ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 9 ພະຈິກນີ້ຢູ່ຫໍສະພາປະຊາຊົນແຫ່ງຊາດຈີນທີ່ນະຄອນຫຼວງປັກກິ່ງ, ທ່ານສີຈິ້ນຜີງ, ປະທານປະເທດຈີນໄດ້ພົບປະກັບທ່ານເຮນຣິ ຄິດຊີງເກີ, ອະດີດລັດຖະມົນຕີວ່າການກະຊວງການຕ່າງປະເທດອາເມຣິກາ.
ທ່ານສີຈິ້ນຜິງ ກ່າວວ່າ, ໃນ 40 ກວ່າປີຜ່ານມາ, ການພົວພັນລະຫວ່າງຈີນແລະອາເມຣິກາໄດ້ຜ່ານຜ່າຄວາມຍຸ້ງຍາກຢ່າງຫຼວງຫຼາຍ, ໄດ້ຮັກສາການພັດທະນາຢ່າງໝັ້ນທ່ຽງໂດຍລວມ. ຈີນຍຶດໝັ້ນເດີນຕາມເສັ້ນທາງພັດທະນາໂດຍສັນຕິ, ສຸມກຳລັງພັດທະນາການພົວພັນຈີນອາເມຣິກາທີ່ບໍ່ປະທະກັນແລະບໍ່ເປັນປໍລະປັກກັນ, ເຄົາລົບນັບຖືເຊິ່ງກັນແລະກັນແລະຮ່ວມມືແບບຕ່າງຝ່າຍຕ່າງມີຜົນປະໂຫຍດ, ຍິນດີແກ້ໄຂບັນຫາທີ່ເກີດຂຶ້ນໃນການພົວພັນລະຫວ່າງສອງປະເທດໂດຍຜ່ານການປຶກສາຫາລືບົນຈິດໃຈມິດຕະພາບທີ່ມີການຜ່ອນຜັນແລະເຂົ້າອົກເຂົ້າໃຈກັນ, ສະເໝີພາບກັນແລະຕ່າງຝ່າຍຕ່າງມີຜົນປະໂຫຍດ. ຂະນະດຽວກັນນັ້ນ, ອາເມຣິກາກໍຄວນເຄົາລົບສິດແລະຜົນປະໂຫຍດທີ່ສົມເຫດສົມຜົນຂອງຈີນ, ຮ່ວມກັນຊຸກຍູ້ໃຫ້ການພົວພັນລະຫວ່າງຈີນແລະອາເມຣິກາຂະຫຍາຍຕົວຢ່າງແຂງແຮງແລະໝັ້ນທ່ຽງ.
ທ່ານຄິດຊີງເກີ ກ່າວວ່າ, ພາຍໃຕ້ສະຖານະການປັດຈຸບັນ, ການຮ່ວມມືລະຫວ່າງອາເມຣິກາແລະຈີນແມ່ນສຳຄັນທີ່ສຸດທີ່ມີຜົນຕໍ່ສັນຕິພາບແລະຄວາມຈະເລີນຮຸ່ນເຮືອງຂອງໂລກ. ການພັດທະນາສາຍພົວພັນລະຫວ່າງອາເມຣິກາແລະຈີນຮຽກຮ້ອງໃຫ້ມີແນວຄິດຍຸດທະສາດແລະສາຍຕາເບິ່ງກວ້າງມອງໄກ, ສອງຝ່າຍຄວນເຂົ້າໃຈກັນດີກວ່າເກົ່າ, ເພີ່ມທະວີການແລກປ່ຽນທາງຍຸດທະສາດ, ເປີດກວ້າງຜົນປະໂຫຍດຮ່ວມກັນຢ່າງບໍ່ຢຸດຢັ້ງ, ຄຸ້ມຄອງແລະຄວບຄຸມຄວາມຂັດແຍ້ງກັນຢ່າງເໝາະສົມ. ຫວັງວ່າການພົບປະກັນລະຫວ່າງທ່ານໂດໂນ ທຣຳ ປະທານາທິບໍດີອາເມຣິກາແລະທ່ານສີຈິ້ນຜີງ ປະທານປະເທດຈີນທີ່ຈະຈັດຂຶ້ນໃນໄລຍະຈັດກອງປະຊຸມສຸດຍອດ G20 ຢູ່ອັກຊັງຕິນຈະປະສົບຜົນສຳເລັດ.
ຄຳເຫັນ
0