ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ແຕ່ວັນທີ 7-9 ມັງກອນນີ້, ຈີນ ແລະ ອາເມຣິກາໄດ້ປຶກສາຫາລືເສດຖະກິດການຄ້າລະດັບຮອງລັດຖະມົນຕີຢູ່ນະຄອນຫຼວງປັກກິ່ງ. ກ່ຽວກັບຜົນການປຶກສາຫາລືຄັ້ງນີ້, ທ່ານກ່າວເຟິ່ງ ໂຄສົກກະຊວງການຄ້າຈີນ ກ່າວໃນກອງປະຊຸມຖະແຫຼງຂ່າວທີ່ຈັດຂຶ້ນໃນວັນທີ 10 ມັງກອນນີ້ວ່າ: ສອງຝ່າຍລ້ວນແຕ່ຕັ້ງໜ້າຈັດຕັ້ງປະຕິບັດເນື້ອໃນຈິດໃຈຂອງຂໍ້ຕົກລົງສຳຄັນລະຫວ່າງປະມຸກລັດສອງປະເທດ, ໄດ້ແລກປ່ຽນກັນຢ່າງກວ້າງຂວາງ, ເລິກເຊິ່ງ ແລະ ລະອຽດຕໍ່ບັນຫາທີ່ສອງຝ່າຍສົນໃຈຮ່ວມກັນ. ຂະນະທີ່ການປຶກສາຫາລືຄັ້ງນີ້ໄດ້ແກ່ຍາວເວລາ 2 ວັນອອກເປັນ 3 ວັນນັ້ນ, ທ່ານກ່າວເຟິ່ງ ກ່າວວ່າ: “ຫົວຂໍ້ຕ່າງໆທີ່ສອງຝ່າຍປຶກສາຫາລືກັນເຊິ່ງລວມທັງບັນຫາການຄ້າ ແລະ ບັນຫາໂຄງປະກອບ. ຂະນະທີ່ການແກ່ຍາວເວລາປຶກສາຫາລືກັນກໍເປັນການສະແດງໃຫ້ເຫັນວ່າ ສອງຝ່າຍລ້ວນແຕ່ມີທ່າທີອັນສຸຂຸມຮອບຄອບ, ຕັ້ງອົກຕັ້ງໃຈ ແລະ ເປີດອົກເປີດໃຈຕໍ່ການປຶກສາຫາລືຄັ້ງນີ້ ແລະ ມີຄວາມພະຍາຍາມເພື່ອຈັດຕັ້ງປະຕິບັດເນື້ອໃນຈິດໃຈຂອງຂໍ້ຕົກລົງສຳຄັນລະຫວ່າງປະມຸກລັດສອງປະເທດ.”
ທ່ານກ່າວເຟິ່ງ ກ່າວຕື່ມວ່າ: ບັນຫາໂຄງປະກອບແມ່ນເນື້ອໃນສຳຄັນຂອງການປຶກສາຫາລືເສດຖະກິດການຄ້າລະຫວ່າງຈີນ-ອາເມຣິກາໃນຄັ້ງນີ້ ແລະ ໄດ້ຮັບຄວາມຄືບໜ້າໃນຂົງເຂດດັ່ງກ່າວ ເຊິ່ງໄດ້ເພີ່ມຄວາມເຂົ້າໃຈກັນລະຫວ່າງສອງຝ່າຍ ແລະ ກໍໄດ້ສ້າງພື້ນຖານໃຫ້ແກ່ການແກ້ໄຂບັນຫາທີ່ສອງຝ່າຍສົນໃຈຮ່ວມກັນ. ທ່ານກ່າວເຟິ່ງ ຍັງກ່າວຕໍ່ໄປວ່າ: “ໃນຂັ້ນຕໍ່ໄປ, ສອງຝ່າຍຈະສືບຕໍ່ພະຍາຍາມຮ່ວມກັນ ເພື່ອຊຸກຍູ້ການປຶກສາຫາລືລະຫວ່າງສອງຝ່າຍໃຫ້ດຳເນີນຕາມແຜນການທີ່ໄດ້ວາງໄວ້.”
ຄຳເຫັນ
0