ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕໍ່ກັບກໍລະນີທີ່ຝ່າຍອາເມຣິກາຕຳໜິຈີນເກ້ຍກ່ອມ 3 ປະເທດອາເມຣິກາລາຕິນໃຫ້ຕັດສາຍພົວພັນທາງການທູດກັບໄຕ້ຫວັນ ເຊິ່ງເປັນການຂົ່ມຂູ່ຕໍ່ສະຖຽນລະພາບຢູ່ຊ່ອງແຄບໄຕ້ຫວັນນັ້ນ ທ່ານລູ້ຄ່າງ ໂຄສົກກະຊວງການຕ່າງປະເທດຈີນໄດ້ຕອບໂຕ້ໃນວັນທີ 15 ຕຸລານີ້ວ່າ: ຄຳຕຳໜິຂອງອາເມຣິກາເປັນການກັບດຳເປັນຂາວ ແລະ ຫຼອກຫູລວງຕາທັງນັ້ນ.
ໃນກອງປະຊຸມຖະແຫຼງຂ່າວຂອງກະຊວງການຕ່າງປະເທດຈີນໃນວັນດັ່ງກ່າວ, ທ່ານລູ້ຄ່າງ ກ່າວວ່າ: ໃນໂລກນີ້ມີພຽງປະເທດຈີນດຽວເທົ່ານັ້ນ, ໄຕ້ຫວັນແມ່ນດິນແດນສ່ວນໜຶ່ງຂອງຈີນທີ່ຕັດແຍກອອກບໍ່ໄດ້, ອິດທິກຳລັງແບ່ງແຍກດິນແດນໄຕ້ຫວັນອອກເປັນເອກະລາດພ້ອມການເຄື່ອນໄຫວຂອງເຂົາເປັນໄພຂົ່ມຂູ່ໃຫຍ່ຫຼວງທີ່ສຸດຕໍ່ສັນຕິພາບແລະສະຖຽນລະພາບຢູ່ຊ່ອງແຄບໄຕ້ຫວັນ. ຂະນະທີ່ການກະທຳຜິດພາດຕ່າງໆຂອງອາເມຣິກາໃນໄລຍະຜ່ານມາໃນບັນຫາໄຕ້ຫວັນ ໄດ້ຝຶນກັບຫຼັກການປະເທດຈີນດຽວ ແລະ ເນື້ອໃນຈິດໃຈໃນຖະແຫຼງການຮ່ວມຈີນ-ອາເມຣິກາ 3 ສະບັບຢ່າງໜັກໜ່ວງ ເຊິ່ງສົ່ງຜົນເຮັດໃຫ້ອິດທິກຳລັງແບ່ງແຍກໄຕ້ຫວັນໂອຫັງບັງອາດຍິ່ງຂຶ້ນ ແລະ ໄດ້ທຳລາຍສາຍພົວພັນລະຫວ່າງຈີນ-ອາເມຣິກາແລະສັນຕິພາບ-ສະຖຽນລະພາບຢູ່ຊ່ອງແຄບໄຕ້ຫວັນ.
ທ່ານລູ້ຄ່າງກ່າວຕື່ມວ່າ: ຈີນເຕືອນໃຫ້ອາເມຣິກາແກ້ໄຂຄວາມຜິດພາດຂອງຕົນ, ຢຸດຕິການໄປມາຫາສູ່ກັນລະຫວ່າງທາງການແລະການພົວພັນທາງການທະຫານກັບໄຕ້ຫວັນ, ຢຸດຕິຂາຍອາວຸດຍຸດໂທປະກອນໃຫ້ໄຕ້ຫວັນ, ຢຸດຕິການແຊກແຊງປະເທດທີ່ໄດ້ ຫຼື ຫວັງຈະສ້າງສາຍພົວພັນທາງການທູດກັບຈີນດ້ວຍກຳລັງອາວຸດ, ຈຳກັດການແຜ່ຂະຫຍາຍຂອງອິດທິກຳລັງແບ່ງແຍກໄຕ້ຫວັນຢ່າງແທ້ຈິງ ເພື່ອຫຼີກເວັ້ນບໍ່ໃຫ້ສາຍພົວພັນລະຫວ່າງຈີນ-ອາເມຣິກາແລະສັນຕິພາບ-ສະຖຽນລະພາບຢູ່ຊ່ອງແຄບໄຕ້ຫວັນຖືກທຳລາຍອີກ.
ຄຳເຫັນ
0