ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 10 ພະຈິກນີ້, ໃນເວລາຖະແຫຼງຜ່ານທາງໂທລະພາບ, ທ່ານຮັດຊັນ ຣູຮານີ ປະທານາທິບໍດີອີຣານຢືນຢັນວ່າ: ມາດຕະການຂວ້ຳບາດໃໝ່ທີ່ອາເມຣິກາໃຊ້ກັບອີຣານນັ້ນບໍ່ໄດ້ເກີດຜົນສະທ້ອນໃດໆຕໍ່ເສດຖະກິດອີຣານ.
ທ່ານຣູຮານີຍັງໄດ້ຕອບໂຕຸ້ຖ້ອຍຄຳຂອງລັດຖະບານອາເມຣິກາທີ່ວ່າ ມາດຕະການຂວ້ຳບາດຮອບໃໝ່ແມ່ນຖືລັດຖະບານອີຣານເປັນເປົ້າໝາຍແຕ່ບໍ່ແມ່ນປະຊາຊົນອີຣານ. ທ່ານຣູຮານີກ່າວວ່າ: ຜູ້ທີ່ໃຊ້ມາດຕະການຂວ້ຳບາດທີ່ຜິດກົດໝາຍເພື່ອເພີ່ມຄວາມກົດດັນຕໍ່ປະຊາຊົນອີຣານນັ້ນ ບໍ່ແມ່ນຜູ້ອື່ນ ຫາກແມ່ນລັດຖະບານອາເມຣິການັ້ນເອງ, ປະຊາຊົນອີຣານໄດ້ຕໍ່ຕ້ານຢ່າງເດັດດ່ຽວຕໍ່ມາດຕະການຂວ້ຳບາດຂອງອາເມຣິກາແລ້ວ.
ທ່ານຣູຮານີຢືນຢັນວ່າ: ພຶດຕິກຳໄດ້ພິສູດໃຫ້ເຫັນວ່າ ອາເມຣິກາບໍ່ມີຄວາມສາມາດເຮັດໃຫ້ອີຣານຫຼຸດຜ່ອນການສົ່ງອອກນ້ຳມັນໃຫ້ໜ້ອຍລົງຈົນເຖິງຂັ້ນບໍ່ສາມາດສົ່ງອອກໄດ້, ກ່ຽວກັບເລື່ອງນີ້, ລັດຖະບານອາເມຣິກາໄດ້ຍອມຮັບແລ້ວໃນເມື່ອບໍ່ດົນມານີ້. ທ່ານຣູຮານີຍັງກ່າວຕື່ມອີກວ່າ: ປັດຈຸບັນ, ອີຣານຢູ່ໃນສະພາບທີ່ດີຫຼາຍ, ເຊິ່ງຈະສາມາດຕອບສະໜອງກັບຄວາມຮຽກຮ້ອງຕ້ອງການດ້ານຊີວິດການເປັນຢູ່ຂັ້ນພື້ນຖານຂອງປະຊາຊົນເປັນໄລຍະຍາວໄດ້.
ຄຳເຫັນ
0