ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 16 ພະຈິກຕາມເວລາທ້ອງຖີ່ນ,ຢູ່ນະຄອນຫຼວງປອດໂມເຣສີບ ທ່ານສີຈິ້ນຜິງ ປະທານປະເທດ ສປ ຈີນທີ່ພວມຢ້ຽມຢາມຢູ່ປາປົວນິວກີເນທາງລັດຖະກິດໄດ້ພົບປະກັບຜູ້ນຳຂອງບັນດາປະເທດໝູ່ເກາະມະຫາສະໝຸດປາຊີຟິກທີ່ ສ້າງສາຍພົວພັນທາງການທູດກັບ ສປ ຈີນຕາມລຳດັບ, ແລະໄດ້ ພົບປະແບບຮວມໝູ່ກັບຜູ້ນຳແລະຜູ້ຕາງໜ້າລັດຖະບານຂອງປະເທດເຫຼົ່ານີ້ ໂດຍໄດ້ແລກປ່ຽນຄວາມເຫັນກ່ຽວກັບການລົງເລິກການພົວພັນບະຫວ່າງຈີນແລະບັນດາປະເທດ ໝູ່ເກາະມະຫາສະໝຸດປາຊີຟິກ, ທັງໄດ້ສະເໜີຄວາມຄິດເຫັນ 4 ຂໍ້ ຄື: ລົງເລິກຄວາມໄວ້ເນື້ອເຊື່ອໃຈກັນ, ສ້າງຄວາມຈະເລີນຮຸ່ງເຮືອງນຳກັນ, ຮັດແໜ້ນມິດຕະພາບ, ປົກປັກຮັກສາຍຸດຕິທຳແລະຄວາມເປັນທຳຮ່ວມກັນ ອັນເປັນການສ້າງຍຸກໃໝ່ແຫ່ງການພົວພັນຈີນ-ປະເທດ ໝູ່ເກາະປາຊີຟິກ.
ໃນຫຼາຍມື້ມໍ່ໆມານີ້ ໂດຍປິ່ນອ້ອມການຢ້ຽມຢາມຂອງທ່ານປະທານສີຈິ້ນຜິງ, ສື່ມວນຊົນຕາເວັນຕົກໄດ້ສຸມໃສ່ບົດບາດຂອງຈີນທີ່ນັບມື້ນັບຂະຫຍາຍວົງກວ້າງອອກຢູ່ເຂດປາຊີຟິກໃຕ້.
ເຊິ່ງຂ່າວສານອາເປຂອງອາເມລິກາລາຍງານວ່າ, ຢູ່ນະຄອນຫຼວງປອດໂມເຣສບີະໄດ້ເຫັນຮ່ອງຮອຍຂອງຈີນທົ່ວທຸກແຫ່ງຫົນ: ເສັ້ນທາງ, ສູນປະຊຸມສາກົນ, ສະຖານີລົດເມ ເຊິ່ງເປັນໂຄງການທີ່ຈີນຊ່ວຍເຫຼືອ ແລະອື່ນໆ, ກ່ອນທີ່ທ່ານສີຈິ້ນຜິງເດີນທາງໄປຮອດມື້ໜຶ່ງ, ສື່ມວນຊົນທ້ອງຖີ່ນໄດ້ພິມບົດຄວາມຂອງທ່ານສີຈິ້ນຜິງລົງໃສ່ໜັງສືພິມເຕັມໜ້າ ໂດຍລິເລີ່ມໃຫ້ການພົວພັນລະຫວ່າງຈີນກັບບັນດາປະເທດໝູ່ເກາະມະຫາສະໝຸດປາຊີຟິກຈົ່ງເດີນທາງກ້າວສູ່ອະນາຄົດ. ການລາຍງານຂ່າວເຫຼົ່ານີ້ເຫັນວ່າ, ການກະທຳແລະຖ້ອຍຄຳຂອງຈີນໄດ້ສົ່ງຂ່າວທີ່ໜ້າເຊື່ອຖືໃຫ້ປະເທດໝູ່ເກາະປາຊີຟິກຕ່າງໆຄື: ເຂົາເຈົ້າໄດ້ມີທາງເລືອກໃໝ່ແລ້ວ.
ເມື່ອສັງເກດຢ່າງນອກຕົວແລ້ວເຫັນວ່າ, ບັນດາປະເທດ ໝູ່ເກາະ ມະຫາສະໝຸດປາຊີຟິກໃຕ້ສ່ວນຫຼາຍແມ່ນປະເທດທີ່ປະກາດເອກະລາດໂດຍຫຼຸດພົ້ນອອກຈາກການປົກຄອງແບບລ່າເມືອງຂຶ້ນຂອງປະເທດຕາເວັນຕົກບໍ່ດົນປານໃດ, ເສດຖະກິດຍັງຢູ່ໃນໄລຍະຕົ້ນແຫ່ງການຫັນເປັນອຸດສາຫະກຳ, ພື້ນຖານອ່ອນແອທີ່ສຸດ, ໃນຂະນະທີ່ຮັບການຊ່ວຍເຫຼືອດ້ານເສດຖະກິດຈາກປະເທດລ່າເມືອງຂຶ້ນໃນແຕ່ກ່ອນນັ້ນ, ແມ່ນຍັງຖືກຜູກມັດທາງດ້ານການເມືອງຈາກປະເທດເຫຼົ່ານີ້ຢູ່.
ໂດຍຖືຫຼັກການທີ່ຍຶດໝັ້ນປະເທດບໍ່ວ່ານ້ອຍໃຫຍ່ຕ້ອງສະເໝີພາບກັນ, ເຄົາລົບສິດເລືອກເສັ້ນທາງພັດທະນາຂອງປະຊາຊົນປະເທດໝູ່ເກາະເຫຼົ່ານີ້, ຈີນໄດ້ໃຫ້ການຊ່ວຍເຫຼືອຢ່າງຈິງໃຈແກ່ປະເທດເຫຼົ່ານີ້ຕາມຄວາມສາມາດຂອງຕົນໂດຍບໍ່ໄດ້ຕິດຫ້ອຍເງື່ອນໄຂການເມືອງແຕ່ຢ່າງໃດ, ອັນໄດ້ມີບົດບາດສຳຄັນທີ່ສຸດຕໍ່ການພັດທະນາເສດຖະກິດສັງຄົມຂອງປະເທດໝູ່ເກາະ ມະຫາສະໝຸດປາຊີຟິກໃຕ້.
ເຊັ່ນວ່າ, ຈີນແລະປາປົວນິວກີເນໄດ້ຮ່ວມກັນສ້າງເຂດນິຄົມອຸສາຫະກຳ ເພື່ອພັດທະນາກະສິກຳໜຶ່ງແລວໜຶ່ງເສັ້ນທາງ, ຜ່ານການສ້າງໂຄງການບົ່ມເພາະແນວປູກ ແລະສັດນ້ຳທີ່ເໝາະສົມ ແລະໂຄງການອື່ນໆ ບໍ່ພຽງແຕ່ສາມາດປັບປຸງຊີວິດການເປັນຢູ່ຂອງປະຊາຊົນທ້ອງຖີ່ໃຫ້ດີຂຶ້ນເທົ່ານັ້ນ, ແຕ່ຍັງສາມາດເພີ່ມຄວາມສາມາດການພັດທະນາດ້ວຍຕົນເອງຂອງປະເທດໝູ່ເກາະເຫຼົ່ານີ້ໂດຍຜ່ານການຊ່ວຍຝຶກອົບຮົມນັກວິຊາການອີກດ້ວຍ, ຍິ່ງບໍ່ຕ້ອງເວົ້າເຖິງເສັ້ນທາງແລະສູນປະຊົມທີ່ຈີນຊ່ວຍເຫຼືອສ້າງຂຶ້ນທີ່ສຳນັກຂ່າວສານອາເປ ອາເມລິກາໃຫ້ຄວາມສົນໃຈ, ແລະໂຮງຮຽນ, ໂຮງໝໍ ແລະອື່ນໆທີ່ໂຄງການຄົບຊຸດາ 100 ກວ່າໂຄງການ, ເຊິ່ງສື່ຕ່າງປະເທດບໍ່ໄດ້ລາຍງານຂ່າວ. ໜັງສືພິມເດລີ ໂພສດ໊ຂອງວານູອາຕູໄດ້ພິມບົດວິຈານກ່າວວ່າ, ຈີນໄດ້ໃຫ້ການຊ່ວຍເຫຼືອທີ່ບັນດາປະເທດໝູ່ເກາະຕ້ອງການທີ່ສຸດເລື້ອຍໆ.
ການຊ່ວຍເຫຼືອດ້ວຍຄວາມຈິງໃຈຂອງຈີນເຮັດໃຫ້ປະເທດ ຕາເວັນຕົກຮູ້ສຶກກັງວົນຫຼາຍ ເພາະເປັນຫ່ວງວ່າຈະເສຍບົດບາດຂອງຕົນຢູ່ເຂດມະຫາສະໝຸດປາຊີຟິກໃຕ້. ສື່ມວນຊົນ, ນັກວິຊາການແລະເຈົ້າໜ້າທີ່ຂັ້ນສູງຂອງລັດຖະບານປະເທດຈຳນວນໜຶ່ງຈົນຕຳໜິຈີນ, ນີ້ໄດ້ເຮັດໃຫ້ປະເທດໝູ່ເກາະມະຫາສະໝຸດປາຊີຟິກໃຕ້ຮູ້ສຶກຄຽດແຄ້ນ, ທ່ານຕູອີລາເອບາ ນາຍົກລັດຖະມົນຕີປະເທດຊາມົວ ໄດ້ຊີ້ອອກຢ່າງເຄັ່ງຂຶມວ່າ: ຖ້ອຍຄຳຂອງພວກຝ່າຍຕາເວັນຕົກເປັນການຢຽບຫຍ່ຳຕໍ່ຜູ້ນຳບັນດາປະເທດໝູ່ເກາະທີ່ມະຫາສະມຸດປາຊີຟິກ; ທ່ານຊີໂອນີ ຟາ ໂອຕູເຊຍ ລັດຖະມົນຕີກະຊວງຍຸດຕິທຳຕົງກາກໍ່ຊີ້ອອກວ່າ, ການຕຳໜິຈີນທີ່ໃຫ້ການຊ່ວຍເຫຼືອແກ່ປະເທດໝູ່ເກາະດອນມະຫາສະໝຸດປາຊີຟິກທີ່ທຸກຍາກທັງຕ້ອງການຄວາມຊ່ວຍເຫຼືອນັ້ນ ເປັນເລື່ອງທີ່ໜ້າເສຍດາຍ.ພະນັກງານຂອງສະພາປາປົວນິວກີເນກ່າວວ່າ, ປະເທດປາປົວນິວກິເນແມ່ນປະເທດນ້ອຍ, ປະລິມານເສດຖະກິດກໍ່ນ້ອຍ, ແຕ່ກ່ອນ ບໍ່ເຄີຍມີໂອກາດເຂົ້າສູ່ເວທີການເມືອງສາກົນຈັກເທື່ອ, ແມ່ນຍ້ອນການສະໜັບສະໜູນຂອງຈີນແລະພັດທະນາການພົວພັນກັບຈີນຈິ່ງໄດ້ຫັນປ່ຽນສະພາບການດັ່ງກ່າວໂດຍເຮັດໃຫ້ປາປົວນິວກີເນມີໂອກາດຂຶ້ນສູ່ເວທີການເມືອງສາກົນ.
ໂດຍທຽບກັບຝ່າຍຕາເວັນຕົກແລ້ວ, ການຊ່ວຍເຫຼືອປະເທດໝູ່ເກາະ ມະຫາສະໝຸດປາຊີຟິກໃຕ້ຂອງຈີນໄດ້ກວມເອົາທຸກດ້ານຂອງການພົວພັນສອງຝ່າຍຢ່າງເລິກເຊິ່ງ. ໃນເວລາພົບປະແບບລວມໝູ່ກັບຜູ້ນຳແລະຜູ້ຕາງໜ້າລັດຖະບານຂອງບັນດາປະເທດໝູ່ເກາະມະຫາສະໝຸດປາຊີຟິກ, ທ່ານສີຈິ້ນຜິງໄດ້ໃຫ້ຄຳໝັ້ນສັນຍາວ່າ, ຈີນຈະເປັນເຈົ້າການເປີດຕະຫຼາດຕໍ່ບັນດາປະເທດດັ່ງກ່າວ, ເປີດກວ້າງການລົງທຶນ, ເພີ່ມການນຳເຂົ້າສິນຄ້າຈາກປະເທດໝູ່ເກາະ, ແລະຍິນດີຕ້ອນຮັບປະເທດເຫຼົ່ານີ້ພັດທະນາໄປພ້ອມກັບການພັດທະນາຂອງຈີນ. ທ່ານສີຈິ້ນຜິງກ່າວຕື່ມວ່າ: ຈີນສະໜັບສະໜູນປະເທດໝູ່ເກາະເຫຼົ່ານີ້ສົ່ງ “ສຽງຮຽກຮ້ອງແຫ່ງມະຫາສະໝຸດປາຊີຟິກ”, ສະໜັບສະໜູນການປະເທດໝູ່ເກາະເຫຼົ່ານີ້ໃນຊຸກຍູ້ຂໍ້ລິເລີ່ມ “ມະຫາສະໝຸດປາຊີຟິກສີຄາມ”, ເພີ່ມທະວີການແລກປ່ຽນແລະປະສານງານກັບບັນດາປະເທດໝູ່ເກາະໃນວຽກງານສາກົນ, ຊ່ວຍເຫຼືອເຊິ່ງກັນແລະກັນ, ຮ່ວມກັນປົກປັກຮັກສາຄວາມຍຸດຕິທຳແລະຄວາມເປັນທຳໃນສາກົນ.
ຜູ້ນຳບັນດາປະເທດໝູ່ເກາະທີ່ເຂົ້າຮ່ວມການພົບປະຄັ້ງນີ້ຕ່າງກໍ່ໄດ້ສະແດງຄວາມເຊື່ອມໝັ້ນວ່າ, ຈີນແມ່ນຄູ່ຮ່ວມທີ່ສຳຄັນທີ່ສາມາດຊ່ວຍໃຫ້ບັນດາປະເທດໝູ່ເກາະມະຫາສະໝຸດປາຊີຟິກໃຕ້ບັນລຸວິໄສທັດການພັດທະນາ,ສ້າງຄວາມຜາສຸກໃຫ້ແກ່ປະຊາຊົນແລະຮັບມືກັບສິ່ງທ້າທາຍໃນທົ່ວໂລກ, ແລະຍິນດີຕັ້ງໜ້າເຂົ້າຮ່ວມການສ້າງ ໜຶ່ງແລວໜຶ່ງເສັ້ນທາງ. ຈາກນີ້ ຈິ່ງເຫັນວ່າຈີນແລະບັດນາປະເທດໝູ່ເກາະມະຫາສະໝຸດປາຊີຟິກໃຕ້ໄດ້ເຂົ້າສູ່ຍຸກໃໝ່ແຫ່ງການຮ່ວມມືຮອບດ້ານແລ້ວ!
ຄຳເຫັນ
0