
ທ່ານວາງຢີ້ກ່າວເນັ້ນວ່າ, ໃນຖານະເປັນຜູ້ລິເລີ່ມ, ຜູ້ເຂົ້າຮ່ວມ ແລະ ຜູ້ຊຸກຍູ້ການຮ່ວມມືພາກພື້ນອາຊີ, ຈີນຮຽກຮ້ອງໃຫ້ທຸກປະເທດສະມາຊິກຮ່ວມກັນຊຸກຍູ້ຂະບວນການ CICA. ບັນດາຝ່າຍຄວນສືບຕໍ່ປຶກສາຫາລືເສີມສ້າງໂຄງຮ່າງຄວາມໝັ້ນຄົງພາກພື້ນທີ່ສອດຄ່ອງກັບຈຸດພິເສດຂອງອາຊີ, ຄົ້ນຄວ້າ ແລະ ຊຸກຍູ້ໃຫ້ CICA ເຂົ້າຮ່ວມການແກ້ໄຂບັນຫາພົ້ນເດັ່ນຂອງພາກພື້ນ. ຕ້ອງລົງເລິກການຮ່ວມມືສ້າງມາດຕະການໄວ້ເນື້ອເຊື່ອໃຈກັນໃນທຸກຂົງເຂດ ເພື່ອຮັບປະກັນໃຫ້ກົນໄກທີ່ກ່ຽວຂ້ອງຂອງ CICA ດຳເນີນໄປດ້ວຍດີ ແລະ ບົນພື້ນຖານປະຊາມະຕິຂອງ CICA ທີ່ໝັ້ນຄົງ. ຄວນຂະຫຍາຍປະເທດສະມາຊິກ CICA ຕື່ມອີກ, ເປີດກວ້າງການຮ່ວມມືລະຫວ່າງ CICA ກັບປະເທດຕ່າງໆ ແລະ ອົງການຈັດຕັ້ງສາກົນຕ່າງໆ ພ້ອມທັງເພີ່ມທະວີບົດບາດຂອງສຳນັກເລຂາ CICA.
ໃນກອງປະຊຸມ, ບັນດາຝ່າຍເປັນເອກະພາບກັນເຫັນດີຕັ້ງໜ້າຊຸກຍູ້ການສ້າງການພົວພັນສາກົນແບບໃໝ່ ແລະ ຮ່ວມກັນສ້າງປະຊາຄົມຮ່ວມຜົນປະໂຫຍດ, ຮັບຜິດຊອບຮ່ວມກັນ ແລະ ຮ່ວມຊາຕາກຳມວນມະນຸດ.
ຄຳເຫັນ
0