ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕອນເຊົ້າວັນທີ 18 ພະຈິກນີ້ ຕາມເວລາທ້ອງຖິ່ນ, ກອງປະຊຸມບໍ່ເປັນທາງການຜູ້ນຳອົງການຮ່ວມມືເສດຖະກິດອາຊີປາຊີຟິກຫຼື APEC ຄັ້ງທີ 26 ໄດ້ຈັດຂຶ້ນຢູ່ພັອດໂມເຣັສບີ ນະຄອນຫຼວງຂອງປາປົວນິວກີເນ. ທ່ານສີຈິ້ນຜິງ ປະທານປະເທດຈີນໄດ້ເຂົ້າຮ່ວມກອງປະຊຸມເທື່ອນີ້. ໃນເວລາກ່າວປາໄສ, ທ່ານຊີ້ອອກວ່າ: ຈີນຈະລົງເລິກເຂົ້າຮ່ວມຂະບວນການຮ່ວມມືອາຊີປາຊີຟິກ, ເພີ່ມທະວີການລົງທຶນ, ລົງເລິກການຮ່ວມມືຕົວຈິງກັບຝ່າຍຕ່າງໆ, ປະກອບສ່ວນອັນໃໝ່ເຂົ້າໃນການພັດທະນາແລະຄວາມຈະເລີນຮຸ່ງເຮືອງຂອງພາກພື້ນອາຊີປາຊີຟິກ.
ທ່ານສີຈິ້ນຜິງໄດ້ສະເໜີເຈດຈຳນົງ 4 ຂໍ້ ຄື: 1, ຍຶດໝັ້ນຊຸກຍູ້ການຫັນເສດຖະກິດພາກພື້ນເປັນເອກະພົບດຽວ, ສ້າງເສດຖະກິດອາຊີປາຊີຟິກໃຫ້ເປັນແບບໄຂປະຕູ; 2, ຍຶດໝັ້ນຖືຫົວຄິດປະດິດສ້າງເປັນແມ່ແຮງ, ບົ່ມເພາະພະລັງແຮງໃໝ່ໃນການເຕີບໂຕ; 3, ຍຶດໝັ້ນປັບປຸງເຄືອຂ່າຍເຊື່ອມຈອດກັນໃຫ້ສົມບູນຂຶ້ນຕື່ມ, ຊຸກຍູ້ການພັດທະນາແບບໂອບອ້ອມອາລີແລະປະສານງານກັນ; 4, ຍຶດໝັ້ນລົງເລິກການພົວພັນຄູ່ຮ່ວມ, ເກາະແຂນກັນຮັບມືກັບສິ່ງທ້າທາຍຮ່ວມ.
ທ່ານສີຈິ້ນຜິງຍັງຊີ້ອອກວ່າ: ເສັ້ນທາງໄປສູ່ເຂດການຄ້າເສລີອາຊີປາຊີຟິກຈະບໍ່ຮາບພຽງ, ແຕ່ຝ່າຍຕ່າງໆຕ້ອງກ້າວໄປສູ່ທິດທາງໃຫຍ່ແລະເປົ້າໝາຍໃຫຍ່ນີ້ຢ່າງສະເໝີຕົ້ນສະເໝີປາຍ. ຄວນເດັດດ່ຽວປົກປັກຮັກສາລະບົບການຄ້າຫຼາຍຝ່າຍທີ່ຖືກົດລະບຽບເປັນພື້ນຖານ, ສະກັດກັ້ນລັດທິປົກປ້ອງຢ່າງຈະແຈ້ງ.
ທ່ານສີຈິ້ນຜິງຍັງກ່າວຕື່ມວ່າ: ການເຊື່ອມຈອດກັນແມ່ນພື້ນຖານແຫ່ງການບັນລຸການພັດທະນາແບບໂອບອ້ອມອາລີແລະປະສານງານກັນ. ບັນດາປະເທດອາຊີປາຊີຟິກມີສະພາບແຫ່ງຊາດທີ່ຕ່າງກັນໄປ, ສະນັ້ນ, ມີຄວາມຂັດແຍ້ງກັນບໍ່ແມ່ນເລື່ອງທີ່ແປກປະຫຼາດ. ຂໍ້ກະແຈແມ່ນຕ້ອງຍຶດໝັ້ນຫຼັກການຮ່ວມທີ່ສະແຫວງຫາການພັດທະນາຮ່ວມກັນ, ສົ່ງເສີມຈິດໃຈຄູ່ຮ່ວມ, ແກ້ໄຂຄວາມຂັດແຍ້ງກັນດ້ວຍການປຶກສາຫາລື, ຄົ້ນຄວ້າແກ້ໄຂສິ່ງທ້າທາຍຮ່ວມ.
ໃນເວລາບັນລະຍາຍເຈດຈຳນົງທີ່ກ່ຽວຂ້ອງ, ທ່ານສີຈິ້ນຜິງໄດ້ກ່າວເຖິງມາດຕະການຂອງຈີນຢ່າງລະອຽດ ແລະແຈ້ງໃຫ້ຮູ້ວ່າຈີນຈະເຮັດແນວໃດເພື່ອລົງເລິກການຮ່ວມມືກັບຝ່າຍຕ່າງໆຂອງອາຊີປາຊີຟິກ. ທ່ານກ່າວວ່າ: ຈີນຈະຜ່ອນຄາຍການອະນຸຍາດໃຫ້ເຂົ້າຕະຫຼາດຢ່າງຫຼວງຫຼາຍ, ເພີ່ມຄວາມແຮງປົກປ້ອງສິດຊັບສິນທາງປັນຍາ ແລະສ້າງສະພາບແວດລ້ອມການລົງທຶນແລະທຸລະກິດທີ່ມີແຮງດຶງດູດຫຼາຍກວ່າເກົ່າ.
ທ່ານສີຈິ້ນຜິງກ່າວເນັ້ນວ່າ: ຈີນແມ່ນຜູ້ລິເລີ່ມທີ່ຕັ້ງໜ້າແລະຜູ້ປະຕິບັດທີ່ເດັດດ່ຽວໜຽວແໜ້ນໃນການຮ່ວມມືອາຊີປາຊີຟິກ. ການພັດທະນາຂອງຈີນແຍກອອກຈາກການຮ່ວມມືຢ່າງແໜ້ນແຟ້ນກັບຝ່າຍຕ່າງໆຂອງອາຊີອາຊີຟິກບໍ່ໄດ້ ແລະໄດ້ບຸກເບີກຊ່ອງຫວ່າງທີ່ກວ້າງຂວາງໃຫ້ແກ່ການພັດທະນາຂອງອາຊີປາຊີຟິກ. ອັດຕາປະກອບສ່ວນຂອງເສດຖະກິດຈີນທີ່ມີຕໍ່ການເຕີບໂຕຂອງເສດຖະກິດໂລກໄດ້ຮັກສາຢູ່ 30% ຂຶ້ນໄປມາໂດຍຕະຫຼອດ. ທ່າອຽງກວມລວມຂອງເສດຖະກິດຈີນທີ່ພັດທະນາໄປສູ່ທິດທີ່ດີຢ່າງໝັ້ນທ່ຽງແລະຍາວນານນັ້ນຈະໄດ້ຮັບການຮັກສາຕໍ່ໄປ. ຜູ້ນຳຂອງພາກພື້ນອາຊີປາຊີຟິກຄວນວາງແຜນວິໄສທັດການຮ່ວມມືຫຼັງປີ 2020 ຂອງ APEC, ພະຍາຍາມຮັກສາທ່າອຽງການຮ່ວມມືຂອງອາຊີປາຊີຟິກ, ກ້າວໄປສູ່ລະດັບສູງກວ່າເກົ່າຢ່າງໜັກແໜ້ນ.
ຜູ້ນຳຂອງອົງກອນເສດຖະກິດຕ່າງໆທີ່ຮ່ວມປະຊຸມກ່າວວ່າ: ການພັດທະນາຂອງເສດຖະກິດອາຊີປາຊີຟິກມີອະນາຄົດທີ່ດີ, ແຕ່ກໍປະເຊີນໜ້າກັບສິ່ງທ້າທາຍຈາກດ້ານກຳແພງການຄ້າແລະລັດທິປົກປ້ອງ. ພາຍໃຕ້ສະຖານະການປັດຈຸບັນ, ຝ່າຍຕ່າງໆຄວນປົກປັກຮັກສາລັດທິຫຼາຍຝ່າຍແລະລະບົບການຄ້າຫຼາຍຝ່າຍຢ່າງເດັດດ່ຽວໜຽວແໜ້ນ, ຄັດຄ້ານລັດທິປົກປ້ອງ, ສະໜັບສະໜູນ APEC ສືບຕໍ່ເສີມຂະຫຍາຍບົດບາດທີ່ສຳຄັນໃນດ້ານການຊຸກຍູ້ການຫັນການຄ້າແລະການລົງທຶນເປັນແບບເສລີແລະແບບສະດວກແລະບັນລຸການພັດທະນາແບບສະໝ່ຳສະເໝີກັນ ມີຫົວຄິດປະດິດສ້າງ ແບບຍືນຍົງແລະໂອບອ້ອມອາລີ, ຊຸກຍູ້ການສ້າງເຂດການຄ້າເສລີອາຊີປາຊີຟິກ, ເກາະແຂນກັນສ້າງອາຊີປາຊີຟິກທີ່ມີພະລັງຊີວິດແລະເປີດປະຕູ. ຝ່າຍຕ່າງໆຄວນເລັ່ງລັດວາງແຜນວິໄສທັດການຮ່ວມມືຫຼັງປີ 2020 ຂອງ APEC ແລະເຜີຍແຜ່ເຕັກນິກດີຈີຕອນແລະໝາກຜົນການປະດິດສ້າງໃນອົງກອນເສດຖະກິດຕ່າງໆ.
ຕອນເຊົ້າວັນທີ 18 ພະຈິກນີ້, ທ່ານສີຈິ້ນຜິງຍັງໄດ້ຮ່ວມກັບຜູ້ນຳອົງກອນເສດຖະກິດຕ່າງໆຂອງ APEC ໄປເຂົ້າຮ່ວມກອງປະຊຸມສົນທະນາບໍ່ເປັນທາງການກ່ຽວກັບສະຖານະການເສດຖະກິດໂລກ, ແລະໄດ້ຟັງນາງຄຼິສຕີນ ລາກາດ ຜູ້ອຳນວຍການໃຫຍ່ອົງການກອງທຶນເງິນຕາສາກົນຫຼື IMF ແນະນຳສະຖານະການເສດຖະກິດໂລກ.
ຄຳເຫັນ
0