ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕາມຂ່າວCRI：ຫວ່າງກ່ອນນີ້ບໍ່ດົນ, ທ່ານຊຸຍ ທຽນ ຂາຍ, ເອກອັກຄະລັດຖະທູດຈີນປະຈຳອາເມລິກາກ່າວວ່າ, ການມີຄວາມຂັດແຍ້ງກັນລະຫວ່າງຈີນກັບອາເມລິກາແມ່ນເລື່ອງທີ່ປົກກະຕິ, ສິ່ງທີ່ສຳຄັນກໍ່ແມ່ນສອງຝ່າຍຄວນເພີ່ມທະວີຄວາມຮັບຮູ້ນຳກັນແລະຄວາມເຂົ້າໃຈກັນ, ວິນິດໃສຈຸດປະສົງດ້ານຍຸດທະສາດຂອງຝ່າຍກົງກັນຂ້າມຢ່າງຖືກຕ້ອງ. ກະແສຕົ້ນຕໍດ້ານການຮ່ວມມືແລະຕ່າງຝ່າຍຕ່າງໄດ້ຮັບຜົນປະໂຫຍດຮ່ວມກັນຂອງການພົວພັນລະຫວ່າງສອງປະເທດບໍ່ຄວນມີການປ່ຽນແປງ.
ວັນທີ 8 ກຸມພານີ້, ທ່ານຊຸຍ ທຽນ ຂາຍໄດ້ເຂົ້າຮ່ວມງານສົນທະນາກ່ຽວກັບການສ້າງຕັ້ງສາຍພົວພັນທາງການທູດລະຫວ່າງຈີນ-ອາເມລິກາຄົບຮອບ 40 ປີຢູ່ລັດມີຊີການຂອງອາເມລິກາ. ທ່ານກ່າວໃນງານສົນທະນາວ່າ, ການສ້າງຕັ້ງສາຍພົວພັນທາງການທູດລະຫວ່າງຈີນ-ອາເມລິກາກັບການເປີດປະຕູສູ່ໂລກພາຍນອກຂອງຈີນເກືອບໄດ້ດຳເນີນໃນເວລາດຽວກັນ, ນີ້ບໍ່ແມ່ນເລື່ອງບັງເອີນຢ່າງເດັດຂາດ. 2 ຂະບວນການປະຫວັດສາດໃຫຍ່ດັ່ງກ່າວໄດ້ຂະຫຍາຍໄປໜ້າພ້ອມກັນ, ເຊິ່ງໄດ້ນຳເອົາຜົນປະໂຫຍດຢ່າງໃຫຍ່ຫຼວງແກ່ປະຊາຊົນສອງປະເທດຈີນອາເມລິກາແລະປະຊາຊົນຂອງໂລກ. ເຖິງແມ່ນວ່າຈີນກັບອາເມລິກາມີຄວາມແຕກຕ່າງກັນໃນດ້ານປະຫວັດສາດ, ວັດທະນະທຳ, ລະບອບສັງຄົມແລະດ້ານອື່ນໆກໍຕາມ, ແຕ່ໃນ 40 ປີຜ່ານມານີ້, ກະແສຕົ້ນຕໍດ້ານການພົວພັນລະຫວ່າງສອງປະເທດແມ່ນການຮ່ວມມືແລະຕ່າງຝ່າຍຕ່າງໄດ້ຮັບຜົນປະໂຫຍດຮ່ວມກັນຕະຫຼອດມາ. ໃນ 40 ປີຜ່ານມາຈີນກັບອາເມລິກາລ້ວນແຕ່ໄດ້ມີການປ່ຽນແປງຢ່າງໃຫຍ່ຫຼວງ, ແຕ່ວ່າກະແສຕົ້ນຕໍດ້ານການພົວພັນລະຫວ່າງສອງປະເທດບໍ່ຄວນມີການປ່ຽນແປງ.
ທ່ານຊຸ່ຍ ທ່ຽນ ຂາຍກ່າວຕື່ມວ່າ, ການແລກປ່ຽນດ້ານວັດທະນະທຳໂດຍສະເພາະແມ່ນການຮ່ວມມືດ້ານການສຶກສາລະຫວ່າງສອງປະເທດແມ່ນເສົາຄ້ຳທີ່ສຳຄັນຂອງການພົວພັນລະຫວ່າງຈີນ-ອາເມລິກາ. ໃນ 40 ປີຜ່ານມາທີ່ຈີນກັບອາເມລິກາໄດ້ສ້າງຕັ້ງການພົວພັນທາງການທູດເປັນຕົ້ນມາ, ຈຳນວນນັກຮຽນນັກສຶກສາຂອງຈີນທີ່ໄປຮຽນຢູ່ອາເມລິກາໄດ້ສ້າງສະຖິຕິໃໝ່ເລື້ອຍໆ, ນັກສຶກສາຂອງອາເມລິກາທີ່ມາຮຽນຢູ່ຈີນກໍເພີ່ມຂຶ້ນຢ່າງບໍ່ຢຸດຢັ້ງ. ນັພວກເຂົາເຈົ້າແມ່ນຂົວທີ່ສຳຄັນດ້ານການແລກປ່ຽນລະຫວ່າງສອງປະເທດ, ເຊິ່ງມີຜົນດີຕໍ່ການຊຸກຍູ້ກຄວາມເຂົ້າໃຈກັນລະຫວ່າງປະຊາຊົນຂອງສອງປະເທດ. ຈີນກັບອາເມລິກາຄວນສະໜັບສະໜູນແລະສົ່ງເສີມການແລກປ່ຽນດ້ານວັດທະນະທຳລະຫວ່າງສອງຝ່າຍຫຼາຍກວ່າເກົ່າ, ເພີ່ມທະວີພື້ນຖານດ້ານມິດຕະພາບແລະການຮ່ວມມືລະຫວ່າງຈີນ-ອາເມລິກາຢ່າງບໍ່ຢຸດຢັ້ງ
ຄຳເຫັນ
0