ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕາມຂ່າວCRI: ວັນທີ 6 ພະຈິກນີ້ ຢູ່ນະຄອນຫຼວງປັກກິ່ງ, ທ່ານ ວາງຢີ້ ທີ່ປຶກສາແຫ່ງລັດທັງເປັນລັດຖະມົນຕີກະຊວງການຕ່າງປະເທດຈີນໄດ້ຕ້ອນຮັບການເຂົ້າຢ້ຽມຄຳນັບຂອງທ່ານ ບີວເກສ໌ ປະທານອົງການກອງທຶນເກສ໌ຂອງອາເມຣິກາ.
ທ່ານ ວາງຢີ້ ກ່າວວ່າ: ຈີນແລະອາເມຣິກາໃນຖານະເປັນສອງປະເທດໃຫຍ່, ຖ້າຢູ່ຮ່ວມກັນໂດຍສັນຕິຈະສາມາດບັນລຸເປົ້າໝາຍຕ່າງຝ່າຍຕ່າງມີຜົນປະໂຫຍດ,ຖ້າຂັດແຍ້ງກັນກໍ່ຈະທຳລາຍຜົນປະໂຫຍດຂອງກັນແລະກັນ. ພາຍໃຕ້ສະຖານະການໃນປັດຈຸບັນ, ສອງຝ່າຍຄວນຫັນໜ້າເຂົ້າຫາກັນ,ສຸມໃສ່ສ້າງສະພາບການທີ່ບໍ່ປະທະກັນ,ບໍ່ຕໍ່ຕ້ານກັນ,ເຄົາລົບເຊິ່ງກັນແລະກັນ,ຮ່ວມມືແບບຕ່າງຝ່າຍຕ່າງມີຜົນປະໂຫຍດ ສິ່ງເລົ່ານີ້ບໍ່ພຽງແຕ່ສາມາດບັນລຸຜົນເປັນຈິງໄດ້ເທົ່ານັ້ນ,ຫາກຍັງມີຜົນດີຕໍ່ທັງສອງຝ່າຍອີກດ້ວຍ,ທັງຈະນຳເອົາຜົນປະໂຫຍດມາໃຫ້ແກ່ປະຊາຄົມໂລກ. ຫວັງວ່າທ່ານ ບີວເກສ໌ ແລະ ບຸກຄົນທີ່ມີຄວາມຮູ້ຄວາມສາມາດຂອງອາເມຣິກາຈະສາມາດເສີມຂະຫຍາຍບົດບາດຢ່າງຕັ້ງໜ້າໃນການຊຸກຍູ້ສາຍພົວພັນລະຫວ່າງສອງປະເທດໃຫ້ຂະຫຍາຍຕົວຢ່າງໝັ້ນທ່ຽງແລະປອດໃສ.
ທ່ານ ບີວເກສ໌ ກ່າວວ່າ: ຂ້າພະເຈົ້າຮູ້ສຶກເຄົາລົບນັບຖືທີ່ສຸດຕໍ່ຜົນສຳເລັດທີ່ຍິ່ງໃຫຍ່ໃນການປະຕິຮູບແລະເປີດປະຕູສູ່ພາຍນອກຂອງຈີນ,ທ່ານບີວເກສໄດ້ຍ້ອງຍໍຊົມເຊີຍຢ່າງສູງຕໍ່ການປະກອບສ່ວນທີ່ສຳຄັນຂອງຈີນໃນວຽກງານຫຼຸດຜ່ອນຄວາມທຸກຍາກ,ສາທາລະນະສຸກແລະຂົງເຂດອື່ນໆຂອງໂລກ. ອົງການກອງທຶນບີວເກສ໌ຍິນດີເສີມຂະຫຍາຍທ່າແຮງຂອງຕົນ,ເພີ່ມທະວີການຮ່ວມມືກັບຈີນໃນຂົງເຂດຕ່າງໆເຊັ່ນ: ກະສິກຳ,ຫຼຸດຜ່ອນຄວາມທຸກຍາກ,ສາທາລະນະສຸກເປັນຕົ້ນ,ຮ່ວມກັນເຂົ້າຮ່ວມການສ້າງ “ໜຶ່ງແລວໜຶ່ງເສັ້ນທາງ” ຢ່າງຕັ້ງໜ້າ,ເປີດກວ້າງການຮ່ວມມືສາມຝ່າຍຢູ່ອາຟຣິກາ. ການຮ່ວມມືແບບຕ່າງຝ່າຍຕ່າງມີຜົນປະໂຫຍດຄວນແມ່ນວຽກງານຕົ້ນຕໍຂອງການພົວພັນອາເມຣິກາ-ຈີນ,ຂ້າພະເຈົ້າຍິນດີເສີມຂະຫຍາຍບົດບາດທີ່ຕັ້ງໜ້າໃນການຊຸກຍູ້ສາຍພົວພັນລະຫວ່າງສອງປະເທດ,ເພີ່ມທະວີມິດຕະພາບລະຫວ່າງປະຊາຊົນຂອງສອງປະເທດ.
ຄຳເຫັນ
0