ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ທ່ານຫຼີເຄີ້ສຽງ ນາຍົກລັດຖະມົນຕີຈີນໄດ້ໃຫ້ສຳພາດນັກຂ່າວຈີນແລະຕ່າງປະເທດໃນວັນທີ 15 ມີນານີ້ວ່າ: ຈີນຍິນດີວາງນະໂຍບາຍໃຫ້ສິດທິພິເສດຫຼາຍກວ່າເກົ່າເພື່ອໃຫ້ພີ່ນ້ອງຮ່ວມຊາດໄຕ້ຫວັນທີ່ຢູ່ແຜ່ນດິນໃຫຍ່ຈີນບໍ່ວ່າຈະເປັນການລົງທຶນພັດທະນາທຸລະກິດ, ເຮັດວຽກ, ຮ່ຳຮຽນຫຼືດຳລົງຊີວິດ ລ້ວນແຕ່ຈະມີສິດເທົ່າທຽມກັນກັບພີ່ນ້ອງຮ່ວມຊາດແຜ່ນດິນໃຫຍ່.
ທ່ານຫຼີເຄີ້ສຽງກ່າວໃນກອງປະຊຸມຂ່າວທີ່ຈັດຂຶ້ນຫຼັງກອງປະຊຸມສະພາປະຊາຊົນແຫ່ງຊາດຈີນອັດລົງວ່າ, ທ່ານເລຂາທິການໃຫຍ່ສີຈິ້ນຜິງໄດ້ກ່າວປາໄສສຳຄັນໃນພິທີສະເຫຼີມສະຫຼອງວັນເປີດເຜີຍສານເຖິງພີ່ນ້ອງຮ່ວມຊາດໄຕ້ຫວັນຄົບຮອບ 40 ປີ ເຊິ່ງທ່ານໄດ້ຊີ້ແຈງທິດທາງນະໂຍບາຍ, ຫຼັກການແລະຫຼັກໝັ້ນກ່ຽວກັບບັນຫາໄຕ້ຫວັນ. ແຜ່ນດິນໃຫຍ່ຈະສືບຕໍ່ຍຶດໝັ້ນຫຼັກການຈີນດຽວແລະຄວາມເຫັນທີ່ເປັນເອກະພາບກັນໃນປີ 1992, ຄັດຄ້ານການແບ່ງແຍກໄຕ້ຫວັນໃຫ້ເປັນເອກະລາດ, ສົ່ງເສີມໃຫ້ການພົວພັນລະຫວ່າງສອງຝັ່ງຊ່ອງແຄບໄຕ້ຫວັນພັດທະນາໂດຍສັນຕິແລະໝັ້ນທ່ຽງ, ຊຸກຍູ້ສັນຕິພາບແລະຄວາມເອກະພາບຂອງປະເທດຊາດ.
ທ່ານຫຼີເຄີ້ສຽງຢືນຢັນວ່າ, ພວກເຮົາໄດ້ວາງມາດຕະການ 31 ຂໍ້ເພື່ອສົ່ງເສີມການແລກປ່ຽນແລະຮ່ວມມືດ້ານເສດຖະກິດ-ວັດທະນະທຳສອງຝັ່ງ. ສ່ວນບັນຫາໃນປັດຈຸບັນກໍຄືຕ້ອງຈັດຕັ້ງປະຕິບັດມາດຕະການ 31 ຂໍ້ດັ່ງກ່າວໃຫ້ເຖິງຖອງຢ່າງແທ້ຈິງ ແລະຍັງຄວນວາງມາດຕະການໃໝ່ຕື່ມອີກ. ທ່ານກ່າວວ່າ, ພີ່ນ້ອງຮ່ວມຊາດສອງຝັ່ງຊ່ອງແຄບໄຕ້ຫວັນຮ່ວມກັນຊົມໃຊ້ໂອກາດແຫ່ງການພັດທະນາ, ໄປມາຫາສູ່ກັນນັບມື້ນັບໃກ້ຊິດ, ການພົວພັນລະຫວ່າງສອງຝັ່ງກໍຈະຂະຫຍາຍຕົວນັບມື້ນັບດີແລະແໜ້ນແຟ້ນຍິ່ງຂຶ້ນ, ພວກເຮົາຫວັງວ່າຈະສາມາດບັນລຸຄວາມໄຝ່ຝັນແຫ່ງການຟື້ນຟູຄວາມຈະເລີນຮຸ່ງເຮືອງທີ່ຍິ່ງໃຫຍ່ຂອງຊົນຊາດຈີນຄືນໃໝ່.
ຄຳເຫັນ
0