ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ທ່ານສີຈິ້ນຜິງ ຜູ້ນຳສູງສຸດຂອງຈີນກ່າວວ່າ, ຈີນ-ຝລັ່ງເປັນເພື່ອນມິດທີ່ພິເສດ. ຄົນຈີນມັກຈະຫວນຄືນເລື່ອງໃນອະດີດເລື້ອຍໆ, ເມື່ອເວົ້າເຖິງຝລັ່ງ, ມັກຈະເນັ້ນວ່າ, ຝລັ່ງແມ່ນປະເທດຕາເວັນຕົກປະເທດທຳອິດທີ່ສ້າງຕັ້ງສາຍພົວພັນທາງການທູດກັບປະເທດຈີນ, ແມ່ນປະເທດຕາເວັນຕົກທີ່ເປີດສາຍການບິນໂດຍກົງກັບປະເທດຈີນໃໝ່ກ່ອນປະເທດອື່ນ, ແມ່ນປະເທດທຳອິດທີ່ຈັດກິດຈະກຳ “ປີວັດທະນະທຳຈີນ” ແລະອະນຸມັດໃຫ້ສ້າງຕັ້ງສູນວັດທະນະທຳຈີນ, ແລະກໍ່ແມ່ນປະເທດຕາເວັນຕົກປະເທດທຳອິດທີ່ຕັ້ງຄະນະວິຊາພາສາຈີນຢູ່ມະຫາວິທະຍາໄລຂອງຕົນ.
ເມື່ອຊຸມປີ 1960 ນາຍພົນຊາເລີເດີກູເລີ ໄດ້ສ້າງຕັ້ງສາຍພົວພັນທາງການທູດຢ່າງຮອບດ້ານກັບສາທາລະນະລັດປະຊາຊົນຈີນດ້ວຍສະຕິປັນຍາແລະຄວາມກ້າຫານອັນໂດດເດັ່ນຂອງທ່ານໂດຍໄດ້ທັບມ້າງຄວາມຂັດແຍ້ງກັນຂອງສົງຄາມເຢັນ, ເປັນເຈົ້າການຮັດແໜ້ນການພົວພັນລະຫວ່າງໂລກຝ່າຍຕາເວັນຕົກກັບຈີນ, ປະຊາຊົນຈີນໄດ້ຍ້ອງຍໍຊົມເຊີຍຕໍ່ຄວາມດີງາມເຫຼົ່ານີ້ ແລະມີຄວາມຮັກແພງເປັນພິເສດກັບຝລັ່ງ.
ລັກສະນະພິເສດເຫຼົ່ານີ້ມາຈາກນະໂຍບາຍການຕ່າງປະເທດທີ່ເປັນເອກະລາດຂອງຝລັ່ງ. ຍ້ອນມີລັກສະນະພິເສດແບບນີ້, ໄດ້ເຮັດໃຫ້ວຽກງານການຕ່າງປະເທດຂອງຝລັ່ງທີ່ມີຕໍ່ຈີນແຕກຕ່າງກັບປະເທດອື່ນຫຼາຍ, ເຮັດໃຫ້ການພົວພັນລະຫວ່າງຈີນ-ຝລັ່ງໄດ້ຮັບການພັດທະນາເປັນຢ່າງດີ. ແນ່ນອນ, ການພັດທະນາແລະການລົງເລິກຂອງການພົວພັນຈີນ-ຝລັ່ງກໍ່ໄດ້ຮັບຜົນດີຈາກການເປີດປະຕູແລະການຮ່ວມມືກັນລະຫວ່າງສອງຝ່າຍ. ປີກາຍນີ້, ຍອດມູນຄ່າການຄ້າລະຫວ່າງຈີນ-ຝລັ່ງໄດ້ບັນລຸຫຼາຍກວ່າ 60 ຕື້ໂດລາສະຫະລັດ, ເພີ່ມຂຶ້ນ15,5% ເມື່ອທຽບໃສ່ໄລຍະດຽວກັນຂອງປີ 2017, ເປັນລະດັບສູງສຸດໃນປະຫວັດສາດ.
ປະເທດຕ່າງໆໃນໂລກສູ່ມື້ນີ້ກຳລັງຜະເຊີນກັບການປ່ຽນແປງຢ່າງຂະໜາດໃຫຍ່ທີ່ບໍ່ເຄີຍມີດາກ່ອນ, ພາຍໃຕ້ເງື່ອນໄຂໃໝ່ນີ້, ຝລັ່ງແລະສະຫະພາບເອີລົບລ້ວນແຕ່ພວມດຳເນີນການປັບປຸງຕໍ່ການພົວພັນຕໍ່ພາຍນອກ, ລວມທັງການໄປມາຫາສູ່ກັບຈີນ, ເພື່ອຮັກສາກຳລັງການແຂ່ງຂັນຂອງຕົນ. ເລື່ອງທີ່ໜ້າຄວນເອົາໃຈໃສ່ນັ້ນຄື: ບໍ່ວ່າໂລກຈະປ່ຽນແປງໄປແນວໃດກໍ່ຕາມ, ຈີນ-ຝລັ່ງພຽງແຕ່ຈົດຈຳແລະປະຕິບັດຕາມຫຼັກມາດຖານສຳຄັນທີ່ບັງເກີດຜົນເຫຼົ່ານີ້ໄວ້ໃຫ້ດີ, ການພົວພັນພິເສດລະຫວ່າງຈີນ-ຝລັ່ງກໍ່ຈະສືບຕໍ່ໄດ້ຮັບກການປັບປຸງແລະພັດທະນາ ດັ່ງທີ່ທ່ານປະທານສີຈິ້ນຜິງສະຫຼຸບຂໍກກະແຈ 4 ຂໍ້ອອກມາ: ເອກະລາດແລະເປັນເຈົ້າຕົນເອງ, ເປີດປະຕູເຊິ່ງກັນແລະກັນບົນພື້ນຖານຕ່າງຝ່າຍຕ່າງມີຜົນປະໂຫຍດ, ກວມລວມແລະຖອດຖອນບົດຮຽນເຊິ່ງກັນແລະກັນ, ແລະແບກຫາບຄວາມຮັບຜິດຊອບ. ມີແຕ່ຮັກສາຈິດໃຈເອກະລາດ, ຈິ່ງຈະບັນລຸຄວາມຮັບຜິດຊອບນີ້ໄດ້, ຈິ່ງຈະສາມາດຍຶດໝັ້ນ, ບໍ່ຄອນແນ; ມີແຕ່ກວມລວມແລະຖອດຖອນເຊິ່ງກັນແລະກັນ, ຈິ່ງຈະສາມາດຮັກສາການເປີດປະຕູເຊິ່ງກັນແລະກັນ, ແລະໄດ້ຮັບຜົນປະໂຫຍດຮ່ວມກັນ.
ຈີນແລະຝລັ່ງມີຄວາມເຊື່ອໝັ້ນເຊິ່ງກັນແລະກັນໃນທາງການເມືອງຢ່າງສູງ, ພາຍໃຕ້ຂອບ ໜຶ່ງແລວໜຶ່ງເສັ້ນທາງ, ຝລັ່ງສາມາດເສີມຂະຫຍາຍບົດບາດຫຼາຍກວ່າເກົ່າ ເພື່ອຮ່ວມກັນກັບຈີນ ຊຸກຍູ້ການສ້າງ “ໜຶ່ງແລວໜຶ່ງເສັ້ນທາງ” ແລະບັນລຸຄວາມຄືບໜ້າຢ່າງໃຫຍ່ຫຼວງໃນດ້ານການຮ່ວມມືກັນແລະການບຸກເບີກຕະຫຼາດຝ່າຍທີສາມ. ປີ 2018, ຍອດມູນຄ່າຂາຍຍ່ອຍເຄື່ອງບໍລິໂພກໃນທົ່ວສັງຄົມຈີນບັນລຸ 38000 ຕື້ຢວນ ເປັນຕະຫຼາດບໍລິໂພກທີ່ໃຫຍ່ທີ່ສຸດໃນໂລກ, ເຊິ່ງຕະຫຼາດທີ່ໃຫຍ່ຊ່ຳນີ້ໄດ້ອຳນວຍໂອກາດທີ່ມະຫາສານໃຫ້ແກ່ຄູ່ການຄ້າຂອງຈີນ ໂດຍສະເພາະແມ່ນຝລັ່ງ. ຂໍ້ມູນຂອງກະຊວງການຄ້າຈີນສະແດງໃຫ້ເຫັນວ່າ, ໃນ 2 ເດືອນທຳອິດຂອງປີນີ້ ການນຳເຂົ້າຈາກຝລັ່ງສູ່ຈີນເພີ່ມຂຶ້ນ 42,2%.
ເມື່ອ 55 ປີກ່ອນ,ຝລັ່ງໄດ້ສະແດງໃຫ້ໂລກໄດ້ເຫັນຈິດໃຈເອກກະລາດ ກວມລວມ ແລະຄວາມຮັບຜິດຊອບຂອງຕົນ, ໃນໂລກສູ່ມື້ນີ້ທີ່ເຕັມໄປດ້ວຍສິ່ງທ້າທາຍ ໂອກາດ ແລະປັດໄຈທີ່ບໍ່ແນ່ນອນຕ່າງໆ, ຄົນເຮົາກໍມີຄວາມຸ້ງມາດປາຖະໜາທີ່ຈະເຫັນຈິດໃຈເອກະລາດ, ກ້າຫານຕັດສິນໃຈແລະຄວາມສະຫຼາດສ່ອງໃສຂອງຝລັ່ງອີກຄັ້ງໜຶ່ງ.
ຄຳເຫັນ
0