ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ເມື່ອບໍ່ດົນມານີ້,ຢູ່ນະຄອນຫຼວງແມັກຊີໂກຊີຕີ ປະເທດແມັກຊິກ, ທ່ານເຊີຈິໂອ ເລໂລເປສ ອະດີດເອກອັກຄະລັດຖະທູດແມັກຊິກປະຈຳຈີນໄດ້ໃຫ້ສຳພາດຕໍ່ນັກຂ່າວວ່າ: ການປະຕິຮູບແລະເປີດປະຕູສູ່ພາຍນອກຂອງຈີນໄດ້ຮັບຜົນງານທີ່ໂດດເດັ່ນແລະມີຜົນສະທ້ອນໃນໄລຍະຍາວແລະເລິກເຊິ່ງ, ຫວັງວ່າໃນຕໍ່ໜ້າ, ຈີນຈະເປີດປະຕູຕໍ່ໂລກຕະຫຼອດໄປໃນຂະບວນການດຳເນີນການປະຕິຮູບແລະເປີດປະຕູສູ່ພາຍນອກ.
ທ່ານເຊີຈິໂອ ເລໂລເປສຢືນຢັນວ່າ ໃນໄລຍະ 40 ປີຜ່ານມາ, ນະໂຍບາຍປະຕິຮູບແລະເປີດປະຕູສູ່ພາຍນອກຂອງຈີນໄດ້ຮັບຜົນງານທີ່ໂດດເດັ່ນ, ໃນໂລກນີ້ບໍ່ເຄີຍມີສົງຄົມໃດທີ່ສາມາດຍາດໄດ້ຜົນສຳເລັດໃຫຍ່ຫຼວງເທົ່າທຽມກັບຈີນໄດ້ພາຍໃນເວລາອັນສັ້ນໆ.
ຕາມທ່ານເຊີຈິໂອ ເລ ໂລເປສເຫັນວ່າ: ຂໍ້ລິເລີ່ມ “ໜຶ່ງແລວໜຶ່ງເສັ້ນທາງ”ທີ່ຈີນສະເໜີອອກມານັ້ນມີຜົນສະທ້ອນໃນໄລຍະຍາວແລະເລິກເຊິ່ງ, ບັນດາປະເທດອາເມຣິກາລາຕິນຄວນເຂົ້າຮ່ວມຂໍ້ລິເລີ່ມດັ່ງກ່າວເພື່ອຍາດແຍ່ງເອົາຜົນປະໂຫຍດຈາກການຮ່ວມກັນຊົມໃຊ້ໝາກຜົນແຫ່ງການປະຕິຮູບແລະເປີດປະຕູສູ່ພາຍນອກຂອງຈີນ. ທ່ານຢືນຢັນວ່າ, ປັດຈຸບັນ, ຈີນເປັນຄູ່ການຄ້າໃຫຍ່ອັນດັບໜຶ່ງຫຼືອັນດັບສອງຂອງຫຼາຍໆປະເທດອາເມຣິກາລາຕິນ. ການພັດທະນາຂອງພາກພື້ນອາເມຣິກາລາຕິນຕັດແຍກອອກຈາກຈີນບໍ່ໄດ້, ການກໍ່ສ້າງພື້ນຖານໂຄງລ່າງທີ່ລະບຸໃນຂໍ້ລິເລີ່ມ “ໜຶ່ງແລວໜຶ່ງເສັ້ນທາງ”ເປັນໜຶ່ງໃນບັນດາເສົາຄ້ຳສຳຄັນໃນການຊຸກຍູ້ການພັດທະນາຂອງອາເມຣິກາລາຕິນ.
ຕໍ່ກໍລະນີທີ່ລັດທິປົກປ້ອງການຄ້າທີ່ຟື້ນຄືນໃນໂລກປັດຈຸບັນ, ທ່ານເຊີຈິໂອ ເລໂລເປສກ່າວວ່າ: ການທີ່ຈີນລົງເລິກການປະຕິຮູບແລະເປີດປະຕູສູ່ພາຍນອກ, ເປັນການເສີມຂະຫຍາຍບົດບາດສຳຄັນໃນຖານະເປັນປະເທດໃຫຍ່,ໄດ້ຊຸກຍູ້ການພັດທະນາຂອງການຄ້າເສລີທົ່ວໂລກນັ້ນ ຈະສ້າງຜົນປະໂຫຍດດ້ານການພັດທະນາໃຫ້ແກ່ປະເທດຕ່າງໆຫຼາຍກວ່າເກົ່າ.
ຄຳເຫັນ
0