ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ໂດຍຕອບສະໜອງຕາມການເຊື້ອເຊີນຂອງທ່ານ ໂດໂນ ທຸສ ປະທານຄະນະມົນຕີເອີຣົບ, ທ່ານ ຢັງ ຄລອດ ຢູເງເຄີ ປະທານຄະນະກຳມະການສະຫະພາບເອີຣົບ ແລະ ທ່ານ ຊາເລັສ ມີແຊວ ນາຍົກລັດຖະມົນຕີແບນຊິກ, ຕອນຄ່ຳວັນທີ 16 ຕຸລານີ້ຕາມເວລາທ້ອງຖິ່ນ, ທ່ານ ຫຼີເຄີ້ສຽງ ນາຍົກລັດຖະມົນຕີຈີນໄດ້ເດີນທາງເຖິງສະໜາມບິນສາກົນບລຸກແຊນດ້ວຍເຮືອບິນພິເສດ ເພື່ອເຂົ້າຮ່ວມກອງປະຊຸມສຸດຍອດອາຊີເອີຣົບຄັ້ງທີ 12 ແລະຢ້ຽມຢາມເຮັດວຽກຢູ່ແບນຊິກ.
ທ່ານ ຫຼີເຄີ້ສຽງ ກ່າວວ່າ, ໃນໂລກປັດຈຸບັນ ເຕັມໄປດ້ວຍການປ່ຽນແປງທີ່ສັບສົນແລະບໍ່ແນ່ນອນ, ແຕ່ສັນຕິພາບ, ການພັດທະນາ, ການເປີດປະຕູ ແລະການຮ່ວມມື ຍັງແມ່ນກະແສຕົ້ນຕໍຂອງຍຸກສະໄໝ. ທະວີບອາຊີແລະເອີຣົບທີ່ເປັນສອງແຜ່ນດິນໃຫຍ່ດ້ານເສດຖະກິດແລະກຳລັງໜັກແໜ້ນຂອງໂລກ ຄວນເພີ່ມທະວີການສົນທະນາແລະການຮ່ວມມືກັນ, ປົກປັກຮັກສາສັນຕິພາບຂອງໂລກ, ຮ່ວມກັນຮັບມືກັບສິ່ງທ້າທາຍ ແລະ ຮ່ວມກັນສະແຫວງຫາການພັດທະນາ.
ທ່ານ ຫຼີເຄີ້ສຽງ ຊີ້ໃຫ້ເຫັນວ່າ, ແບນຊິກແມ່ນທີ່ຕັ້ງສຳນັກງານໃຫຍ່ຂອງສະຫະພາບເອີຣົບ, ເປັນຜູ້ສະໜັບສະໜູນແລະຜູ້ເຂົ້າຮ່ວມທີ່ເດັດດ່ຽວໜຽວແໜ້ນຂອງການເຊື່ອມໂຍງເຂົ້າກັນຂອງເອີຣົບ. ຂ້າພະເຈົ້າຫວັງວ່າຈະແລກປ່ຽນຄວາມຄິດເຫັນຢ່າງເລິກເຊິ່ງກັບແບນຊິກກ່ຽວກັບການພົວພັນຈີນ-ແບນຊິກ, ຈີນ-ເອີຣົບ ແລະບັນຫາອື່ນໆທີ່ສົນໃຈຮ່ວມກັນ, ເພີ່ມຄວາມໄວ້ເນື້ອເຊື່ອໃຈກັນດ້ານການເມືອງ, ລົງເລິກການຮ່ວມມືທີ່ແທດເໝາະກັບຕົວຈິງ, ຊຸກຍູ້ການພົວພັນຄູ່ຮ່ວມມືມິດຕະພາບຮອບດ້ານຈີນ-ແບນຊິກໃຫ້ກ້າວຂຶ້ນສູ່ລະດັບໃໝ່ ບົນພື້ນຖານຫຼັກການຕ່າງຝ່າຍຕ່າງເຄົາລົບເຊິ່ງກັນແລະກັນ, ປະຕິບັດຕໍ່ກັນຢ່າງສະເໝີພາບ ແລະ ຕ່າງຝ່າຍຕ່າງໄດ້ຮັບຜົນປະໂຫຍດ.
ຄຳເຫັນ
0