ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 5 ທັນວານີ້, ຈີນ ແລະປອກຕຸຍການໄດ້ອອກ “ຖະແຫຼງການຮ່ວມຈີນ-ປອກຕຸຍການກ່ຽວກັບການເພີ່ມທະວີສາຍພົວພັນຄູ່ຮ່ວມຍຸດທະສາດຮອບດ້ານຕື່ມອີກ”, ສອງຝ່າຍຕັດສິນໃຈເຊັນບົດບັນທຶກຄວາມເຂົ້າໃຈລະຫວ່າງລັດຖະບານກ່ຽວກັບການສ້າງ “ໜຶ່ງແລວໜຶ່ງເສັ້ນທາງ” ຮ່ວມກັນ.
ຖະແຫຼງການດັ່ງກ່າວໄດ້ລະບຸວ່າ: ປອກຕຸຍການຍິນດີເຂົ້າຮ່ວມຂໍ້ລິເລີ່ມການສ້າງ “ໜຶ່ງແລວໜຶ່ງເສັ້ນທາງ” ຮ່ວມກັນກັບຈີນ, ສອງຝ່າຍຍິນດີເພີ່ມທະວີການຮ່ວມມືກັບປະເທດຝ່າຍທີສາມ ຄື: ທະວີບອາຟຣິກາ, ອາເມຣິກາລາຕິນ ແລະຂົງເຂດອື່ນໆ. ສອງຝ່າຍເອົາໃຈໃສ່ພັດທະນາການພົວພັນດ້ານເສດຖະກິດ-ການຄ້າລະຫວ່າງສອງປະເທດ, ຍິນດີສືບຕໍ່ເພີ່ມທະວີການແລກປ່ຽນ ແລະການຮ່ວມມືທາງດ້ານວັດທະນະທຳ, ການສຶກສາ, ການທ່ອງທ່ຽວ, ກິລາ ແລະອື່ນໆ.
ຖະແຫຼງການດັ່ງກ່າວຍັງໄດ້ລະບຸວ່າ: ສອງຝ່າຍຢືນຢັນຈະສະໜັບສະໜູນລັດທິຫຼາຍຝ່າຍ, ປົກປັກຮັກສາຈຸປະສົງ ແລະຫຼັກການຂອງ “ກົດບັດອົງການສະຫະປະຊາຊາດ”, ສະໜັບສະໜູນອົງການ ສປຊ ເສີມຂະຫຍາຍບົດບາດຫຼາຍກວ່າເກົ່າດ້ານການຮັກສາສັນຕິພາບ ແລະຄວາມໝັ້ນຄົງໃນໂລກ, ຊຸກຍູ້ການພັດທະນາແບບຍືນຍົງ ແລະສົ່ງເສີມສິດທິມະນຸດ. ສອງຝ່າຍສະໜັບສະໜູນເສດຖະກິດໂລກແບບເປີດປະຕູສູ່ພາຍນອກ, ຄັດຄ້ານລັດທິປົກປ້ອງ ແລະລັດທິຝ່າຍດຽວທຸກຮູບແບບຢ່າງເດັດດ່ຽວໜຽວແໜ້ນ.
ຄຳເຫັນ
0