ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ທ່ານລິວເຮີ້ ກຳມະການກົມການເມືອງສູນກາງພັກກອມມູນິດຈີນ, ຮອງນາຍົກລັດຖະມົນຕີຈີນ, ຫົວໜ້າຝ່າຍຈີນຂອງການສົນທະນາເສດຖະກິດຮອບດ້ານຈີນ-ອາເມຣິກາ ແລະທ່ານໂຣເບີດ ໄລທີເຊີ ຜູ້ແທນການຄ້າອາເມຣິກາ,ທ່ານສະຕີເວັນ ມູນູຊິນ ລັດຖະມົນຕີກະຊວງການເງິນອາເມຣິກາໄດ້ດຳເນີນການປຶກສາຫາລືລະດັບສູງກ່ຽວກັບເສດຖະກິດການຄ້າຈີນ-ອາເມຣິກາຮອບທີ 6 ຢູ່ນະຄອນຫຼວງປັກກິ່ງແຕ່ວັນທີ 14-15 ກຸມພານີ້. ສອງຝ່າຍໄດ້ຕັ້ງໃຈຜັນຂະຫຍາຍຄວາມຮັບຮູ້ທີ່ເປັນເອກະພາບກັນຂອງປະມຸກລັດສອງປະເທດທີ່ໄດ້ຕົກລົງຮ່ວມກັນໃນການພົບປະທີ່ອາກຊັງຕີນ ແລະໄດ້ລົງເລິກແລກປ່ຽນຄວາມຄິດຄວາມເຫັນກ່ຽວກັບບັນຫາທີ່ສົນໃຈຮ່ວມກັນ ແລະບັນຫາທີ່ຝ່າຍຈີນມີຄວາມສົນໃຈເຊັ່ນ ການໂອນເຕັກນິກ,ການປົກປ້ອງຊັບສິນທາງປັນຍາ, ກຳແພງການຄ້າທີ່ບໍ່ແມ່ນພາສີ, ຂະແໜງການບໍລິການ, ກະສິກຳ,ຄວາມດຸນດ່ຽງດ້ານການຄ້າ, ກົນໄກປະຕິບັດແລະອື່ນໆ. ສອງຝ່າຍໄດ້ບັນລຸຄວາມເປັນເອກະພາບກັນທາງດ້ານຫຼັກການກ່ຽວກັບບັນຫາສຳຄັນ ທັງໄດ້ປຶກສາຫາລືຢ່າງລະອຽດກ່ຽວກັບບົດບັນທຶກຄວາມເຂົ້າໃຈວ່າດ້ວຍບັນຫາເສດຖະກິດການຄ້າລະຫວ່າງສອງຝ່າຍ ແລະທັງສອງຝ່າຍຢືນຢັນວ່າ ຈະເລັ່ງລັດປະຕິບັດໜ້າທີ່ວຽກງານຕາມເວລາກຳນົດຂອງການປຶກສາຫາລື ເຊິ່ງປະມຸກລັດສອງປະເທດໄດ້ກຳນົດໄວ້ ເພື່ອພະຍາຍາມບັນລຸຄວາມເປັນເອກະພາບກັນ.
ສອງຝ່າຍໄດ້ຕົກລົງຈະສືບຕໍ່ດຳເນີນການປຶກສາຫາລືຢູ່ນະຄອນຫຼວງວໍຊິງຕັນ ສະຫະລັດອາເມຣິກາໃນອາທິດໜ້າ.
ຄຳເຫັນ
0