ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕອນບ່າຍວັນທີ 18 ຕຸລານີ້ຕາມເວລາທ້ອງຖິ່ນ, ທ່ານ ຫຼີເຄີ້ສຽງ ນາຍົກລັດຖະມົນຕີຈີນໄດ້ພົບປະກັບທ່ານ ຮຸນແຊນ ນາຍົກລັດຖະມົນຕີກຳປູເຈຍຢູ່ບຣຸກແຊນປະເທດແບນຊິກ.
ໂອກາດດັ່ງກ່າວ, ທ່ານ ຫຼີເຄີ້ສຽງ ກ່າວວ່າ: ຈີນ-ກຳປູເຈຍມີມິດຕະພາບຢ່າງເລິກເຊິ່ງ ແລະຜ່ານເວລາຍິ່ງດົນກໍຍິ່ງໝັ້ນຄົງ. ສອງປະເທດຄວນສືບຕໍ່ເພີ່ມທະວີການເຊື່ອມຕໍ່ຍຸດທະສາດການພັດທະນາ ແລະ ເປີດກວ້າງຂະໜາດການຄ້າ. ຈີນຍິນດີສືບຕໍ່ນຳເຂົ້າຜະລິດຕະພັນກະສິກຳທີ່ເປັນທ່າແຮງຂອງກຳປູເຈຍ, ສົ່ງເສີມໃຫ້ວິສາຫະກິດຈີນທີ່ມີທ່າແຮງຕົວຈິງໄປລົງທຶນຢູ່ກຳປູເຈຍ ເພື່ອບັນລຸເປົ້າໝາຍຕ່າງຝ່າຍຕ່າງໄດ້ຮັບຜົນປະໂຫຍດໃຫ້ດີກວ່າເກົ່າ. ຂະນະດຽວກັນ, ຈີນກໍຈະສະໜັບສະໜູນກຳປູເຈຍຈັດກອງປະຊຸມສຸດຍອດອາຊີເອີຣົບຄັ້ງໜ້າໃຫ້ດີ.
ທ່ານ ຮຸນແຊນ ກ່າວວ່າ: ທ່ານນາຍົກລັດຖະມົນຕີ ຫຼີເຄີ້ສຽງ ໄດ້ໄປຢ້ຽມຢາມກຳປູເຈຍໃນຕົ້ນປີນີ້ ແລະເປັນປະທານຮ່ວມຂອງກອງປະຊຸມຜູ້ນຳການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ, ອັນໄດ້ເພີ່ມພະລັງແຮງໃໝ່ເຂົ້າໃນສາຍພົວພັນກຳປູເຈຍ-ຈີນແລະການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ. ກຳປູເຈຍຍິນດີຮ່ວມກັບຈີນສະໜັບສະໜູນເຊິ່ງກັນແລະກັນຢ່າງໜຽວແໜ້ນ, ເພີ່ມທະວີການປະສານງານກັນໃນກິດຈະການສາກົນແລະພາກພື້ນ, ເປີດກວ້າງການຮ່ວມມືຕົວຈິງໃນດ້ານເສດຖະກິດການຄ້າ, ກະສິກຳແລະຂະແໜງການອື່ນໆ. ຍິນດີຕ້ອນຮັບວິສາຫະກິດຈີນມາລົງທຶນຢູ່ກຳປູເຈຍ. ກຳປູເຈຍຈະເປັນເຈົ້າພາບຈັດກອງປະຊຸມສຸດຍອດອາຊີ-ເອີຣົບຄັ້ງໜ້າ ຍິນດີເພີ່ມທະວີການປະສານງານກັບຈີນໃນດ້ານນີ້.
ຄຳເຫັນ
0