ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 15 ກຸມພານີ້, ການເຈລະຈາລະດັບສູງດ້ານເສດຖະກິດ-ການຄ້າລະຫວ່າງຈີນ-ອາເມຣິກາຄັ້ງທີ 6 ທີ່ປະຈັກຕາຊາວໂລກໄດ້ສິ້ນສຸດລົງຢູ່ນະຄອນຫຼວງປັກກິ່ງ. ທ່ານສີຈິ້ນຜິງ ປະທານປະເທດຈີນໄດ້ຕ້ອນຮັບການເຂົ້າຢ້ຽມຄຳນັກບຂອງທ່ານໂຣເບີດ ໄລທີເຊີ ຜູ້ຕາງໜ້າການຄ້າອາເມຣິກາ ແລະທ່ານສຕີເວນ ມະນຸຊີນ ລັດຖະມົນຕີກະຊວງການເງິນອາເມຣິກາ ທີ່ນຳພາຄະນະເຂົ້າຮ່ວມການເຈລະຈາຄັ້ງນີ້. ທ່ານສີຈິ້ນຜິງກ່າວເນັ້ນວ່າ: ສອງປະເທດຈີນ-ອາເມຣິກາຫ່າງເຫີນກັນບໍ່ໄດ້, ສະນັ້ນ ການຮ່ວມມືເປັນການຄັດເລືອກທີ່ດີທີ່ສຸດ. ທ່ານຫວັງວ່າຄະນະຜູ້ແທນສອງຝ່າຍຈະສາມາດອີງຕາມຫຼັກການ ແລະທິດທາງທີ່ກຳນົດໄວ້ໂດຍທ່ານ ແລະທ່ານໂດໂນ ທຣຳ ປະທານາທິບໍດີອາເມຣິກາ ເພີ່ມທະວີການແລກປ່ຽນ, ເອົາໃຈໃສ່ການຮ່ວມມື, ຄຸ້ມຄອງຄວາມຂັດແຍ້ງກັນ ເພື່ອຊຸກຍູ້ການຮ່ວມມືດ້ານເສດຖະກິດ-ການຄ້າລະຫວ່າງຈີນ-ອາເມຣິກາ ແລະສາຍພົວພັນສອງປະເທດໃຫ້ພັດທະນາຢ່າງປອດໃສ ແລະໝັ້ນທ່ຽງ.
ນີ້ເປັນເທື່ອທຳອິດທີ່ທ່ານສີຈິ້ນຜິງ ປະທານປະເທດຈີນຕ້ອນຮັບການເຂົ້າຢ້ຽມຄຳນັບຂອງຜູ້ແທນເສດຖະກິດ-ການຄ້າອາເມຣິກາ ນັບແຕ່ຂໍ້ຂັດແຍ້ງດ້ານເສດຖະກິດ-ການຄ້າລະຫວ່າງຈີນ-ອາເມຣິກາເຄັ່ງຕຶງຍິ່ງຂຶ້ນ ແລະສອງຝ່າຍໄດ້ດຳເນີນການເຈລະຈາມາຫຼາຍເທື່ອໃນເດືອນກຸມພາປີ 2018 ເປັນຕົ້ນມາ. ໝາຍຄວາມວ່າການເຈລະຈາຄັ້ງນີ້ໄດ້ກ້າວໄປໜ້າອີກກ້າວໝຶ່ງບົນພື້ນຖານຄວາມຄືບໜ້າລັກສະນະຂັ້ນຕອນທີ່ສຳຄັນຂອງການເຈລະຈາຢູ່ວໍຊິງຕັນເມື່ອ 2 ອາທິດກ່ອນໜ້ານີ້ ແລະຍັງຊີ້ໃຫ້ເຫັນວ່າ ປະມຸກລັດສອງປະເທດໄດ້ເສີມຂະຫຍາຍບົດບາດຊີ້ນຳນຳພາອັນສຳຄັນຢ່າງສະເໝີຕົ້ນສະເໝີປາຍໃນການແກ້ໄຂຂໍ້ຂັດແຍ້ງດ້ານເສດຖະກິດ-ການຄ້າລະຫວ່າງຈີນ-ອາເມຣິກາຢ່າງເໝາະສົມ.
ນັບແຕ່ຂໍ້ຂັດແຍ້ງດ້ານເສດຖະກິດ-ການຄ້າລະຫວ່າງຈີນ-ອາເມຣິກາເຄັ່ງຕຶງຍິ່ງຂຶ້ນໃນເດືອນກຸມພາປີ 2018 ຜ່ານມາ, ໂທລະສັບສອງເທື່ອ ແລະການພົບປະເທື່ອດຽວໃນເວລາທີ່ສຳຄັນລະຫວ່າງປະມຸກລັດສອງປະເທດໄດ້ເສີມຂະຫຍາຍບົດບາດທີ່ສຳຄັນເປັນຢ່າງຍິ່ງ. ໂດຍສະເພາະແມ່ນການພົບປະຢູ່ອາກຊັງຕິນໃນເດືອນທັນວາປີ 2018, ປະມຸກລັດສອງປະເທດໄດ້ບັນລຸຄວາມເຫັນເປັນເອກະພາບກັນທີ່ສຳຄັນໃນການຢຸດຕິການເລື່ອນຂັ້ນສົງຄາມພາສີ ເຊິ່ງໄດ້ປ່ຽນແປງສະຖານະການເຄັ່ງຕຶງຂອງຂໍ້ຂັດແຍ້ງການຄ້າລະຫວ່າງສອງຝ່າຍ.
ໃນ 3 ເດືອນທີ່ຜ່ານມາ, ພາຍໃຕ້ການຊີ້ນຳນຳພາຂອງຄວາມຮັບຮູ້ຄືກັນອັນສຳຄັນຂອງປະມຸກລັດສອງປະເທດ, ຄະນະເສດຖະກິດການຄ້າສອງຝ່າຍຈີນອາເມລິກາໄດ້ເລັ່ງລັດການເປິກສາຫາລື, ໃນໄລຍະການເປິກສາຫາລືຮອບນີ້, ສອງຝ່າຍໄດ້ລົງເລິກການແລກປ່ຽນກ່ຽວກັບຫົວຂໍ້ທີ່ເອົາໃຈໃສ່ຮ່ວມກັນແລະບັນຫາທີ່ຝ່າຍຈີນສົນໃຈ, ແລະກ້າວເຖິງຂັ້ນມີຄວາມຮັບຮູ້ຄືກັນໃນດ້ານຫຼັກການກ່ຽວກັບບັນຫາຕົ້ນຕໍ, ແລະດຳເນີນການເປິກສາຫາລືກ່ຽວກັບເອກະສານບົດບັນທຶກຄວາມເຂົ້າໃຈກ່ຽວກັບບັນຫາເສດຖະກິດການຄ້າ. ສອງຝ່າຍຈະເລັ່ງລັດເຮັດວຽກໂດຍອີງຕາມເວລາທີ່ປະມຸກລັດສອງປະເທດກຳນົດ, ພະຍາຍາມກ້າວເຖິງຂັ້ນເປັນເອກະສັນກັນ, ແລະຕົກລົງວ່າຈະສືບຕໍ່ເປິກສາຫາລືຢູ່ວໍຊີງຕັງໃນອາທິດໜ້າ.
ໃນຖານເປັນກຸ່ມເສດຖະກິດໃຫຍ່ອັນດັບ1 ແລະ 2, ສອງປະເທດອາເມລິກາຈີນໄດ້ກ້າວໄປໜ້າຢ່າງບໍ່ຢຸດຢັ້ງຕາມເສັ້ນທາງແຫ່ງການແກ້ໄຂບັນຫາເສດຖະກິດການຄ້າ, ບໍ່ພຽງແຕ່ສອດຄ່ອງກັບຜົນປະໂຫຍດຂອງສອງຝ່າຍເທົ່ານັ້ນ, ຍັງສອດຄ່ອງກັບຄວາມຮຽກຮ້ອງຮ່ວມກັນຂອງຕະຫຼາດທົ່ວໂລກ. ກ່ອນແລະຫຼັງການເປິກສາຫາລືລະດັບສູງທີ່ປັກກິ່ງຮອບນີ້, ຕົວເລກດັດຊະນີຂອງຕະຫຼາດຫຸ້ນທົ່ວໂລກໄດ້ສູງຂຶ້ນໂດຍທົ່ວໄປ, ໄດ້ສະແດງໃຫ້ເຫັນເຖິງສັນຍານອັນແຮງກ້າທີ່ຕະຫຼາດມຸ່ງຫວັງຈີນກັບອາເມລິກາບັນລຸຄວາມປອງດອງກັນ. ບັນຫາເສດຖະກິດການຄ້າລະຫວ່າງ 2 ກຸ່ມເສດຖະກິດໃຫຍ່ທີ່ສຸດໃນໂລກແມ່ນສະຫຼັບສັບຊ້ອນກັນແລະສັບສົນຫຼາຍ, ຢ້ານວ່າຍາກທີ່ຈະໄດ້ແກ້ໄຂໝົດພາຍໃນ 90 ມື້. ປັດຈຸບັນຫ່າງຈາກວັນໝົດກຳນົດການເປິກສາຫາລືຍັງບໍ່ຮອດ 2 ອາທິດ, ສອງຝ່າຍຕ້ອງເລັ່ງລັດເຮັດວຽກ, ຕໍ່ໝາກຜົນສຸດທ້າຍ, ຍັງຕ້ອງມີຄວາມເຫັນໄປໃນແງ່ດີຢ່າງສຸຂຸນຮອບຄອບ. ແຕ່ວ່າ, ຄະນະເສດຖະກິດການຄ້າຈີນອາເມລິກາໄດ້ຮັກສາການຕິດຕຕໍ່ພົວພັນກັນຢ່າງສະໜິດແໜ້ນແລະຈະສືບຕໍ່ເປິກສາຫາລືໃນອາທິດໜ້າ, ປະມຸກລັດສອງປະເທດຕ່າງກໍໄດ້ຕ້ອນຮັບການເຂົ້າຢ້ຽມຄຳນັບຂອງຜູ້ແທນເສດຖະກິດການຄ້າຂອງປະເທດຝ່າຍກົງກັນຂ້າມ, ຝ່າຍອາເມລິກາສົ່ງຂ່າວວ່າປະມຸກລັດສອງປະເທດຈະພົບປະອີກເທື່ອໜຶ່ງ, ຈາກຂ່າວເຫຼົ່ານີ້ສາມາດເຫັນໄດ້ວ່າ, ຄົນທັງຫຼາຍຄວນມີເຫດຜົນທີ່ເຫັນໄປໃນແງ່ດີກວ່າເກົ່າຕໍ່ຈີນ-ອາເມລິກາທີ່ຈະກ້າວເຖິງຂັ້ນເຊັນສົນທິສັນຍາຮ່ວມມືໃນດ້ານເສດຖະກິດການຄ້າທີ່ຕ່າງຝ່າຍຕ່າງມີຜົນປະໂຫຍດສະບັບໜຶ່ງ.
ປີນີ້ແມ່ນຈີນອາເມລິກາສ້າງສາຍພົວພັນທາງການທູດຄົບຮອບ 40 ປີ. ໂດຍຜ່ານການຂະຫຍາຍຕົວເປັນເວລາ 40 ປີ, ຈີນອາເມລິກາໄດ້ກາຍເປັນຄູ່ການຄ້າໃຫຍ່ທີ່ສຸດແລະເປົ້າໝາຍປະເທດລົງທຶນທີ່ສຳຄັນ ເຊິ່ງກັນແລະກັນ, ຖ້າສົງຄາມການຄ້າລະຫວ່າງ2 ກຸ່ມເສດຖະກິດໃຫຍ່ສືບຕໍ່ກັນໄປ, ຜົນຮ້າຍຢ້ອນຫຼັງຈະບໍ່ກ້າຄິດ.
ໃນ 40 ປີທີ່ຜ່ານມາ, ຍ້ອນວ່າລະບອບສັງຄົມ, ປະຫວັດສາດວັດທະນະທຳ, ສະພາບແຫ່ງຊາດຕົວຈິງແມ່ນຕ່າງກັນ, ຈີນອາເມລິກາມີຄວາມເຂົ້າໃຈຜິດ, ຍິ່ງກວ່ານັ້ນໄດ້ເກີດວິກິດການອັນໜັກໜ່ວງຫຼາຍເທື່ອ. ແຕ່ໃນທີ່ສຸດ, ອາໄສສະຕິປັນຍາທາງການເມືອງຂອງຜູ້ນຳສອງຝ່າຍ, ສອງປະເທດບໍ່ພຽງແຕ່ໄດ້ແກ້ໄຂແລະຜ່ອນຄາຍວິກິດການເຫຼົ່ານີ້ເທົ່ານັ້ນ, ຍັງໄດ້ເພີ່ມຄວາມເຂົ້າໃຈເຊິ່ງກັນແລະກັນ, ຊຸກຍູ້ການພົວພັນສອງປະເທດໃຫ້ກັບຄືນສູ່ອົງໂຄຈອນທີ່ຮ່ວມມື. ເທື່ອນີ້ກໍ່ຄືກັນ, ປະກາດແຈ້ງການຮ່ວມຂອງຈີນອາເມລິກາ 3 ສະບັບ, ຄວາມຮັບຮູ້ຄືກັນທີ່ສຳຄັນແລະການພົວພັນວຽກງານອັນດີງາມລະຫວ່າງປະມຸກລັດສອງປະເທດໄດ້ຊີ້ນຳນຳພາສອງຝ່າຍໃນການແກ້ໄຂຂໍ້ຂັດແຍ້ງກັນທາງເສດຖະກິດການຄ້າ, ແກ້ໄຂການພົວພັນຈີນອາເມລິກາຢ່າງເໝາະສົມ. ທະແນມແຕ່ສອງຝ່າຍສືບຕໍ່ເດີນໄປສູ່ທິດທີ່ຄືກັນ, ເພີ່ມທະວີການຮ່ວມມືແລະຫຼຸດຄວາມເຫັນຂັດກັນໃຫ້ໜ້ອຍລົງຢ່າງບໍ່ຢຸດຢັ້ງ, ການພົວພັນຈີນອາເມລິກາຈະປ່ຽນວິກິດການເປັນໂອກາດອີກຄັ້ງໜຶ່ງ, ແລະບັນລຸຕ່າງຝ່າຍຕ່າງມີຜົນປະໂຫຍດ.
ຄຳເຫັນ
0