ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 12 ຕຸລານີ້, ທ່ານຊຸ່ຍທ່ຽນໄຂ ເອກອັກຄະລັດຖະທູດຈີນປະຈຳອາເມຣິກາ ໄດ້ໃຫ້ສຳພາດຕໍ່ທ່ານຄຣິສ ວອນເລສ ຜູ້ຈັດທຳລາຍການ “ຂ່າວວັນອາທິດ” ໂທລະພາບຟອກສ໌ ອາເມຣິກາ ໂດຍໄດ້ຕອບຄຳຖາມສຳພາດກ່ຽວກັບສາຍພົວພັນລະຫວ່າງຈີນ-ອາເມຣິກາ, ຄວາມຂັດແຍ້ງທາງເສດຖະກິດການຄ້າ, ບັນຫານິວເຄຼຍແຫຼມເກົາຫຼີ ແລະອື່ນໆ.
ໃນຂະນະທີ່ຕອບຄຳຖາມສຳພາດກ່ຽວກັບ “ສົງຄາມການຄ້າ” ນັ້ນ, ທ່ານຊຸ່ນທ່ຽນໄຂ ກ່າວວ່າ: ຈີນບໍ່ຢາກເຮັດສົງຄາມການຄ້າບໍ່ວ່າດ້ວຍຮູບການໃດໆ ກັບອາເມຣິກາ ຫຼື ກັບປະເທດອື່ນ ແຕ່ຖ້າວ່າມີຜູ້ໃດຍຶດໝັ້ນໃນການກໍ່ສົງຄາມການຄ້າກັບຈີນ ຈີນກໍຈຳເປັນຕ້ອງຕອບໂຕ້ ເພື່ອປົກປ້ອງຜົນປະໂຫຍດຂອງຕົນ. ຈີນ ແລະ ອາເມຣິກາໃນຖານະເປັນສອງປະເທດເສດຖະກິດທີ່ໃຫຍ່ກວ່າໝູ່ໃນໂລກ ມີຄວາມຮັບຜິດຊອບໃນການປົກປັກຮັກສາສາຍພົວພັນລະຫວ່າງສອງຝ່າຍຢ່າງສ້າງສັນແລະຕັ້ງໜ້າ ເຊິ່ງຈະສາມາດເຮັດໃຫ້ປະຊາຊົນປະເທດຕ່າງໆໃນໂລກມີຄວາມໝັ້ນໃຈຕໍ່ອະນາຄົດຂອງເສດຖະກິດໂລກເພີ່ມຂຶ້ນ.
ຕໍ່ກັບຖ້ອຍຄຳຂອງຝ່າຍອາເມຣິກາທີ່ວ່າ “ການພັດທະນາຂອງຈີນໄດ້ອີງອາໄສການລັກຊັບສິນທາງປັນຍາ ແລະ ບັງຄັບໃຫ້ຖ່າຍໂອນເຕັກໂນໂລຊີ” ນັ້ນ, ທ່ານຊຸ່ນທ່ຽນໄຂ ກ່າວວ່າ: ຄຳກ່າວຫາເຫຼົ່ານີ້ບໍ່ມີມູນຄວາມຈິງແຕ່ປະການໃດ ແລະ ບໍ່ເປັນທຳຕໍ່ປະຊາຊົນຈີນ. ຈີນມີປະຊາກອນເກືອບ 1,4 ຕື້ຄົນ ຈຶ່ງຍາກທີ່ຈິນຕະນາການໄດ້ວ່າ, ປະຊາກອນທີ່ກວມ 1/5 ຂອງປະຊາກອນໂລກຈຳນວນນີ້ເມື່ອສະແຫວງຫາການພັດທະນາແລະຄວາມຈະເລີນຮຸ່ງເຮືອງນັ້ນ, ພັດບໍ່ໄດ້ອາໄສຄວາມບາກບັ່ນສູ້ຊົນຕົ້ນຕໍຂອງຕົນເອງ ແຕ່ພັດລັກສິ່ງຕ່າງໆຈາກຜູ້ອື່ນ ຫຼື ບັງຄັບໃຫ້ຜູ້ອື່ນຖ່າຍໂອນເຕັກໂນໂລຊີໃຫ້ນັ້ນແມ່ນເປັນໄປບໍ່ໄດ້ ເພາະຄວາມດຸໝັ່ນຂະຫຍັນພຽນ ແລະ ຄວາມພະຍາຍາມຂອງປະຊາຊົນຈີນບໍ່ດ້ອຍໜ້າກວ່າຜູ້ອື່ນໝົດໃນໂລກນີ້.
ໃນເວລາຕອບຄຳຖາມສຳພາດກ່ຽວກັບເຫດການທີ່ກຳປັ່ນຮົບຂອງສອງປະເທດຈີນແລະອາເມຣິກາຫຍັບເຂົ້າໃກ້ກັນຢູ່ເຂດທະເລຈີນໃຕ້ ແລະ ບັນຫາທີ່ອາເມຣິກາຂາຍອາວຸດຍຸດໂທປະກອນໃຫ້ໄຕ້ຫວັນນັ້ນ, ທ່ານຊຸ່ຍທ່ຽນໄຂ ກ່າວວ່າ: ເຫດການນີ້ໄດ້ເກີດຂຶ້ນຢູ່ທະເລຈີນໃຕ້ ໝາຍຄວາມວ່າໄດ້ເກີດຂຶ້ນຢູ່ໜ້າປະຕູຂອງຈີນ ສະນັ້ນ, ມັນບໍ່ແມ່ນກຳປັ່ນຮົບຈີນແລ່ນໄປເຖິງຊາຍຝັ່ງທະເລລັດກາລີຟໍເນຍ ຫຼື ອ່າວແມັກຊິກ ແຕ່ແມ່ນກຳປັ່ນຮົບອາເມຣິກາໄດ້ແລ່ນມາເຖິງເຂດທະເລທີ່ໃກ້ເກາະແລະຊາຍຝັ່ງທະເລຂອງຈີນຫຼາຍທີ່ສຸດ ດັ່ງນັ້ນ, ໃຜຜິດໃຜຖືກ ມັນຈະແຈ້ງທີ່ສຸດແລ້ວ.
ຄຳເຫັນ
0