ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 13 ທັນວານີ້, ທ່ານລີວຢົງຟູ້ ຫົວໜ້າຫ້ອງການຊ່ວຍເຫຼືອຜູ້ທຸກຍາກລັດຖະບານຈີນໄດ້ເປີດເຜີຍຢູ່ນະຄອນຫຼວງປັກກິ່ງວ່າ: ໄລຍະດຳເນີນການປະຕິຮູບ ແລະເປີດປະຕູສູ່ພາຍນອກ 40 ປີຜ່ານມາ, ຈີນໄດ້ເປີດຂະບວນການຫຼຸດຜ່ອນຄວາມທຸກຍາກໃຫຍ່ທີ່ສຸດໃນປະຫວັດສາດຂອງມວນມະນຸດ, ໄດ້ຊ່ວຍຜູ້ທຸກຍາກຊົນນະບົດຫຼາຍກວ່າ 700 ລ້ານຄົນຫຼຸດພົ້ນອອກຈາກຄວາມທຸກຍາກ. ຄາດວ່າຮອດປີ 2020, ຜູ້ທຸກຍາກຢູ່ຊົນນະບົດຈີນຫຼຸດພົ້ນອອກຈາກຄວາມທຸກຍາກທັງໝົດ ແລະຈະສາມາດລົບລ້າງເມືອງທຸກຍາກໄດ້ທັງໝົດເຊັ່ນກັນ, ສາມາດແກ້ໄຂຄວາມທຸກຍາກຂອງພາກພື້ນ ເຊິ່ງສະແດງໃຫ້ເຫັນວ່າ: ເສັ້ນທາງຫຼຸດຜ່ອນຄວາມທຸກຍາກທີ່ມີສີສັນພິເສດຂອງຈີນກຳລັງສ້າງຄວາມອັດສະຈັນໃໝ່.
ປີນີ້ແມ່ນປີແຫ່ງການດຳເນີນການປະຕິຮູບ ແລະເປີດປະຕູສູ່ພາຍນອກຈີນຄົບຮອບ 40 ປີ. ໃນໄລຍະ 40 ປີຜ່ານມາ, ອັດຕາການເກີດຄວາມທຸກຍາກໃນຊົນນະບົດຈີນຫຼຸດລົງຈາກ 97,5% ຢ່າງຕໍ່ເນື່ອງ, ຄາດວ່າໃນປີ 2018 ຈະຍັງເຫຼືອຕ່ຳກວ່າ 2%. ວັນທີ 13 ທັນວານີ້, ທ່ານລີວຢົງຟູ້ ຫົວໜ້າຫ້ອງການຊ່ວຍເຫຼືອຜູ້ທຸກຍາກລັດຖະບານຈີນໄດ້ເປີດເຜີຍຢູ່ນະຄອນຫຼວງປັກກິ່ງວ່າ: ການຊ່ວຍເຫຼືອຜູ້ທຸກຍາກຂອງຈີນໄດ້ຮັບໝາກຜົນອັນໃຫຍ່ຫຼວງທີ່ໂລກພວມສົນໃຈ, ສາເຫດຕົ້ນຕໍແມ່ນຈີນໄດ້ຄົ້ນພົບເສັ້ນທາງຫຼຸດຜ່ອນຄວາມທຸກຍາກທີ່ສອດຄ່ອງກັບເງື່ອນໄຂຂອງຈີນ ແລະມີສີສັນພິເສດຂອງຈີນ.
ທ່ານກ່າວຕື່ມວ່າ: ຈີນຈະຮັກສາທ່າທີທີ່ເປີດປະຕູສູ່ພາຍນອກຢ່າງສະເໝີຕົ້ນສະເໝີປາຍ, ຕັ້ງໜ້າຖອດຖອນບົດຮຽນການຫຼຸດຜ່ອນຄວາມທຸກຍາກຂອງສາກົນ, ດຳເນີນການຮ່ວມມືດ້ານການຫຼຸດຜ່ອນຄວາມທຸກຍາກກັບທະວີບອາຟຣິກາ, ອາເມຣິກາລາຕິນ, ອາຊຽນ ແລະບັນດາປະເທດທີ່ກ່ຽວຂ້ອງຕາມ “ໜຶ່ງແລວໜຶ່ງເສັ້ນທາງ” ເພື່ອປະກອບສ່ວນສະຕິປັນຍາຈີນໃຫ້ແກ່ພາລະກິດຫຼຸດຜ່ອນຄວາມທຸກຍາກສາກົນ.
ຄຳເຫັນ
0