ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 24 ມີນານີ້, ທ່ານສີຈິ້ນຜິງ ປະທານປະເທດຈີນໄດ້ເດີນທາງຢ້ຽມຢາມໂມນາໂກ, ເຊິ່ງເປັນການຢ້ຽມຢາມໂມນາໂກ ປະເທດສວຍງາມທີ່ຕັ້ງຢູ່ພາກຕາເວັນຕົກສຽງໃຕ້ຂອງທະວີບເອີຣົບເປັນຄັ້ງທຳອິດຂອງປະມຸກລັດຈີນ. ຢູ່ຕາມຖະໜົມຫົນທາງຂອງທົ່ວປະເທດໂມນາໂກເຕັມໄປດ້ວຍທຸງຊາດຂອງສອງປະເທດ, ໂມນາໂກໄດ້ກ້າວເຂົ້າສູ່ “ໄລຍະດີທີ່ສຸດໃນການຮ່ວມມືກັບຈີນ”.
ສົມເດັດອານເບັດລາຊະການທີ 2, ປະມຸກລັດໂມນາໂກໄດ້ເປີດເຜີຍໃນຫວ່າງມໍ່ໆມານີ້ວ່າ, ໃນໂອກາດຢ້ຽມຢາມປະເທດຈີນໃນເດືອນກັນຍາປີຜ່ານມາ, ຕົນເອງໄດ້ເຊື້ອເຊີນທ່ານສີຈິ້ນຜິງ ປະທານປະເທດຈີນຢ້ຽມຢາມໂມນາໂກ. ໃນໂອກາດໃຫ້ສຳພາດຕໍ່ນັກຂ່າວ, ສົມເດັດອານເບັດລາຊະການທີ 2 ກ່າວວ່າ: “ການຢ້ຽມຢາມຄັ້ງນີ້ຂອງທ່ານສີຈິ້ນຜິງແມ່ນການໃຫ້ກຽດຢ່າງສູງສຳລັບຂ້າພະເຈົ້າ.” ໃນການພົບປະກັນໃນວັນທີ 24 ມີນານີ້, ທ່ານສີຈິ້ນຜິງກ່າວວ່າ, ເຖິງວ່າຈີນແລະໂມນາໂກມີຄວາມຕ່າງກັນດ້ານຂະໜາດໃຫຍ່ແລະນ້ອຍ, ທາງດ້ານປະຫວັດສາດວັດທະນະທຳແລະລະບອບສັງຄົມກໍຕາມ, ແຕ່ສອງປະເທດມີນິດໄສຊົນຊາດທີ່ຄ້າຍຄືກັນແລະມີການສະແຫວງຫາດ້ານຈິດໃຈຮ່ວມກັນ, ເຮັດໃຫ້ສອງປະເທດ “ເຂົ້າໃຈກັນແລະໃກ້ຊິດກັນ”.
ເຖິງວ່າຍອດປະລິມານເສດຖະກິດຂອງສອງປະເທດແຕກຕ່າງກັນຢ່າງຫຼວງຫຼາຍ, ແຕ່ວ່າການຮ່ວມມືດ້ານເສດຖະກິດການຄ້າລະຫວ່າງຈີນແລະໂມນາໂກໄດ້ເພີ່ມຂຶ້ນຢ່າງບໍ່ຢຸດຢັ້ງ. ຕົວເລກສະຖິຕິສະແດງໃຫ້ເຫັນວ່າ, ແຕ່ເດືອນມັງກອນຫາເດືອນສິງຫາປີ 2018, ມູນຄ່າການຄ້າລະຫວ່າງສອງປະເທດບັນລຸເຖິງ 125 ລ້ານໂດລາສະຫະລັດ, ທຽບໃສ່ໄລຍະດຽວກັນຂອງປີ 2017 ເພີ່ມຂຶ້ນ 876,8%. ໃນນັ້ນ, ການຮ່ວມມືເສດຖະກິດດີຈີຕອນແລະໂທລະຄົມເຄື່ອນທີ່ແຮ່ງພັດທະນາຢູ່ແຖວໜ້າຂອງການຮ່ວມມືລະຫວ່າງຈີນແລະປະເທດເອີຣົບ. ຂ່າວແຈ້ງວ່າ, ນັບມາຮອດປັດຈຸບັນ, ກອງທຶນສົມເດັດອານເບັດລາຊະການທີ 2 ໄດ້ດຳເນີນການຮ່ວມມືກັບຈີນໃນໂຄງການສ້າງສະຖານີສຸຍຮວາທີ່ເຝົ້າຕິດຕາມເທົາສີຟ້າຂອງໜອງທ້າຍຮູ, ໂຄງການປົກປັກຮັກສາເສືອໄຊເບເຣຍເຫຼືອເສືອຕາເວັນອອກສຽງເໜືອຈີນແລະໂຄງການອື່ນໆ, ຍັງໄດ້ວາງແຜນຈະສ້າງຕັ້ງຫ້ອງການຢູ່ນະຄອນຫຼວງປັກກິ່ງ ສປ ຈີນເພື່ອພັດທະນາຊອງທາງການຮ່ວມມືກັບຈີນຫຼາຍຕື່ມອີກ. ສົມເດັດອານເບັດລາຊະການທີ 2 ເຄີຍຢ້ຽມຢາມຈີນ 10 ຄັ້ງ. ທ່ານສີຈິ້ນຜິງ ແລະ ສົມເດັດອານເບັດລາຊະການທີ 2 ລ້ວນແຕ່ເປັນ “ແຟນກິລາ” ຄືກັນ, ແລະໄດ້ສຸມທຸກກຳລັງເພື່ອຊຸກຍູ້ການອະນຸລັກສິ່ງແວດລ້ອມຢ່າງບໍ່ຢຸດຢັ້ງຄືກັນ, ຈຶ່ງສາມາດເວົ້າໄດ້ວ່າຜູ້ນຳສອງທ່ານມີຄວາມຮັກມັກທີ່ຄ້າຍຄືກັນຢ່າງຫຼວງຫຼາຍ.
ໃນຫຼາຍມື້ຜ່ານມາ, ທ່ານສີຈິ້ນຜິງຢ້ຽມຢາມໂມນາໂກໄດ້ກາຍເປັນຈຸດສຸມຂອງການລາຍງານຂ່າວຂອງສື່ມວນຊົນໂມນາໂກ. ເພື່ອສະໜອງຄວາມສະດວກໃຫ້ແກ່ນັກຂ່າວ, ລັດຖະບານໂມນາໂກຍັງໄດ້ຕັ້ງສູນຖະແຫຼງຂ່າວພິເສດຢູ່ໃກ້ລາຊະວັງໂມນາໂກ.
ນາງໂມນິກາ ໂກຢາຕິ ນັກຂຽນຄໍລຳຂອງວາລະສານ “Monte Carlo IN”, ນາງໄດ້ລາຍງານຂ່າວແລະປະເພນີຂອງຈີນດ້ວຍພາສາອີຕາລີແລະພາສາຈີນຮ່ວມກັນ. ໃນໂອກາດໃຫ້ສຳພາດຕໍ່ນັກຂ່າວ, ນາງກ່າວວ່າ, “ເຊື່ອວ່າການຢ້ຽມຢາມຄັ້ງນີ້ແມ່ນໂອກາດທີ່ດີສຳລັບຈີນແລະໂມນາໂກ, ໃນດ້ານໜຶ່ງ, ປະຊາຊົນໂມນາໂກມີຄວາມຮູ້ກ່ຽວກັບຈີນຍັງບໍ່ກວ້າງຂວາງປານໃດ, ການຢ້ຽມຢາມຄັ້ງນີ້ສາມາດເພີ່ມຄວາມຮູ້ກ່ຽວກັບຈີນຕື່ມອີກ; ອີກດ້ານໜຶ່ງ, ເຖິງວ່າເນື້ອທີ່ຂອງໂມນາໂກມີພຽງແຕ່ 2 ກິໂລຕາແມັດກວ່າເທົ່ານັ້ນ, ແຕ່ໂມນາໂກມີນະໂຍບາຍບຸລິມະສິດຈຳນວນຫຼວງຫຼາຍ, ແລະຊົມເຊີຍເພື່ອນຊາວຈີນທີ່ມາລົງທຶນ, ຊື້ເຮືອນແລະທ່ອງທ່ຽວ.”
ໜ້າທຳອິດຂອງໜັງສືພິມ Monaco-Matin ສະບັບວັນທີ 23 ມີນາລາຍງານວ່າ, ທ່ານສີຈິ້ນຜິງຢ້ຽມຢາມໂມນາໂກແມ່ນໄລຍະແຫ່ງການເປັ່ງປະກາຍແສງໃນປະຫວັດສາດໂມນາໂກ. ໃນທົ່ວປະເທດໂມນາໂກເຕັມໄປດ້ວຍທຸງຊາດຂອງຈີນ. ວາລະສານ Monaco Hebdo ຍັງໄດ້ວິເຄາະຢ່າງເລິກເຊິ່ງຕໍ່ໂອກາດການຮ່ວມມືເນື່ອງໃນໂອກາດການຢ້ຽມຢາມໂມນາໂກຂອງທ່ານສີຈິ້ນຜິງ.
ຄຳເຫັນ
0