ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ໃນເວລາຕອບຄຳຖາມທີ່ກ່ຽວຂ້ອງໃນກອງປະຊຸມຖະແຫຼງຂ່າວທີ່ຈັດຂຶ້ນໃນວັນທີ 11 ທັນວານີ້, ທ່ານ ລູ້ຄ່າງ ໂຄສົກກະຊວງການຕ່າງປະເທດຈີນກ່າວວ່າ: ຍາມໃດ, ຈີນກໍມີທ່າທີເປີດປະຕູການດຳເນີນການສົນທະນາແລະແລກປ່ຽນໃນຂົງເຂດສິດທິມະນຸດກັບປະເທດອື່ນບົນພື້ນຖານຕ່າງເຄົາລົບເຊິ່ງກັນແລະກັນ.
ມີນັກຂ່າວຖາມວ່າ: ຕາມສື່ມວນຊົນເຢຍລະມັນບາງສຳນັກລາຍງານວ່າ, ໃນເວລາພົບປະກັບຜູ້ນຳຈີນ, ທ່ານ ແຟຣງ ວອນເຕີ ສະໄຕໄມເອີ ປະທານາທິບໍດີເຢຍລະມັນໄດ້ກ່າວເຖິງບັນຫາສິດທິມະນຸດຂອງຈີນ. ຈີນຢືນຢັນໄດ້ບໍ່? ແລະມີຄຳຕອບແນວໃດຕໍ່ເລື່ອງນີ້?
ທ່ານ ລູ້ຄ່າງ ຕອບວ່າ: ການແລກປ່ຽນແລະການຮ່ວມມືລະຫວ່າງຈີນກັບເຢຍລະມັນ ມີເນື້ອໃນອຸດົມສົມບູນ, ລະຫວ່າງຜູ້ນຳສອງປະເທດ ບໍ່ພຽງແຕ່ໄດ້ຮັກສາການແລກປ່ຽນກັນເປັນປະຈຳເທົ່ານັ້ນ, ຫົວຂໍ້ຂອງການແລກ່ປ່ຽນ ກໍກວ້າງຂວາງຫຼາຍ, ໃນນັ້ນ ລວມທັງການປົກປ້ອງສິດທິມະນຸດ, ຊາວອົບພະຍົບ, ຊາວຍົກຍ້າຍຖິ່ນຖານ, ສິ່ງທ້າທາຍຈາກການພັດທະນາຫັນເປັນດິຈິຕອນ ແລະບັນຫາອື່ນໆ. ຈີນແລະເຢຍລະມັນມີຄວາມແຕກຕ່າງກັນໃນດ້ານປະຫວັດສາດ, ວັດທະນະທຳ, ໄລຍະການພັດທະນາ ແລະລະບອບສັງຄົມ, ຈຶ່ງມີຄວາມເຫັນບໍ່ເປັນເອກະພາບກັນທັງໝົດຕໍ່ບາງບັນຫາ, ຂໍແຕ່ວ່າຕ່າງຍຶດໝັ້ນການເຄົາລົບເຊິ່ງກັນແລະກັນແລະປະຕິບັດຕໍ່ກັນຢ່າງສະເໝີພາບແລ້ວ, ກໍສາມາດດຳເນີນການສົນທະນາແລະແລກປ່ຽນບົນຈິດໃຈມິດຕະພາບ ເພື່ອເພີ່ມຄວາມເຂົ້າໃຈກັນ. ກໍຄືດັ່ງທີ່ທ່ານປະທານາທິບໍດີ ສະໄຕໄມເອີ ເວົ້າວ່າ, ເຢຍລະມັນແລະຈີນມີປະຫວັດສາດແລະບົດຮຽນທີ່ຕ່າງກັນ, ການທີ່ມີຄວາມເຫັນຕ່າງກັນໃນບາງບັນຫານັ້ນ ແມ່ນເລື່ອງປົກກະຕິ, ໃນຖານະເປັນຄູ່ຮ່ວມຍຸດທະສາດ, ສາມາດສາມາດດຳເນີນການແລກປ່ຽນກັນຜ່ານການສົນທະນາຢ່າງສະເໝີພາບບົນພື້ນຖານເຄົາລົບກັນ ເພື່ອເພີ່ມຄວາມເຂົ້າໃຈກັນ, ຫາກບໍ່ແມ່ນປັ້ນເລື່ອງໃຫ້ເປັນຂ່າວຢູ່ສື່ມວນຊົນ.
ຄຳເຫັນ
0