ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ທ່ານຫຼີເຄີ້ສຽງ ນາຍົກລັດຖະມົນຕີຈີນ ແລະ ຜູ້ຮັບຜິດຊອບສະຖາບັນເສດຖະກິດການເງິນສາກົນຕົ້ນຕໍ ໄດ້ເຂົ້າຮ່ວມກອງປະຊຸມໂຕະມົນ 1+6 ຄັ້ງທີ 3 ໃນວັນທີ 6 ພະຈິກນີ້ຢູ່ນະຄອນຫຼວງປັກກິ່ງ ແລະ ໂອກາດນີ້, ທ່ານຫຼີເຄີ້ສຽງ ກ່າວເນັ້ນວ່າ: ຈີນຍິນດີຮ່ວມກັນກັບບັນດາຝ່າຍສະໜັບສະໜູນລັດທິຫຼາຍຝ່າຍ, ປົກປັກຮັກສາລະບົບການຄ້າເສລີ ແລະ ຊຸກຍູ້ຂະບວນການໂລກາພິວັດໃຫ້ພັດທະນາເຂົ້າສູ່ລວງເລິກ. ຈີນຈະໃຊ້ມາດຕະການຢ່າງແຂງແຮງແລະມີປະສິດທິຜົນ ເພື່ອຮັກສາໃຫ້ເສດຖະກິດພັດທະນາຢ່າງໜັກແໜ້ນ ທັງຊຸກຍູ້ໃຫ້ມີການພັດທະນາຢ່າງມີຄຸນນະພາບສູງ.
ທ່ານຫຼີເຄີ້ສຽງ ກ່າວວ່າ: ໂລກໄດ້ມາເຖິງທາງແຍກຄັ້ງໃໝ່ ແລະ ຜະເຊີນກັບທາງເລືອກທີ່ມີລັກສະນະປະຫວັດສາດ. ຄວນຍຶດໝັ້ນການເປີດປະຕູສູ່ພາຍນອກແລະຫຼັກການຫຼາຍຝ່າຍຢ່າງບໍ່ຫວັ່ນໄຫວຄອນແຄນ, ຊຸກຍູ້ຂະບວນການໂລກາພິວັດໃຫ້ພັດທະນາເຂົ້າສູ່ລວງເລິກ. ລັດທິຫຼາຍຝ່າຍແມ່ນເສັ້ນທາງຕ້ອງຜ່ານໃນການກ້າວໄປສູ່ຄວາມຈະເລີນຮຸ່ງເຮືອງແລະບັນລຸການເຕີບໂຕແບບກວມລວມ, ທ່າອ່ຽງໂລກາພິວັດບໍ່ຄວນຖືກຕ່າວປີ້ນ. ຈີນຍິນດີຮ່ວມກັບບັນດາຝ່າຍສະໜັບສະໜູນລັດທິຫຼາຍຝ່າຍ, ປົກປັກຮັກສາລະບົບການຄ້າເສລີ.
ທ່ານຫຼີເຄີ້ສຽງ ໄດ້ແນະນຳສະພາບການດ້ານເສດຖະກິດຈີນຕໍ່ຜູ້ຮ່ວມປະຊຸມ ໂດຍຊີ້ໃຫ້ເຫັນວ່າ: ເສດຖະກິດຈີນມີຈັງຫວະພັດທະນາຢ່າງໝັ້ນທ່ຽງໂດຍລວມ ເຖິງວ່າຜະເຊີນກັບແຮງກົດດັນຈາກປັດໄຈພາຍໃນແລະຕ່າງປະເທດ ແລະຈັງຫວະການພັດທະນາຊ້າລົງເລັກໜ້ອຍກໍຕາມ, ແຕ່ເມື່ອສັງເກດໃນໄລຍະໄກແລ້ວຈະເຫັນໄດ້ວ່າ ພື້ນຖານການພັດທະນາຍັງດີຢູ່, ຈັງຫວະການເຕີບໂຕຂອງເສດຖະກິດສາມາດຮັກສາໃຫ້ຢູ່ໃນລະດັບທີ່ສົມເຫດສົມຜົນຢ່າງຕໍ່ເນື່ອງ. ຈີນຈະໃຊ້ມາດຕະການຢ່າງແຂງແຮງແລະມີປະສິດທິຜົນ ເພື່ອຮັກສາໃຫ້ເສດຖະກິດພັດທະນາຢ່າງໜັກແໜ້ນ ທັງຊຸກຍູ້ໃຫ້ມີການພັດທະນາຢ່າງມີຄຸນນະພາບສູງ.
ຄຳເຫັນ
0