ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 14 ກຸມພານີ້, ທ່ານໄມ ພົມເພວ ລັດຖະມົນຕີກະຊວງການຕ່າງປະເທດອາເມຣິກາ ແລະທ່ານນາງ ດອງຄັງຄິງຮວາ ລັດຖະມົນຕີກະຊວງການຕ່າງປະເທດສ.ເກົາຫຼີໄດ້ພົບປະກັນຢູ່ນະຄອນຫຼວງວາກໂຊວີປະເທດໂປໂລຍ, ສອງຝ່າຍໄດ້ປຶກສາຫາລືກັນເພື່ອຊຸກຍູ້ການປອດນິວເຄຼຍຢູ່ແຫຼມເກົາຫຼີ ແລະບັນຫາອື່ນໆ.
ກະຊວງການຕ່າງປະເທດອາເມຣິກາໄດ້ອອກຖະແຫຼງການໃນມື້ດຽວກັນວ່າ: ທ່ານພົມເພວ ແລະທ່ານນາງ ຄັງຄິງຮວາໄດ້ປຶກສາຫາລືເຖິງຄວາມພະຍາຍາມກ່ຽວກັບການຊຸກຍູ້ສປປ.ເກົາຫຼີບັນລຸການປອດນິວເຄຼຍຢ່າງສິ້ນເຊິງ ແລະຜ່ານການກວດກາ ພ້ອມດຽວກັນກໍຈະແຈ້ງສະພາບການພົບປະກັບສປປ.ເກົາຫຼີໃຫ້ຝ່າຍກົງກັນຂ້າມໄດ້ຮັບຊາບ. ສອງຝ່າຍຍັງຊີ້ໃຫ້ເຫັນວ່າ: ຍິນດີສືບຕໍ່ສຸມໃສ່ການຮ່ວມມືລະຫວ່າງອາເມຣິກາ, ຍີ່ປຸ່ນ ແລະສ.ເກົາຫຼີ.
ວັນທີ 13 ກຸມພານີ້, ທ່ານພົມເພວໄດ້ໃຫ້ສຳພາດຕໍ່ສື່ມວນຊົນອາເມຣິກາ 2 ແຫ່ງວ່າ: ອາເມຣິກາຫວັງວ່າການພົບປະຂອງຜູ້ນຳສູງສຸດອາເມຣິກາ-ສປປ.ເກົາຫຼີທີ່ໃກ້ຈະຈັດຂຶ້ນໃນທ້າຍເດືອນກຸມພານີ້ຈະໄດ້ຮັບໝາກຜົນທີ່ດີ, ຈະສາມາດຊຸກຍູ້ການປອດນິວເຄຼຍຢູ່ແຫຼມເກົາຫຼີໃຫ້ມີຄວາມຄືບໜ້າຂຶ້ນອີກ ເພື່ອຜ່ອນຄາຍສະຖານະການຄວາມເຄັ່ງຕຶງຂອງພາກພື້ນ. ຖ້າການພົບປະຄັ້ງນີ້ບັນລຸໝາກຜົນເປັນຢ່າງດີ, ອາເມຣິກາຍິນດີຫຼຸດຜ່ອນການຂວ້ຳບາດດ້ານເສດຖະກິດຕໍ່ສປປ.ເກົາຫຼີ.
ຄຳເຫັນ
0