ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 20 ມັງກອນນີ້, ລັດຖະບານໄທໄດ້ຮ່ວມກັບວິສາຫະກິດທີ່ກ່ຽວຂ້ອງ ເຊື້ອເຊີນນັກທ່ອງທ່ຽວຈີນເພື່ອເປັນສັກຂີພິຍານໃຫ້ແກ່ການສ້າງສະຖິຕິກິເນັສບຸກກ່ຽວກັບ “ເຂົ້າໜຽວໝາກມ່ວງທີ່ໃຫຍ່ທີ່ສຸດຂອງໂລກ” ໂດຍໄທຈັດຂຶ້ນ ເພື່ອສະແດງໃຫ້ເຫັນເຖິງການໃຫ້ຄວາມສຳຄັນຕໍ່ນັກທ່ອງທ່ຽວຈີນແລະເພື່ອຍົກສູງພາບພົດດ້ານການທ່ອງທ່ຽວຂອງໄທ.
ໃນງານລ້ຽງອາຫານເຂົ້າໜຽວໝາກມ່ວງໃຫ້ແກ່ 1 ໝື່ນຄົນທີ່ຈັດຈຶ້ນຢູ່ນະຄອນຫຼວງບາງກອກໃນມື້ດຽວກັນ, ເຈົ້າໜ້າທີ່ຮັບຮອງສະຖິຕິກິເນັສບຸກປະກາດວ່າ: ໄທໄດ້ນຳໃຊ້ເຂົ້າໜຽວ 1.500 ກິໂລ ແລະໝາກມ່ວງຫຼາຍພັນໜ່ວຍເຮັດເປັນເຂົ້າໜຽວໝາກມ່ວງທີ່ໃຫຍ່ທີ່ສຸດໃນໂລກປັດຈຸບັນເຊິ່ງມີນ້ຳໜັກເຖິງ 4.500 ກິໂລ. ນັກທ່ອງທ່ຽວຈີນເກືອບໝື່ນຄົນຖືກເຊີນໄປຊິມອາຫານຫວານທີ່ມີຊື່ສຽງດັ່ງກ່າວຂອງໄທ.
ທ່ານ ປຣະວິດ ວົງສຸວັນ ຮອງນາຍົກລັດຖະມົນຕີໄທໄດ້ກ່າວໃນງານລ້ຽງດັ່ງກ່າວວ່າ: ເມື່ອພິຈາລະນາເຖິງຈຳນວນນັກທ່ອງທ່ຽວຈີນທີ່ໄປທ່ຽວໄທນັ້ນໄດ້ຫຼຸດໜ້ອຍລົງ, ລັດຖະບານໄທຈຶ່ງຫວັງວ່າ ຜ່ານຈາກການເພີ່ມທະວີສ້າງສິ່ງອຳນວຍຄວາມສະດວກເພື່ອຄວາມປອດໄພດ້ານການທ່ອງທ່ຽວແລະການຈັດກິດຈະກຳກ່ຽວກັບການສ້າງສະຖິຕິກິເນັສບຸກຄັ້ງນີ້ ຈະສາມາດສ້າງມິດຕະພາບຕໍ່ນັກທ່ອງທ່ຽວຈີນ ແລະເພີ່ມທະວີຄວາມຮັກແພງກັນລະຫວ່າງປະຊາຊົນສອງຊາດ. ຂະນະດຽວກັນ, ລັດຖະບານໄທຍັງໄດ້ປະຕິບັດນະໂຍບາຍໃຫ້ບູລິມະສິດຕໍ່ນັກທ່ອງທ່ຽວຈີນຫຼາຍຢ່າງ ຄືໄດ້ປະກາດໃນຫວ່າງກ່ອນນີ້ບໍ່ດົນວ່າ, ຈະແກ່ຍາວເວລາຍົກເວັ້ນຄ່າວີຊາກັບດ່ານຕໍ່ນັກທ່ອງທ່ຽວຂອງ 21 ປະເທດແລະເຂດແຄວ້ນເຊິ່ງລວມທັງຈີນນັ້ນໄປຈົນເຖິງວັນທີ 30 ເມສາປີນີ້.
ຄຳເຫັນ
0