ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕອນເຊົ້າວັນທີ 12 ພະຈິກນີ້ຢູ່ຫໍສະພາປະຊາຊົນແຫ່ງຊາດທີ່ນະຄອນຫຼວງປັກກິ່ງ, ທ່ານສີຈິ້ນຜິງ ປະທານປະເທດຈີນໄດ້ຕ້ອນຮັບຄະນະຜູ້ແທນວົງການຕ່າງໆຂອງຮົງກົງມາກາວທີ່ເດີນທາງມາຢ້ຽມຢາມເພື່ອສະເຫຼີມສະຫຼອງປະເທດຊາດປະຕິຮູບແລະເປີດປະຕູສູ່ພາຍນອກຄົບຮອບ 40 ປີ.
ທ່ານສີຈິ້ນຜິງກ່າວເນັ້ນວ່າ: ໃນຂະບວນການປະຕິຮູບແລະເປີດປະຕູສູ່ພາຍນອກຂອງປະເທດຊາດໃນຍຸກໃໝ່, ຮົງກົງແລະມາກາວຍັງຄົງມີຖານະພິເສດແລະທ່າແຮງບົ່ມຊ້ອນຂອງຕົນເອງ ແລະຍັງຄົງເສີມຂະຫຍາຍບົດບາດທີ່ບໍ່ສາມາດເຂົ້າແທນໄດ້. ຫວັງວ່າພີ່ນ້ອງຮ່ວມຊາດຮົງກົງມາກາວຈະສືບຕໍ່ປະກອບສ່ວນເຂົ້າໃນວຽກງານປະຕິຮູບແລະເປີດປະຕູສູ່ພາຍນອກຂອງປະເທດຊາດດ້ວຍນ້ຳໃຈຮັກຊາດຢ່າງຈິງໃຈແລະຈິດໃຈທີ່ກ້າເຮັດກ່ອນໝູ່, ກ້າວໜ້າໄປພ້ອມຍຸກສະໄໝ, ເຊື່ອມໂຍງເຂົ້າໃນພາລະກິດການພັດທະນາປະເທດຊາດເພື່ອບັນລຸໃຫ້ຮົງກົງ,ມາກາວພັດທະນາໃຫ້ດີກວ່າເກົ່າ, ຮ່ວມກັນຂຽນໜ້າປະຫວັດສາດໃໝ່ແຫ່ງການຟື້ນຟູຄວາມຈະເລີນຮຸ່ງເຮືອງທີ່ຍິ່ງໃຫຍ່ຂອງເຊື້ອຊາດຈີນ.
ຂະນະດຽວກັນ, ທ່ານສີຈິ້ນຜິງຍັງໄດ້ຝາກຄວາມຫວັງ 4 ຂໍ້ນຳຄະນະຜູ້ແທນຮົງກົງມາກາວຄື ໜຶ່ງ, ປະກອບສ່ວນເຂົ້າໃນວຽກງານເປີດປະຕູສູ່ພາຍນອກຮອບດ້ານຂອງປະເທດຊາດຢ່າງຕັ້ງໜ້າແລະເປັນເຈົ້າການຫຼາຍກວ່າເກົ່າ. ສອງ, ເຊື່ອມໂຍງເຂົ້າໃນວຽກງານການພັດທະນາປະເທດຊາດຢ່າງຕັ້ງໜ້າແລະເປັນເຈົ້າການຫຼາຍກວ່າເກົ່າ. ສາມ, ມີສ່ວນຮ່ວມເຂົ້າໃນການຄຸ້ມຄອງປະເທດຢ່າງຕັ້ງໜ້າແລະເປັນເຈົ້າການຫຼາຍກວ່າເກົ່າ. ສີ່, ສົ່ງເສີມການແລກປ່ຽນວັດທະນະທຳລະຫວ່າງຊາດຢ່າງຕັ້ງໜ້າແລະເປັນເຈົ້າການຫຼາຍກວ່າເກົ່າ.
ສຸດທ້າຍ, ທ່ານສີຈິ້ນຜິງຫວັງໃຫ້ພີ່ນ້ອງຮ່ວມຊາດພ້ອມບຸກຄົນວົງການຕ່າງໆຮົງກົງມາກາວທັງຫຼາຍຈະຮ່ວມກັບປະຊາຊົນແຜ່ນດິນໃຫຍ່ຈີນບຸກເບີກການສ້າງສະພາບການໃໝ່ແຫ່ງພາລະກິດ “ປະເທດດຽວ ສອງລະບອບ”, ສາມັກຄີສູ້ຊົນເພື່ອສ້າງຊີວິດການເປັນຢູ່ທີ່ດີງາມກວ່າເກົ່າໃຫ້ພີ່ນ້ອງຮ່ວມຊາດຮົງກົງມາກາວແລະເພື່ອບັນລຸຄວາມໄຝ່ຝັນຂອງຈີນທີ່ຟື້ນຟູຄວາມຈະເລີນຮຸ່ງເຮືອງທີ່ຍິ່ງໃຫຍ່ຂອງເຊື້ອຊາດຈີນ.
ຄຳເຫັນ
0