ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ທ່ານຫຼີເຄີ້ສຽງ ນາຍົກລັດຖະມົນຕີຈີນ ແລະ ທ່ານດີມີຕຣີ ເມັດເວເດັບ ນາຍົກລັດຖະມົນຕີຣັດເຊຍໄດ້ຮ່ວມກັນເປັນປະທານກອງປະຊຸມພົບປະຄັ້ງທີ 23 ຂອງນາຍົກລັດຖະມົນຕີສອງປະເທດ ໃນຕອນເຊົ້າວັນທີ 7 ພະຈິກນີ້ຢູ່ຫໍສະພາປະຊາຊົນທີ່ນະຄອນຫຼວງປັກກິ່ງ.
ທ່ານຫຼີເຄີ້ສຽງ ກ່າວວ່າ: ຈີນແລະຣັດເຊຍເປັນປະເທດໃຫຍ່ທີ່ຢູ່ຕິດກັນ ແລະ ຕ່າງກໍສ້າງໂອກາດການພັດທະນາທີ່ສຳຄັນໃຫ້ກັນ. ທ່ານປະທານສີຈິ້ນຜິງ ແລະ ທ່ານປະທານາທິບໍດີວາລາດີເມຍ ປູຕິນ ໄດ້ພົບປະກັນປະສົບຜົນສຳເລັດມາຫຼາຍເທື່ອແລ້ວ, ສາຍພົວພັນຄູ່ຮ່ວມປະສານງານທາງຍຸດທະສາດຮອບດ້ານລະຫວ່າງສອງປະເທດໄດ້ຮັກສາໃຫ້ຢູ່ໃນລະດັບສູງມາໂດຍຕະຫຼອດ ເຊິ່ງສອດຄ່ອງກັບຜົນປະໂຫຍດຂອງສອງປະເທດກໍຄືປະຊາຊົນສອງຊາດ ທັງມີຜົນດີຕໍ່ການທຸ່ມເທພະລັງທີ່ໝັ້ນທ່ຽງຫຼາຍກວ່າເກົ່າໃຫ້ໂລກ ແລະ ຊຸກຍູ້ຂະບວນການຟື້ນຟູເສດຖະກິດໂລກ. ຈີນຍິນດີຮ່ວມກັບຣັດເຊຍລົງເລິກຄວາມໄວ້ເນື້ອເຊື່ອໃຈທາງການເມືອງແລະທາງຍຸດທະສາດຢ່າງຕໍ່ເນື່ອງ, ເປີດກວ້າງການຮ່ວມມືໃນທຸກຂົງເຂດ, ປະກອບສ່ວນຮ່ວມກັນເພື່ອຮັກສາສັນຕິພາບ, ຄວາມໝັ້ນຄົງ ແລະ ການພັດທະນາຂອງໂລກ.
ທ່ານເມັດເວເດັບ ກ່າວວ່າ: ຣັດເຊຍແລະຈີນມີຄວາມໄວ້ເນື້ອເຊື່ອໃຈກັນໃນລະດັບສູງ ແລະ ສາຍພົວພັນຄູ່ຮ່ວມປະສານງານທາງຍຸດທະສາດຮອບດ້ານໄດ້ເຂົ້າສູ່ລວງເລິກຢ່າງບໍ່ຢຸດຢັ້ງ, ປະມຸກລັດສອງປະເທດໄດ້ຢ້ຽມຢາມກັນຫຼາຍເທື່ອໃນປີນີ້. ຣັດເຊຍຍິນດີຮັດແໜ້ນການໄປມາຫາສູ່ຢ້ຽມຢາມກັນລະຫວ່າງການນຳຂັ້ນສູງກໍຄືການນຳທຸກລະດັບກັບຈີນ, ລົງເລິກການຮ່ວມມືທີ່ແທ້ຈິງ, ເປີດກວ້າງການຄ້າຢ່າງບໍ່ຢຸດຢັ້ງ, ເພີ່ມທະວີການລົງທຶນຕໍ່ກັນ, ເລັ່ງລັດສ້າງຕັ້ງກອງທຶນລົງທຶນປະດິດສ້າງໃໝ່, ເພີ່ມທະວີການຮ່ວມມືໃນຂົງເຂດຕ່າງໆ ເຊັ່ນ: ການປະດິດສ້າງໃໝ່, ການຄ້າເອເລັກໂຕຣນິກ, ກະສິກຳ, ພະລັງງານ, ພະລັງງານນິວເຄຼຍ ແລະ ການຄົມມະນາຄົມຂົນສົ່ງ; ຈັດຕັ້ງປະຕິບັດປີຮ່ວມມື-ແລກປ່ຽນລະດັບທ້ອງຖິ່ນປີນີ້ແລະປີໜ້າລະຫວ່າງສອງປະເທດໃຫ້ດີ, ເພີ່ມທະວີການຮ່ວມມືລະຫວ່າງເຂດຕາເວັນອອກໄກຂອງຣັດເຊຍ-ເຂດພາກຕາເວັນອອກສຽງເໜືອຂອງຈີນ; ຮ່ວມກັນປົກປັກຮັກສາລັດທິຫຼາຍຝ່າຍ ແລະ ລະບົບການຄ້າເສລີທີ່ຖືເອົາອົງການການຄ້າໂລກເປັນແກນກາງ.
ຄຳເຫັນ
0