ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ທ່ານເຊີແກ ລາບຣົຟ ລັດຖະມົນຕີກະຊວງການຕ່າງປະເທດຣັດເຊຍ ກ່າວໃນວັນທີ 16 ພະຈິກນີ້ວ່າ: ອາເມຣິກາພວມໃສ່ຄວາມກົດດັນຕໍ່ຣັດເຊຍຢ່າງຮຸນແຮງບໍ່ເຄີຍມີມາໃນເມື່ອກ່ອນ ໂດຍເຈຕະນາປັດເຂ່ຍບໍລິສັດຂະໜາດໃຫຍ່ຂອງຣັດເຊຍອອກຈາກຕະຫຼາດສາກົນ ແລະ ສະກັດກັ້ນການພັດທະນາເສດຖະກິດສັງຄົມຂອງຣັດເຊຍ.
ຂ່າວສານຕັສ ໄດ້ອ້າງຕາມຄຳເວົ້າຂອງທ່ານລາບຣົຟ ທີ່ກ່າວໃນກອງປະຊຸມທີ່ກ່ຽວຂ້ອງຂອງກະຊວງການຕ່າງປະເທດຣັດເຊຍມາລາຍງານໃນວັນທີ 16 ພະຈິກນີ້ວ່າ: ການສົ່ງຄຳຂາດແລະບີບບັງຄັບເພື່ອໃຫ້ຣັດເຊຍອ່ອນຍອມລົງໄດ້ກາຍເປັນ “ນາມບັດ” ຂອງອາເມຣິກາ. ປັດຈຸບັນ, ຣັດເຊຍໄດ້ຜະເຊີນກັບການແຂ່ງຂັນໃນຕະຫຼາດສາກົນນັບມື້ນັບຮຸນແຮງ ແລະ ໃນຕໍ່ໜ້າຈະສືບຕໍ່ຜະເຊີນກັບຄວາມກົດດັນແບບບໍ່ເຄີຍມີມາໃນເມື່ອກ່ອນ. ຂະນະທີ່ຈຸດປະສົງຂອງອາເມຣິກາກໍຄືປັດເຂ່ຍບໍລິສັດໃຫຍ່ຂອງຣັດເຊຍອອກຈາກຕະຫຼາດສາກົນ ທັງສະກັດກັ້ນການພັດທະນາເສດຖະກິດສັງຄົມພາຍໃນປະເທດຣັດເຊຍ.
ທ່ານລາບຣົຟ ກ່າວວ່າ: ໃນສະພາບການດັ່ງກ່າວ, ຣັດເຊຍຈະສືບຕໍ່ເປີດກວ້າງການຮ່ວມມືກັບປະເທດຢູ່ອາຊີ, ອາເມຣິກາລາຕິນ ແລະ ອາຟຣິກາ ເຊິ່ງເປັນຄູ່ຮ່ວມຂອງຕົນ ແລະ ພັດທະນາການພົວພັນດ້ານເສດຖະກິດໃນຮູບແບບຕ່າງໆກັບພາຍນອກ. ໃນການສົນທະນາກັບປະເທດຕາເວັນຕົກ, ຣັດເຊຍຈະສືບຕໍ່ຊຸກຍູ້ການປາສະຈາກການເມືອງໃນຂົງເຂດການຄ້າແລະການລົງທຶນ.
ຄຳເຫັນ
0